Unsaon Ka sa Paghinumdom sa Imong Haya?

Gikan sa usa ka artikulo ni Elder Quentin L. Cook sa Korum sa Napulog Duha ka mga Apostoles

Si David Brooks, sa usa ka editoryal nga giulohan og “The Moral Bucket List,” mipalambo sa konsepto nga adunay “duha ka set sa hiyas, mga hiyas nga pang-résumé ug ang pinasidunggan nga mga hiyas. Ang mga hiyas nga pang-résumé mao ang mga kahanas nga makapahimo kaninyo nga bililhon sa inyong pagpanarbaho. Ang pinasidunggan nga mga hiyas mao kanang hisgutan mahitungod kaninyo sa panahon sa haya.”

Tukma nga gitapos ni Brooks nga ang pinasidunggan nga mga hiyas mao ang mas importante. Alang kanako kini makahuluganon kaayo tungod kay sa dihang anaa pa ko sa pangidaron nga 20 aduna akoy kasinatian nga may dakong epekto ngari kanako. Naglangkob kini sa duha ka haya sa duha ka maayong mga tawo nga nahitabo sulod lang sa pipila ka adlaw ang gintang. …

Mihukom ko nga tawagon ang usa sa mga lalaki nga Adunahan ug ang lain usa ka tawo nga Matinud-anon. …

Adunahan

Si Adunahan adunay talagsaong kahanas sa pagdala sa mga tawo ug may dakong pagpakabana mahitungod sa mga tawo.
Dako kaayo ang iyang kinitaan ug nagpuyo sa usa ka dako, nindot nga balay nga nahimutang sa ibabaw sa lapad nga yuta.
Ang pagpili sa iyang pamilya ug impluwensya sa iyang mga anak nagtumong sa kasagaran sa edukasyon ug panarbaho.
Si Adunahan ug ang iyang asawa nahimong dili kaayo aktibo.
Miapil na sila sa mga halangdong sosyal ug sa komunidad nga mga kalihokan.
Si Adunahan usa ka impluwensya alang sa pagkamatinuoron, kaligdong, ug mabination sa tanang mga posisyon nga iyang nahuptan.
Ang iyang haya … mao kadto, sa kinatibuk-an, usa ka guol nga lubong. Ang kinabuhi ni Adunahan gibase hapit tanan diha sa mga hiyas nga pang-résumé.

Matinud-anon

Si Matinud-anon naminyo sa usa ka babaye nga hingpit ang kaaktibo sa Simbahan.
Ang iyang gamayng kaugalingon nga negosyo … nasunog, ug nawad-an siya sa tanan.
Sa wala madugay nakahimo siya og gamayng negosyo apan naglisud sa pagbayad sa gikinahanglan nga mga bayranan.
Aduna siyay usa ka gamay apan igo lang nga panimalay.
Miserbisyo siya sumala sa tawag, sa kasagaran isip usa ka magtutudlo, mitambong sa templo kanunay, ug usa ka matinud-anon nga priesthood.
Aduna siyay maanindot nga mga relasyon, ilabi na sa iyang dako nga pamilya ug daghan niyang mga apo.
Sa iyang pagretiro, siya ug ang iyang asawa miserbisyo og misyon.
Ang haya ni Matinud-anon … daghan ang mitambong ug malipayon. Ang mga istorya mahitungod sa iyang kinaiya, kamabination, pagpakabana sa uban, ug hugot nga pagtuo ug gugma sa Ginoo nga si Jesukristo.

Unsa ang labing importante ngari nako mahitungod sa mga kinabuhi nga bag-o lang nakong gihulagway mao nga ako nakaamgo nga ang labing mahinungdanong mga pagpili mahimong himoon sa tanan. … Ang pag-una sa Manluluwas, sa akong pamilya, ug sa Simbahan importante. Ang pagbuhat sa ingon mosangput diha sa maayo nga kinabuhi.