Pag-andam sa Espirituhanong Pagbusog

Ni Manuel Emilio Ciriaco

Ang tagsulat nagpuyo sa Dominican Republic.

Sa dihang gitawag ako isip unang magtatambag sa bishopric, ang nanambong sa miting sa sakrament sa among ward miubos. Isip bishopric, nakahukom kami nga magpuasa ug mag-ampo ngadto sa Langitnong Amahan sa paghatag namo og kaalam nga makahibalo unsaon sa pagpalig-on sa mga miyembro.

Ang Ginoo midasig namo sa paghatag og gibug-aton sa miting sa sakrament nga usa ka espirituhanong pagbusog, mao nga nakahunahuna kami og paagi sa pag-imbitar sa mga miyembro, sa ilang mga higala, ug sa ilang mga silingan sa pagtambong sa sakrament ug pagsinati og espirituhanong pagbusog. Mihimo kami og imbitasyon nga nag-ingon, “Dali ug paminaw, tan-awa, ug pamatia ang presensya sa Ginoo sa espirituhanong pagbusog” ug mihatag niini sa matag usa sa mga miyembro, lakip na ang batan-ong lalaki ug batan-ong mga babaye.

Nag-andam usab kami og gamay nga ward choir nga dunay walo ka tingog. Mainampoon kaming nagpili og espirituhanong mga himno ug mga mamumulong ug miimbitar sa mga miyembro sa pagtabang nga dunay reverence [balaang pagtahud] sa okasyon.

Ang tanan andam na alang sa espirituhanong pagbusog! Ang nanambong nianang Dominggo naglakip sa 42 ka mga investigator ug dili kaayo aktibo nga mga miyembro. Ang ikaduhang espirituhanong pagbusog, dihay 64 ka mga investigator ug dili kaayo aktibo nga mga miyembro. Paglabay sa tulo ka bulan dili na kami masulod sa chapel, ug paglabay sa unom ka bulan ang among ward midaghan pag-ayo nga kami nag-andam nga mabahin ngadto sa duha ka mga ward.

Among nakat-unan nga ang pagtagad sa sakrament miting isip dili lang usa ka miting sa Dominggo apan isip usa ka sagrado nga kasinatian makahatag nato og talagsaong oportunidad sa pagdapit sa atong mga minahal sa pagduol kang Kristo pinaagi sa usa ka sagrado nga espirituhanong pagbusog.

Ang among pagpangandam sa pagpalambo sa kakusog sa pagbati sa espiritu ug sa reverence [balaan nga pagtahud] sa sakrament miting nakatabang sa pagpadaghan sa manambong nga mga tawo kinsa wala gayud maghunahuna nga mobati og kalipay pinaagi sa pag-anha sa pagtan-aw, sa pagbati ug pagpangita niini diha sa Ang Simbahan ni Jesukristo sa mga Santos sa Ulahing mga Adlaw.

Sa unsang paagi makatabang kita sa paghimo sa sakrament nga usa ka mas espirituhanon nga ordinansa?

• Ang pagpangandam magsugod diha sa panimalay samtang ang mga pamilya maghisgot unsaon sa pagpalambo sa ilang kasinatian sa sakrament.

• Ang naghupot sa priesthood kinsa mangalagad sa sakrament mohimo niini nga may balaang pagtahud, nga sila nagrepresentar sa Ginoo sa pagpakigbahin sa sakrament ngadto sa mga miyembro. Kadtong mopanalangin sa sakrament makahimo sa mga pag-ampo nga usa ka sagrado nga komunikasyon gikan sa Dios, dili lamang pagbalik-balik sa mga pulong.