Gisangkapan sa Katarung

Ni Presidente Henry B. Eyring

Unang Magtatambag sa Unang Kapangulohan

Ang propeta sa Dios dinhi sa yuta, si Presidente Thomas S. Monson, namahayag, “Karon, kita nagtigum batok sa dakong nagkalainlaing matang sa sala, bisyo, ug kadautan nga nagkapundok sa atong atubangan.”¹

Ikahibulong ba ninyo nga mahibalo nga si Presidente Monson nakasulti niadtong mga pulonga 50 ka tuig na ang milabay? Kon kita nagtigum batok sa pwersa sa kadautan nga niadtong panahona grabe na, unsa pa kaha ka grabe ang pagpanghulga sa dautan ngari kanato karon? Sa nindot nga rason, ang Ginoo namahayag sa atong dispensasyon, “tan-awa, ang kaaway naghiusa” (D&P 38:12).

Ang gubat nga diin “tanan kita gitawag”² gisugdan na sa wala pa kita matawo dinhi sa yuta. Kini gisugdan na bisan wala pa gilalang ang kalibutan. Gisugdan na kini sa daghang millenia ang milabay didto sa kinabuhi nga wala pa dinhi sa yuta, diin si Satanas misukol ug “nagtinguha sa paglaglag sa kabubut-on sa tawo” (Moises 4:3).

Si Satanas nalupig sa pakiggubat ug “gitambog ngadto sa yuta” (Pinadayag 12:9), diin siya nagpadayon sa iyang gubat karon. Dinhi sa yuta “siya nagpasiugda og gubat batok sa mga santos sa Dios, ug miliyok palibut kanila” (D&P 76:29) uban sa bakak, pagpanglimbong, ug mga tintasyon.

Siya nakiggubat batok sa mga propeta ug apostoles. Siya nakiggubat batok sa balaod sa kaputli ug kabalaan sa kaminyoon. Siya nakiggubat batok sa mga pamilya ug sa templo. Siya nakiggubat batok sa maayo, balaan ug sagrado.

Unsaon man nato sa pagpakiggubat sa maong kaaway? Unsaon man nato sa pagkig-away batok sa dautan nga makita nga milukop sa atong kalibutan? Unsa man ang atong hinagiban? Kinsa ang atong kaalyado?

Ang Gahum sa Kordero

Si Propeta Joseph Smith mitudlo nga ang yawa walay gahum ibabaw kanato gawas lamang kon ato siyang tugotan.³

Nakakita sa atong panahon, si Nephi “nakakita sa gahum sa Kordero sa Dios, nga kini mikunsad diha sa mga Santos sa simbahan sa Kordero, ug diha sa mga katawhan sa pakigsaad sa Ginoo, kinsa nagkatibulaag diha sa ibabaw sa tibuok yuta; ug sila gisangkapan sa katarung ug uban sa gahum sa Dios sa dako nga himaya” (1 Nephi 14:14; empasis gidugang).

Unsaon nato sa pagsangkap ang atong kaugalingon uban sa pagkamatarung ug gahum? Atong ibalaan ang adlawng igpapahulay ug motahud sa priesthood. Kita mohimo ug motuman sa sagradong mga pakigsaad, magbuhat sa atong family history, ug motambong sa templo. Kita padayong maningkamot sa paghinulsol ug mangamuyo uban sa Ginoo sa “dihogi sa inula nga dugo ni Kristo nga kami mahimo nga makadawat sa kapasayloan sa among mga sala” (Mosiah 4:2). Kita mag-ampo ug moserbisyo ug mopamatuod ug mopakita sa hugot nga pagtuo kang Jesukristo.

Kita usab nagsangkap sa atong mga kaugalingon sa pagkamatarung ug gahum kon atong “gimahala sa kanunay diha sa [atong] mga hunahuna ang mga pulong sa kinabuhi” (D&P 84: 85). Atong ibahandi kadtong mga pulong pinaagi sa pagtagbaw og maayo sa balaang mga kasulatan ug sa mga pulong sa mga pinili nga mga sulugoon sa Ginoo, kinsa mopakigbahin sa Iyang kabubut-on, hunahuna, ug tingog (tan-awa sa D&P 68:4) sa panahon sa kinatibuk-ang komperensya sa sunod bulan.

Sa atong pakiggubat batok sa dautan, kinahanglan gayud kanunay natong hinumduman nga kita tabangan sa mga tawo dinhi sa mortalidad ug sa langit. Ang atong kaalyado naglakip sa Dios ang Amahan sa Kahangturan, ang Ginoong Jesukristo ug ang Espiritu Santo.

Ang atong kaalyado naglakip usab sa dili makita nga mga kasundalohan sa langit. “Ayaw kahadlok,” si Eliseo misulti og usa ka nalisang nga batan-ong lalaki samtang sila nag-atubang sa mga kasundalohan sa dautan, “kay sila nga ania uban kanato labing daghan kay kanila nga anaa kanila” (tan-awa sa 2 Mga Hari 6:15–16).

Dili kita angay nga mahadlok. Ang Dios nahigugma sa Iyang mga Santos. Siya dili mobiya kanato.

Ako nasayud nga ang Dios, agi og tubag sa pag-ampo, mituman sa akong mga pangamuyo sa pagtubos kanako gikan sa dautan. Ako mopamatuod nga uban sa tabang sa Dios nga Amahan, ang Manluluwas sa kalibutan, ug sa Espiritu Santo, kita makasiguro nga mahatagan og igong gahum sa pagbuntog sa bisan unsang pwersa sa dautan nga atong atubangon.

Unta kita kanunayng sangkapan sa katarung aron nga kita masaligon nga makabaton og kadaugan sa katapusan.