Sumala sa Gimando sa Doktor
Ang paghinulsol mao ang resita, dili usa ka silot.
Dili ko ganahan moadto sa doktor. Kanunay kong mabalaka sa kahasol, pagpaabut sa oras, ang mga pag-indyeksyon, sa mando nga “kalma lang.” Sa gamay pa ko nga bata, nagtuo ko nga ang mga nurse ug doktor mga dautang tawo nga malingaw motuslok nako sa dagom, apan sa akong pagdako nakaamgo ko nga dili sila mga dautan; nagtabang sila. Ug sa kanunay mas maayo akong pamati human sa akong pakigkita kanila. Bisan unsa pa ka laay diha sa hulatanan, unsa ko ka sabaan nga maindyeksyunan, o unsa ko kasagmuyo kon ang doktor moingon nako nga kinahanglan nga mopahulay, sa katapusan, angay ra gayud kini.
Usahay ang paghinulsol tingali dunay samang pagbati sa byahe ngadto sa doktor.
Usa ka Hingpit nga Kalipay o Kasakit?
Imbis mook-ok sa kahadlok kon maghunahuna mahitungod sa bati nga lami sa tambal o sa talinis nga dagom, mook-ok ba kamo og gamay kon makadungog sa mga pulong “gisakit uban sa walay katapusan nga kahasol,” “gihasol uban sa mga kasakit sa impyerno,” ug “sa apdo sa kapaitan”? (tan-awa sa Alma 36:12–18). Mao kana ang paghulagway ni Alma sa sinugdanan sa iyang paghinulsol, dili ba?
Human ang anghel mipakita ngadto kang Alma ug sa anak nga mga lalaki ni Mosiah, si Alma nahinumdom sa tanan niyang mga sala ug nakita kon sa unsang paagi siya misukol batok sa Dios. Miserable kaayo siya nga nanghinaut nga iya nga “igkita lakip ang kalag ug lawas” (Alma 36:15). Agay. Hapit ang pag-indyeksyon sa doktor mura nalang og mga halok sa gamayng bata. Busa nganong nagpadayon si Alma sa paghago “sa walay paghunong, nga [siya] makakabig og mga kalag ngadto sa paghinulsol”? (Alma 36:24). Nganong gusto niya nga ang ubang mga tawo makasinati og butang nga hilabihan ka sakit alang kaniya?
Tingali tungod kini sa unsay sunod nga nahitabo.
Nahinumdom Siya sa Iyang Manluluwas, Si Jesukristo.
“Ako nangamuyo sulod sa akong kasingkasing: O Jesus, ikaw nga Anak sa Dios, malooy ka kanako. …
“Ug karon, tan-awa, sa diha nga ako naghunahuna niini, ako wala na mahinumdom sa akong mga kasakit; oo, ako wala na samoka sa panumduman sa akong mga sala.
“Ug, unsa nga hingpit nga kalipay, ug unsa ka kahibulongan nga kahayag ang akong nakita; oo, ang akong kalag napuno sa hingpit nga kalipay labaw sa akong kasakit!” (Alma 36:18–20; empasis gidugang). Nakat-unan ni Alma nga sama kalisud ug gani kasakit ang pag-atubang sa atong mga sala, ang kalipay nga atong masinati inig kahuman angay ra. Ang hingpit nga kalipay nga iyang gibati hilabihan ug maanindot kay sa bisan unsang butang nga iyang nabati sukad (tan-awa sa Alma 36:21).
Walay angayng Ikahadlok
Kon ang mga katawhan mook-ok sa kahadlok sa paghunahuna sa paghinulsol, tingali tungod kay ilang gihunahuna ang masakit nga bahin. Kasagaran sa paghinulsol nagkinahanglan og panahon ug usahay sa pagpahiuli nagkinahanglan og dakong pagpaubos ug kakugi, apan sumala sa gitudlo ni Elder Richard G. Scott (1928–2015) sa Korum sa Napulog Duha ka mga Apostoles, “Ang paghinulsol dili usa ka silot. Kini ang dalan nga puno sa paglaum ngadto sa mas mahimayaong umaabut.”1 Si Presidente Russell M. Nelson, Presidente sa Korum sa Napulog Duha ka mga Apostoles, mitawag niini nga “tam-is nga panalangin sa paghinulsol.”2 Sa laing pagkasulti, walay angayng ikahadlok o likayan sa bisan unsa nga aspeto sa paghinulsol. Bisan unsa kalisud kining atubangon ug sa paghimo og pagpahiuli sa atong mga sala, ang makaayo nga gahum sa Manluluwas pinaagi sa Iyang Pag-ula kanunayng anaa aron modala kanato, ug ang hingpit nga kalipay mobuntog ug mopatigbabaw sa bisan unsang pagbati sa kasakit, kaulawan, o kasubo nga atong naagian.
Alang sa Imong Kaugalingong Kaayohan
Nasayud ba kamo unsa ang mga ipasabut sa mga pulong Primum non nocere? Kon ikaw usa ka doktor, tingali nakahibalo ka. Primum non nocere mao ang Latin sa “una ayaw paghimo og kadaut.” Mao kini ang naggiya nga baruganan sa tanang nagpraktis og medikal, usa ka saad nga ilang gihimo. Wala kana magpasabut nga nagsaad sila nga dili gayud makahimo sa kasakit, apan bisan paman ang tanan nilang buhaton kanunay nga alang sa kaayohan sa ilang mga pasyente.
Sa inyong hunahuna ang Dios ug si Jesukristo mohimo ba og mga saad nga ingon niana? Mas maayo kon motuo kamo! Tan-awa lang sa Isaias 1:18; Isaias 41:13; Mga Taga-Roma 8:28; ug 3 Nephi 13:14. (Pangitaa gayud kini. Ug kini pipila lang niini!) Ang kalainan mao nga, ang mga tawo usahay masayop. Apan Si Jesukristo ug ang Langitnong Amahan hingpit, busa kamo makasigurado nga ang tanang butang nga Ilang gihangyo kanimo mahimong alang sa inyong kaugalingong kaayohan. Kanunay. Busa kon ang Dios moresita og paghinulsol, kini tungod kay Siya nasayud nga mopanalangin kini sa inyong kinabuhi. Ang paghinulsol dili mahitungod sa pagsilot. Mahitungod kini sa pagpaayo, pagdaug batok sa kahuyang, pagsalikway sa kinaiyanhon nga pagkatawo, ug pagpalayo gikan sa sala aron mobalik ngadto sa Dios.
“Dawata ang Pag-ula ni Jesukristo ug ang paghinulsol isip mga butang nga hangupon ug gamiton kada adlaw sumala sa mando sa Bantugan nga Mananambal,” miingon si Elder Jörg Klebingat sa Seventy. “Pag-establisar og kinaiya sa nagpadayon, malipayon nga paghinulsol pinaagi sa paghimo niini nga pinili nga estilo sa kinabuhi.”3
Kon ang Bantugan nga Mananambal, Si Jesukristo, misulat nimo og resita alang sa paghinulsol, ayaw itugot nga ang imong kahadlok sa kasakit o kaulawan mobabag sa agianan. Salig sa Iyang mga saad nga bisan tuod kini masakit sulod sa mubo nga panahon, uban sa dakong kalooy Siya mopundok kaninyo (tan-awa sa 3 Nephi 22:7), ug sama ni Alma, kamo mapuno sa hingpit nga kalipay sa hilabihan sama sa inyong mga kasakit (tan-awa sa Alma 36:19–20).