Ang Pagbu-bu sa Espiritu

Kini nga interbyu gipahigayon ni LaRene Porter Gaunt, Church Magazines. Ang impormasyon sa timeline ug sidebar pinaagi ni Kate Holbrook, Church History Department.

Namulong uban sa kalumo ug gahum atol niining ika-175 nga anibersaryo sa Relief Society, ang Kinatibuk-ang Kapangulohan mipakigbahin sa ilang mga pagbati, panabut, ug pagpamatuod ngari kanato isip mga sister sa Relief Society.

Gihigugma namo ang mga sister sa tibuok Simbahan,” miingon si Linda K. Burton, Kinatibuk-ang Presidente sa Relief Society, namulong alang sa iyang kaugalingon ug sa iyang mga magtatambag—Carole M. Stephens, Unang Magtatambag, ug Linda S. Reeves, Ikaduhang Magtatambag. “Unsa pa may atong gusto kay sa pagtabang sa usag usa diha sa dalan sa pakigsaad padulong sa kinabuhing dayon? Ang Dios mipadayag sa Iyang katuyoan diha sa Moises 1:39: ‘Kay tan-awa, mao kini ang akong buhat ug ang akong himaya—ang pagpahinabo sa pagka-imortal ug sa kinabuhi nga dayon sa tawo.’ Sa Relief Society nagtabang kita sa kababayen-an alang sa mga panalangin sa kinabuhing dayon. Gibuhat nato kini pinaagi sa pagpalambo sa pagtuo diha sa Langitnong Amahan ug kang Jesukristo ug sa Iyang Pag-ula, paglig-on sa mga indibidwal, mga pamilya, ug mga panimalay pinaagi sa mga ordinansa ug mga pakigsaad, ug pagtrabaho nga maghiusa aron matabangan kadtong nanginahanglan.¹

“Samtang mohinumdom ug mosunod kita sa katuyoan sa Relief Society, kita isip mga babaye nga Santos sa Ulahing mga Adlaw mahimong ‘talagsaon ug lahi—sa malipayong mga paagi,’² nga adunay dakong impluwensya sa kaayo sa tibuok kalibutan. Mao kana ang atong gusto alang sa atong mga sister sa Relief Society.”

Dinhi, sa usa ka interbyu sa staff sa mga magasin sa Simbahan, ang mga sakop sa Kinatibuk-ang Kapangulohan sa Relief Society nagtubag sa mga pangutana nga mahinungdanon karon ug nagpakigbahin sa ilang panglantaw alang sa umaabut.

1. Unsay anaa sa Relief Society nga naghiusa sa mga babaye gikan sa lain-laing mga kultura ug managlahing mga sitwasyon?

Sister Burton: Ang pagkasayud ug pagsunod sa among katuyoan naghiusa kanamo tadlas sa mga kultura. Nakahimamat ko og usa ka babaye sa Uruguay sa miaging tuig kinsa miingon nako nga gitawag siya nga mahimong presidente sa Relief Society atol sa labing lisud nga panahon sa iyang kinabuhi. Natintal siya sa pag-ingon, “Dili ko makahimo niana karon.” Apan tungod sa sagradong mga pakigsaad, miingon siya, “buhaton nako unsay gisugo nga akong buhaton. Duna koy hugot nga pagtuo sa Langitnong Amahan ug ni Jesukristo. Nasayud ko nga pinaagi sa Iyang Pag-ula makahimo ako niini.” Dayon miingon siya kanako, “Ang akong calling nakahatag og kahayag sa akong kinabuhi samtang miserbisyo ko sa akong mga sister. Misalig ko sa Ginoo, ug mipanalangin Siya kanako.”

Akong nakita ang katuyoan sa Relief Society diha sa iyang istorya. Ang iyang hugot nga pagtuo sa Langitnong Amahan ug ni Jesukristo ug sa Iyang Pag-ula nakatabang kaniya. Mihimo siya og sagradong mga pakigsaad ug gusto nga mosunod niini. Samtang nakighiusa siya sa pagtrabaho uban sa bishop, nabuhat niya ang iyang calling. Karon aduna siyay pagpamatuod nga ang Ginoo mopanalangin kanato kon mosalig kita Kaniya. Akong idugang ang akong pagpamatuod sa iyaha nga ang atong Manluluwas nga si Jesukristo motabang kanato sa matag mortal nga hagit ug sa tanang daw dili makiangayon niining kinabuhia.

Sister Stephens: Ang atong hugot nga pagtuo sa gahum sa maulaong sakripisyo sa Manluluwas mao ang kusganong maghiusa kanato. Ang atong gugma alang sa atong Langitnong Amahan ug kahibalo sa Iyang mahinungdanong plano sa kalipay mohiusa kanato samtang magtinguha kita sa kinabuhing dayon. Ang atong mga sister mga dalaga, minyo nga adunay mga anak, o minyo nga walay mga anak. Adunay mga biyuda ug kadtong diborsyada. Among gilauman nga kitang tanan maghiusa sa pagtrabaho ug magkahiusa samtang atong masabtan ang atong pagkatawo, atong buhat, ug atong katuyoan.

Sister Reeves: Ang panaghiusa nagdala kanato og kalipay tungod kay walay panagbingkil ug ang gugma sa Dios anaa sa atong mga kasingkasing (tan-awa sa 4 Nephi 1:15). Ang panaghiusa mobuntog sa tanang panaglahi tali sa katawhan. Ah, gusto kaayo namong bation sa mga sister kana nga gugma alang sa Manluluwas. Ah, gusto kaayo namong magkahiusa sa pagtabang nga matuman ang Iyang mga katuyoan.

2. Unsay mahimo sa mga babaye kon dili sila mobati nga parte sa Relief Society?

Sister Stephens: Ang among tinguha isip kapangulohan mao nga ang mga sister makasabut sa ilang mahangturong pagkatawo. Kanunay kitang kabahin sa buhat sa Dios. Isip mga babaye gitugahan kita og espesyal nga mga gasa sa kaayohan sa tanan. Gitudloan ug gibansay kita didto sa premortal nga kinabuhi kon unsa ang atong buhat. Didto kita nianang dakong Konseho sa Langit diin mipili kita sa plano sa Langitnong Amahan, nga naglakip sa Pag-ula ni Jesukristo. Misinggit kita sa kalipay tungod kay makabaton kita og mortal nga lawas.

Dinhi sa yuta, nga nagsugod ni Inahang Eva, ang mga babaye padayon nga parte sa buhat sa Dios. Si Propeta Joseph Smith mi-organisar sa mga babaye subay sa sumbanan sa priesthood—usa ka sumbanan nga anaa na sukad—sa dihang iyang giorganisar ang Relief Society niadtong 1842 sa Nauvoo, Illinois.

Si Presidente Russell M. Nelson, Presidente sa Korum sa Napulog Duha ka mga Apostoles, mitambag kanato, “Pagkat-on alang sa inyong kaugalingon kon si kinsa gayud kamo. Pangutan-a ang inyong Langitnong Amahan sa pangalan ni Jesukristo unsa ang Iyang gibati mahitungod kaninyo ug sa inyong misyon dinhi sa yuta. Kon kamo mangayo uban sa tinuod nga katuyoan, sa kadugayan ang Espiritu mohunghong og makapausab sa kinabuhi nga mga kamatuoran diha kaninyo. I-rekord kadto nga mga impresyon, ribyuha kini kanunay, ug sunda kadto nga mga impresyon nga walay pagkasayop.”

“Ako mosaad kaninyo nga kon kamo mosugod sa pagkakita bisan daklit lang kon unsay pagtan-aw sa inyong Langitnong Amahan kaninyo ug unsay Iyang gilauman nga inyong buhaton alang Kaniya, mausab gayud ang inyong kinabuhi!”³ Adto sa templo ug paminaw! Paminaw kon si kinsa kamo ug unsay inyong buhaton.

3. Sa unsang paagi nga ang mga babaye nga busy kaayo sa kinabuhi makatagamtam gihapon sa mga panalangin sa Relief Society?

Sister Stephens: Mag-agad kana sa pagbaton og tukma nga mga prayoridad. Bag-o lang kong migahin og panahon sa West Africa, ug nakakita ko og mga babaye nga maglukdo og tubig gikan sa atabay matag adlaw ug dayon motrabaho aron makatabang sa pagsangkap sa ilang mga pamilya. Usahay mabug-atan ko sa kakabus nga akong nasaksihan. Dayon nakig-uban ko sa mga miyembro sa Simbahan diha sa mga miting sa pagbansay nga nagsul-ob og hayag, puti nga mga polo ug hinimo sa balay nga mabulukon nga mga sinina.

Gitudloan ko nga kining mga tawhana buhong sa mga butang nga dili mapalit og kwarta. Nakat-unan nako nga ilang unahon ang labing importanting mga butang. Ang ebanghelyo mao ang makahuluganon kaayo alang kanila. Miingon sila kanako, “Wala koy gikinahanglan bisan unsa. Aduna na ako sa tanan nga akong gikinahanglan—aduna koy ebanghelyo ug akong pamilya.” Kon unahon nato ang labing importanting mga butang, ang ubang mga butang mahimong dili na kaayo importante kanato.

4. Unsay matanyag sa Relief Society ngadto sa batan-ong mga babaye?

Sister Burton: Ang batan-ong mga babaye adunay oportunidad nga makatabang sa pagtuman og panagna sa dihang mouswag sila ngadto sa Relief Society. Niadtong 1979, si Presidente Spencer W. Kimball (1895–1985) nanagna nga ang maayong mga babaye sa kalibutan “mapaduol sa Simbahan sa tumang kadaghan … sa kahimtang nga ang mga babaye sa Simbahan makita nga talagsaon ug lahi—sa malipayong paagi—gikan sa mga babaye sa kalibutan.”⁴ Nagkinahanglan kita sa talagsaong mga gasa, panglantaw, ug mga talento nga dala sa batan-ong mga babaye nga makatabang sa pagtuman niini nga panagna.

Sa panagna ni Presidente Kimball, si Presidente Russell M. Nelson miingon niadtong 2015 ngadto sa kababayen-an sa tanang edad—lakip ang batan-ong mga babaye, “Kamo ang mga babaye nga nakita [ni Presidente Kimball]! …

“… Kita nagkinahanglan og mga babaye nga adunay lig-ong panabut sa doktrina ni Kristo. … Nagkinahanglan kita og mga babaye kinsa nasayud kon unsaon sa paggamit sa gahum nga giandam sa Dios alang sa mga nagtuman sa pakigsaad. … Nagkinahanglan kita og mga babaye nga adunay kaisug ug panglantaw sama sa atong Inahan nga si Eva. …

“… Mohangyo ko ninyo sa pagtuman sa panagna ni Presidente Kimball. … Kon buhaton ninyo kini, ang Espiritu Santo mopalambo sa inyong impluwensya sa dili ordinaryo nga paagi!”⁵

Sister Reeves: Kitang tanan “mga anak nga babaye sa atong Langitnong Amahan, kinsa nahigugma kanato, ug kita nahigugma Kaniya.”⁶ Sa Relief Society, inyong makaplagan nga mas magkaparehas kita kay sa managlahi. Sama pananglit, kitang tanan anaa sa kalibutan nga adunay social media, advertising, ug kalibutanon nga mga ehemplo. Ang kalibutan ang nagdeterminar sa bili sa mga babaye. Ang pagkumpara sa atong kaugalingon sa unsay atong nakita ug nadungog sa kalibutan makahimo kanato nga mobati nga angay kitang mahimo nga sama niini. Karon labaw sa tanan, kinahanglan natong hinumduman tanan nga ang atong bili nagagikan sa pagkahimong anak nga babaye sa Dios—dili gikan sa unsay gihulagway sa kalibutan nga kita angayng mahimo. Ang atong kalig-on naggikan sa atong relasyon sa atong Amahan sa Langit, sa atong Manluluwas, ug sa usag usa isip mga sister sa ebanghelyo. Gamita kana nga kalig-on.

Sister Stephens: Mga batan-ong babaye, ang Dios nagkinahanglan kaninyo ug kami nagkinahanglan kaninyo. Kamo ang bag-o nga henerasyon nga gipakatawo nga may kalig-on nga kusganong mobarug batok sa mga hagit niining ulahing mga adlaw. Apil kanamo samtang mahimo kaming mga babaye nga nakasabut ni Jesukristo ug sa Iyang Pag-ula, mga babaye nga mohimo ug motuman sa sagradong mga pakigsaad, ug mga babaye nga motrabaho diha sa pakighiusa sa usag usa ug sa mga lider sa priesthood. Usa ka panalangin nga mahimong babaye sa bisan unsang edad diha sa Simbahan ni Jesukristo sa mga Santos sa Ulahing mga Adlaw karon. Atong ipakigbahin ang atong mga pagpamatuod kon si kinsa kita ug kinsa kita sa umaabut. Atong ipakigbahin ang atong mga mensahe sa hingpit nga kalipay, nga magmaya sa usag usa!

5. Nganong importante man alang sa mga tighupot sa priesthood ug mga sister sa Relief Society nga maghiusa sa pagtrabaho?

Sister Burton: Ang mga lalaki ug mga babaye adunay mga tahas nga naghingpit sa usag usa. Ang matag usa kanato adunay talagsaon nga mga gasa ug mga talento nga ikatampo sa buhat sa gingharian ug sa paglig-on sa usag usa. Ang kababayen-an maoy katunga sa mga kapanguhaan sa Ginoo, mahinungdanon sa buhat. Nagdala kita og panglantaw ug tinguha nga makatampo sa pagtukod sa gingharian nga nagsugod kang Eva, nagpadayon diha kang Sara, Rebekah, Ester, Maria, Elisabet, Emma, Eliza, ug ubang maisug nga mga sister niining katapusang dispensasyon ug sa karaang panahon.

Kon maghunahuna kita sa gahum ug impluwensya, ang gahum kasagaran dunay kalabutan sa gahum sa priesthood. Apan ang impluwensya sa matarung nga babaye nagdala usab og dakong gahum. Ang sama nga mga hiyas nga gihisgutan sa Doktrina ug mga Pakigsaad 121:41 nga nagdapit sa gahum sa priesthood mao ang samang mga hiyas nga nagdapit sa gahum sa impluwensya sa usa ka babaye—“pagdani,” “pagkamainantuson,” “kalumo ug kaaghup,” ug “tiunay nga paghigugma.” Kini nga mga butang tiunay diha sa atong diosnong kinaiya, ug pinaagi niini duna kitay oportunidad nga kusganong makaimpluwensya sa uban sa maayong mga paagi.

Samtang maghiusa kita sa pagtrabaho uban sa atong mga kaigsoonan sa priesthood, sa hinay-hinay mamahimo kitang sama sa katawhan nga nagpuyo sa Zion (tan-awa sa Moises 7:18).

Sister Reeves: Kon atong basahon ang “Ang Pamilya: Usa ka Pamahayag ngadto sa Kalibutan”, atong makita nga ang Langitnong Amahan mogamit sa mga kalig-on sa mga lalaki ug babaye sumala sa mga tahas ug mga responsibilidad nga makadala sa pinakadaghan sa Iyang mga anak balik ngadto Kaniya.⁷ Ang katuyoan sa Relief Society nagtabang kanato sa pagbuhat niana.

6. Sama sa unsa alang sa inyong kapangulohan nga magtrabaho uban sa mga propeta?

Sister Burton: Sama nga si Jesukristo maoy tigpanalipod sa mga babaye sa Iyang panahon, mao usab ang Iyang mga Apostoles sa atong panahon. Ang atong mga propeta detalyado kaayo sa ilang mga diskusyon, kanunay nagtinguha og mga ideya ug panglantaw sa mga sister sa Simbahan. Nanghinaut ko nga ang matag sister sa Simbahan makakita ug makadungog ug mobati sa unsay among nasinati sa among pagpakig-uban kanunay sa mga propeta, mga manalagna, ug mga tigpadayag. Sila tinuod nga mga disipulo, walay kahakog ug malipayong naghatag sa ilang mga kinabuhi ngadto sa Ginoo samtang nagtinguha sila sa pagbuhat sa Iyang kabubut-on ug nagsalig sa Iyang panahon. Kanunay silang nagpamatuod nga kini nga Simbahan iya ni Jesukristo ug nga Siya nangulo ugnaggiya niini.

Sister Reeves: Kon duna kitay inter-aksyon sa atong mga lider, nga kasagaran namong gibuhat, mas kanunay silang mangutana sa atong mga opinyon. Ang Kaigsoonan niini nga mga konseho maminaw ug mohatag og bili sa unsay among isulti, ug makigtambayayong sila kanamo sa among komon nga mga tumong.

Sister Stephens: Ang Unang Kapangulohan ug ang Korum sa Napulog Duha ka mga Apostoles linain nga mga saksi ni Jesukristo. Nakaila sila Kaniya. Nagkahimo silang sama Kaniya. Busa kon gusto ninyong masabtan ang relasyon sa mga lider sa mga babaye ngadto niini nga mga saksi ni Jesukristo, tan-awa ang Iyang ehemplo diha sa mga kasulatan. Si Jesukristo mipanalipod sa mga babaye, milakip sa mga babaye, ug mihimong halangdon sa mga babaye. Diha sa mga konseho uban sa Kaigsoonan, kanunay akong mitan-aw kanila ug naghunahuna, “Usa kini ka gamay nga bahin sa unsay mahimong bation diha sa presensya sa Manluluwas.”

7. Unsay relasyon tali sa espirituhanong gahum ug sa atong mga pakigsaad?

Sister Stephens: Ang espirituhanong gahum moabut kanato pinaagi sa mga ordinansa nga atong madawat ug sa pakigsaad nga atong gihimo. Adunay espirituhanong gahum usab nga moabut gikan sa pagsunod sa atong mga pakigsaad.

Ang espirituhanong gahum moabut kon takus kita nga moambit sa sakrament sa Dominggo. Mao kini ang panahon nga atong mabag-o ang tanang mga pakigsaad nga atong gihimo uban sa Ginoo. Modala kita sa Iyang ngalan ngari kanato, “mohinumdom kaniya,” mosunod sa Iyang mga sugo, ug maningkamot nga sa kanunay “makabaton sa iyang Espiritu uban [kanato]” (D&P 20:77, 79).

Sister Burton: Niining espirituhanong gahum, si Nephi miingon, “Ako, si Nephi, nakakita sa gahum sa Kordero sa Dios, nga kini mikunsad diha sa mga santos sa simbahan sa Kordero” (1 Nephi 14:14). Dili ba kanang termino nga mga santos naglakip sa mga lalaki ug babaye?

Si Nephi nagpadayon sa mao gihapon nag bersikulo sa pag-ingon nga ang gahum sa Kordero sa Dios mikunsad “diha sa mga katawhan sa pakigsaad sa Ginoo, kinsa nagkatibulaag diha sa ibabaw sa yuta; ug sila gisangkapan sa katarung ug uban sa gahum sa Dios sa dako nga himaya.” Kita isip “katawhan sa pakigsaad”—mga lalaki ug babaye—mahimong “gisangkapan sa katarung ug uban sa gahum sa Dios sa dako nga himaya.” Kini mao ang balaanong padulngan sa tanang anak sa Dios nga mga tigtuman og pakigsaad.

Sister Stephens: Ang pagsabut sa kinutuban sa impluwensya sa atong balaanong padulngan makita diha sa mga tubag sa duha ka mga pangutana: (1) Nasayud ka ba kon si kinsa ka? (2) Nasayud ka ba kon unsay anaa kanimo? Kon nakasabut kita kon unsay anaa kanato, makasabut kita nga aduna kita sa tanan natong gikinahanglan. Pinaagi sa mga ordinansa ug mga pakigsaad nga atong gihimo sa templo, makabaton kita sa mga panalangin, sa gahum, ug sa awtoridad sa tanang butang kalabut sa priesthood. Wala kita gi-orden. Wala kita masayud kon ngano. Ang pagka-orden sa priesthood gikan sa amahan ngadto sa anak nga lalaki mao na ang kapunongan sa Dios sukad pa sa panahon ni Adan ug Eva.

Sister Reeves: Duna koy pagpamatuod nga ang mga babaye nga nagtuman sa pakigsaad nakaila nga ang atong Amahan mihatag kanato sa tanan nga atong gikinahanglan aron makabalik ngadto sa Iyang presensya pinaagi sa paghimo ug pagtuman sa mga pakigsaad.

8. Unsa ang labing importanting butang nga gusto ninyong mahinumduman sa mga sister sa Relief Society?

Sister Burton: Sa Doktrina ug mga Pakigsaad 45:3 kini nag-ingon: “Paminaw kaniya kinsa mao ang manlalaban ngadto sa Amahan, kinsa nangamuyo sa inyong kahimoan diha sa iyang atubangan.”

“Busa, Amahan, luwasa kining akong mga kaigsoonan nga mituo sa akong ngalan, nga sila moduol ngari kanako ug makabaton sa walay katapusan nga kinabuhi” (bersikulo 5). Akong gimahal ang kalumo ni Kristo ngari kanato. Siya nangamuyo sa atong kawsa tungod kay nahigugma Siya kanato! Gusto Niya nga moduol kita Kaniya! Atong mahalon ug palamboon ang atong pagtuo kang Jesukristo ug sa atong Langitnong Amahan.

Isip mga anak nga babaye sa pakigsaad sa Dios nga nagkatibulaag sa ibabaw sa tibuok yuta karon, kita gisangkapan diha sa dakong himaya sa katarung ug uban sa gahum sa Dios. Samtang mohinumdom kita sa atong katuyoan, magmaya ug motuman sa atong mga pakigsaad, makita kita nga “talagsaon ug lahi—sa malipayong paagi—gikan sa mga babaye sa kalibutan,” ug makatabang kita sa pag-andam sa kalibutan alang sa pagbalik sa atong Manluluwas nga si Jesukristo.

Alang sa dugang nga kasaysayan sa Relief Society, adto sa history.lds.org/women.

Mubo nga mga sulat

1. Tan-awa sa Handbook 2: Administering the Church (2010), 9.1.1.

2. Mga Pagtulun-an sa mga Presidente sa Simbahan: Spencer W. Kimball (2006), 279.

3. Russell M. Nelson, “Barug isip Tinuod nga mga Milenyal,” Liahona, Okt. 2016, 49.

4. Mga Pagtulun-an sa mga Presidente: Spencer W. Kimball, 279.

5. Russell M. Nelson, “Usa ka Hangyo ngadto sa Akong mga Sister,” Liahona, Nob. 2015, 96, 97.

6. Personal nga Kauswagan sa Young Women (booklet, 2009), 3.

7. Tan-awa sa “Ang Pamilya: Usa ka Pamahayag ngadto sa Kalibutan,” Liahona, Nob. 2010, 129.

8. Emma Smith, sa Relief Society Minute Book, Mar. 17, 1842, 13, Church History Library, Salt Lake City.

9. Joseph Smith, sa Relief Society Minute Book, Hunyo 9, 1842, 63.

10. Tan-awa sa Jill Mulvay Derr, Janath Russell Cannon, Maureen Ursenbach Beecher, Women of Covenant: The Story of Relief Society (1992), 138.

11. Zina D. H. Young, “First General Conference of the Relief Society,” Women’s Exponent, Abr. 15, 1889, 172.

12. Julie B. Beck, “‘Anak nga mga Babaye sa Akong Gingharian’: Ang Kasaysayan ug Buhat sa Relief Society,” Liahona, Nob. 2010, 114.

Niadtong Marso 17, 1842, pipila lang ka mga minutos human nahimo siyang presidente sa bag-ong Female Relief Society sa Nauvoo, si Emma Smith namulong kabahin sa katuyoan niana nga kapunongan. “Sa pagpangita ug paghupay sa mga nagsubo,” miingon siya. Sa “pagpangambisyon sa pagbuhat og maayo” ug “pagsiguro nga ang moral nga mga sumbanan gisunod.”⁸

“Ang Society dili lamang aron sa paghupay sa kabus, apan sa pagluwas og mga kalag.”⁹ —Joseph Smith

Sa Utah ang mga Relief Society mipadayon sa pagtrabaho aron sa pagluwas sa mga kalag ug pag-atiman sa mga panginahanglan. Ang mga Relief Society nangalagad usab sa nangabut nga mga milalin, lakip ang mga naluwas gikan sa Willie ug Martin handcart company, nanghatag og mga suplay, pagkaon, ug medikal nga pag-atiman. Sugod niadtong 1868, ang mga lokal nga ward Relief Society misugod sa pagtukod og mga lawak-tigumanan hall aron didto mag-abut, mag-atiman sa mga kabus, mopahigayon sa mga kalihokan kalabut sa kapunongan, ug mamaligya og mga butang. Ang pagtukod og mga lawak-tigumanan alang sa mga ward Relief Society natapos niadtong 1924.

Ang labing dugay nga ekonomikanhong paningkamot sa Relief Society mao ang programa sa pagtipig og bugas: 1876–1918. Atol sa kakulang sa trigo sa dayon nang tapos sa Unang Gubat sa Kalibutan, ila kining gibaligya tungod sa dili kabalibaran nga hangyo sa gobyerno sa U.S. Ang kwarta nga nakita sa pagbaligya og trigo gigamit sa pagpakunhod sa gidaghanon sa mga namatay nga manganakay nga inahan ug mga masuso, gigasto sa mga clinic alang sa mabdos nga mga babaye ug gagmayng mga bata, gipasiugda og mga klase sa pag-atiman sa lawas, ug sa pagpundo og mga suplay alang sa pagpanganak.

Ang Social Services Department giestablisar ni Amy Brown Lyman niadtong 1918 ubos sa pagdumala sa Presidente sa Simbahan nga si Joseph F. Smith (1838–1918). Si Sister Lyman miorganisar og mga kurso sa pagbansay sa mga sakop sa Relief Society sa propesyunal nga pamaagi sa social work. Sa nag-unang katuigan sa Dakong Depresyon, ang departamento nakatabang sa daghan kaayong mga tawo ug nakigsabut sa lokal ug federal nga mga opisyal sa gobyerno sa pag-apud-apod og hinabang ngadto sa nanginahanglang.

Atol sa dugay nga pagpangalagad sa Kinatibuk-ang Presidente sa Relief Society nga si Belle S. Spafford, ang Relief Society ug ubang mga auxiliary sa Simbahan miapil sa usa ka mas dako nga proseso sa correlation sa Simbahan, gitumong sa pagwagtang sa nagdobleng mga paningkamot, pagpaminos sa mga usik, ug pag-ugmad og kalig-on sa tibuok kalibutan nga simbahan nga paspas kaayong nagtubo. Mga kausaban naglakip sa gi-reorganize sa mga magasin sa Simbahan ug sa katapusan sa independente nga mga bank account.

Karon, salamat sa pagpangulo sa matinud-anong mga sister sa Relief Society sulod sa 175 ka tuig, ang mga Relief Society sa tibuok kalibutan nga nagtabang niadtong nanginahanglan. Sama pananglit, ang mga lider sa Relief Society sa Caracas, Venezuela, gusto nga makakita og mga paagi alang sa mga sister sa pagserbisyo. Sila mibisita sa usa ka pasilidad sa mga tigulang ug gipakita sa usa ka kwarto nga mga babaye kinsa nanaghigda sa salog ug swala magsul-ob og sinina. Ang mga sister sa Relief Society naghilak samtang sila nagligo, nagsinina ug nagpakaon sa mga babaye ug mitupi sa ilang buhok.

Katuyoan sa Relief Society

Ang Relief Society nagtabang sa pag-andam sa kababayen-an alang sa mga panalangin sa kinabuhing dayon samtang sila

• mopalambo og hugot nga pagtuo diha sa Langitnong Amahan ug ni Jesukristo ug sa Iyang Pag-ula;

• molig-on sa mga indibidwal, mga pamilya, ug mga panimalay pinaagi sa mga ordinansa ug mga pakigsaad; ug

• makighiusa sa pagtrabaho sa pagtabang niadtong nanginahanglan.