Pagkinabuhi nga Panig-ingnan sa mga Magtutuo
Ni Elder Von G. Keetch
Sa Seventy
Gikan sa usa ka debosyonal nga pakigpulong, “Pagkinabuhi ingon nga Panig-ingnan sa mga Tumutuo,” gipakigpulong sa Brigham Young University–Idaho niadtong Hunyo 14, 2016. Alang sa kompleto nga pakigpulong sa Iningles, adto sa web.byui.edu/devotionalsandspeeches.
Sa unsang paagi nga kamo makatudlo sa labing maayo ug mapanalipdan ang doktrina sa ebanghelyo ni Jesukristo samtang magpakita usab og gugma, kamabination ug pagsabut?
Ang istorya gisaysay sa usa ka gamay nga unit sa kasundalohan nga gi-assign sa lisud kaayo nga misyon diha sa sulod sa tiretoryo sa kaaway. Sa nagkaduol na ang unit sa tumong niini, ang kaatbang nga mga unit nakamatngon sa presensya. Ang gamhanang pwersa daling mipalibut sa grupo ug misugod sa pagrak-rak gikan sa tanang dapit sa palibut. Sa dihang ilang nasuta nga gilibutan na sila ug nag-antus sa sagunson nga pagpangrak-rak, ang mga sakop sa gamayng unit nagtan-aw sa ilang komander nga barug diha sa bato, nga nagdasig kanila.
Nagtan-aw sa iyang mga tawo, “Mga kauban, anaa sila sa dapit kon asa nato sila gusto. Makatira na kamo sa bisan asa nga direksyon!”
Kamo ug ako usab adunay lisud nga misyon sa kalibutan karon. Kini mao ang pagtudlo ug pagpanalipod sa kamatuoran nga anaa sa ebanghelyo ni Jesukristo. Sa kalibutan nga atong gipuy-an, nasayud ko nga kini mahimong lisud masabtan sa eksakto ang labing maayong lagda sa pagkig-inter-aksyon, ilabi na kon kamo gilibutan sa daghan kaayong mga tingog nga andam sa pag-usab sa kamatuoran. Kanunayng adunay daghan kaayong pagpang-atake gikan sa nagkalain-laing mga anggulo nga lisud masayran kon unsa unsaon sa pagtubag.
Gusto kong maghisgot mahitungod sa unsay buot ipasabut ni Apostol Pablo nga “hinonoa alang sa magtutuo, pagkinabuhi ingon nga mga panig-ingnan” (1 Timoteo 4:12)—unsa ang ipasabut sa pagtudlo ug pagpanalipod sa kamatuoran sa paagi nga gitinguha sa atong Langitnong Amahan samtang magpakita usab sa ehemplo sa pagtahud, kamaloloy-on ug lawom nga paghigugma nga gipakita ni Kristo; unsa ang gipasabut sa matinguhaong manalipod sa unsay atong nahibaloan nga tarong nga dili lang magpasagad og tira sa bisan unsa nga direksyon sa giisip nga kaaway.
Sa pagkatinuod, kanunay kini nga daw kadtong duha ka mga baruganan nagsumpaki, dili ba? Gitudloan kita nga kita kinahanglan nga makig-away “batok sa mga dautan nga espirituhanong panon” (Mga Taga-Efeso 6:12) sa tanan nga mga matang, nga kita kinahanglan “mobarug ingon nga mga saksi sa Dios sa tanan nga mga panahon ug diha sa tanan nga mga butang, ug diha sa tanan nga mga dapit” (Mosiah 18:9), ug kinahanglan gayud nga dili nato “igakaulaw ang Maayong Balita” (Mga Taga-Roma 1:16). Apan kita usab gitudloan nga atong likayan ang panagbingkil ug dili gayud “mokutaw sa mga kasingkasing sa mga tawo sa kasuko” (3 Nephi 11:30), nga kita dili lang “kinahanglan makigdinaitay kamo uban sa tanang tawo” (Mga Taga-Roma 12:18) apan nga kita kinahanglan usab aktibo nga “kab-uton ta ang makaamot sa pagdinaitay” (mga taga-Roma 14:19).
Busa unsaon nato sa pagtuman sa sugo nga gihatag sa Dios kanato sa pagbarug nga lig-on sa ebanghelyo ug tudloan ang uban sa kamatuoran nga dili mosangpot sa panagbingkil ug kasuko? Mura og ingon ana, ilabi na sa pagsulbad sa kasamtangan nga mga isyu, nga pagsulti og bisan unsa dali kaayong mosangpot sa kagubot ug panagbingkil. Sama nga kamo nasayud na kaayo, nga ang kalibutan karon ingon og gamay ra kaayo ang pailub ni bisan kinsa nga gustong mopahayag og usa ka panglantaw nga dili nahauyon sa bag-ong kaplag nga uso.
Kon ang ingon nga mga hagit moabut kanato, kamo ug ako may kalagmitan nga mobuhat sa duha ka mga butang: Kita mahimong molikay sa panaghisgut, mopili nga dili moapil diha sa palibut nga dili komportable o gani dili mahigalaon; o kita mahimong mapanagan-on sa kada punto sa debate kadtong makalingaw nga tan-awon apan kana makamugna og mas .dakong kasuko kay sa kahibalo.
Mas maayo pa nga tun-an usa kini diha sa atong mga hunahuna (tan-awa sa D&P 9:8) ug dayon paminaw pag-ayo sa langitnong direksyon. Andama ang imong kaisug ug gamita ang kahibalo nga anaa sa inyong kaugalingon.
Gusto kong mopahibalo og pipila ka mga butang nga kinahanglang ikonsiderar sa kanunay samtang kita nagbuhat sa atong labing maayo sa pagtudlo ug pagpanalipud sa pulong sa Dios samtang sa samang panahon magpakita og gugma ug kalooy ngadto sa tanang tawo?
Panalipdi ang Pulong
Una, maangkon nato ang kalampusan kon kita makigtambayayong sa kada usa. Sa panahon karon nabahin-bahin ang katawhan sa nagkalain-laing isyu nga ang usa ka pamahayag makapatingkag sa tawo ug kanunayng magpakita kon kinsay labaw sa usag-usa, sa kasagaran gamay ra ang makab-ut sa padayon nga panaglantugi sa init nga hilisgutan. Kana tinuod gayud sa social media, diin kita kinahanglan gayud nga mag-amping sa atong mga komentaryo sa usa ka sensitibo nga mga isyu sa katilingban dili mahilayo sa espiritu nga gusto ni Kristo nga atong madala.
Kon atong limitahan ang atong kaugalingon ngadto sa 140 ka mga karakter diha sa pag-post og mensahe sa social media, kasagaran dili kita masabtan. Kasagaran, mas daghan kaayo ang mahimo sa tinagsa-tagsa, mag-atubangay, sa ingon ang indibidwal magkasinabut sa usag usa. Mao gayud kana ang paagi nga gitudlo ni Presidente Thomas S. Monson kanato nga kita kinahanglan motabang ug moluwas—sa tinagsa tagsa. Ug kini mao kanunay nga paagi sa Manluluwas sa pagtabang ug pagtandog sa mga kinabuhi panahon sa Iyang pagpangalagad dinhi sa yuta.
Ikaduha, bisan og kita walay pagduha-duha nga malipay kaayo kon ang uban dali kaayong makakita sa kahayag ug mouyon sa padawat sa mga misyonaryo sa sunod nga adlaw, kana wala kinahanglana nga maoy una natong tumong. Ang atong unang tumong mao ang pagsabut kon unsay panglantaw sa uban—sa pagtahud kanila isip mga katawhan ug sa pagsabut sa ilang mga hunahuna. Niana lamang nga kita mahimong epektibo sa pakigsultihanay sa uban, aron mabuntog ang mubong pamahayag sa pag-akusar ug sayop nga pagsabut nga sa kanunayng mopatigbabaw sa atong mga hilisgutan.
Ikatulo, mangita kita og paagi nga kita morespeto sa managlahi nga mga panglantaw ug kauban gihapon sa pagpuyo sa katilingban. Kay sa yanong magpuyo sumala sa atong kaugalingong mga panglantaw nga walay pagyatak sa kagawasan sa uban, atong paningkamoton ang mas maayong butang—usa ka butang nga mao ang sukaranan importante diha sa kalitingban nga nagkadaiya ang pagtuo kon ang tanan kinahanglan matagad nga patas. Kita kinahanglang mobarug alang sa sukaranang mga katungod sa uban, sa pag-ila sa ilang katungod sa pagpahayag sa ilang mga opinyon ug mamulong sa unsay ilang gituohan, kon kita molaum sa uban nga molaban alang sa atong sukaranang mga katungod.
Sa katapusan, ang pagsabut sa usag usa panagsa rang motumaw sa usa ka panghitabo. Usa kini ka proseso—butang nga kanunayng magkinahanglan og igong panahon. Ang uban mahimong dili gayud modawat sa atong mga panglantaw, apan maningkamot kitang mahunong ang paggamit sa mga pulong sama sa mapihigon ug kasilag. Atong tan-awon ang usag usa isip maayo kaayo ug makatarunganon, bisan kon naghupot kita sa sukaranang panglantaw nga dili gayud dawaton sa uban.
Mobuhat Sama nga ang Manluluwas ang Nagbuhat
Samtang magsagubang kamo sa lisud nga mga sitwasyon diin manalipod kamo sa ebanghelyo ni Jesukristo, manghinaut ko nga kanunay ninyong hinumduman ang pagbuhat sama nga Siya ang Nagbuhat. Sama sa gitudlo ni Apostol Pablo, “pagkinabuhi ingon nga panig-ingnan sa mga tumutuo” mas labaw pa kay sa basta lang nagsunod sa mga baruganan sa ebanghelyo aron makita sa uban. Si Pablo nagsulti kanato sa piho nga paagi nga kadtong sama nga mga baruganan sa ebanghelyo kinahanglan gayud nga mahimong kabahin sa atong panag-istoryahanay, sa atong gugma alang sa uban, sa espiritu nga atong ipahayag ug sa hugot nga pagtuo nga nagpasabut kon kinsa kita (tan-awa sa 1 Timoteo 4:12).
Sa katapusan, wala gayuy kasungian tali sa duha ka mga baruganan sa ebanghelyo—kon tukma nga nasabtan—ang pagbarug sa kamatuoran samtang magtahud ug maghigugma usab sa uban. Ang atong lig-on nga kombiksyon sa kamatuoran dili makapahimo kanato nga mobuhat sa paagi nga walay pagtahud o masuk-anon ngadto sa uban. Apan sa samang higayon, ang atong tinguha sa pagpakita og kamabination ug gugma ngadto sa tanan kinahanglan dili gayud makapakunhod sa atong katungdanan sa pagbarug sa kamatuoran.
Kining duha ka mga baruganan mao lang gayud ang duha ka bahin nga ingon og managlahi apan konektado kaayo. Sa usa ka bahin mao ang atong katungdanan sa pagpasabut ug pagpanalipod sa doktrina sa Dios. Sa pikas nga bahin mao ang atong katungdanan sa pagbuhat sa usa ka Kristohanon nga paagi, kanunayng mopakita og pagtahud ug gugma.
Si Elder Dallin H. Oaks sa Korum sa Napulog Duha ka mga Apostoles mitudlo usab mahitungod niini nga paagi.
“Ang atong pagkamatugtanon ug pagtahud sa uban ug sa ilang pagtuo dili makapahuyang sa atong pasalig sa kamatuoran nga atong nasabtan ug pakigsaad nga atong gihimo. … Kita kinahanglang mobarug alang sa kamatuoran, bisan kon kita nagmatugtanon ug nagtahud sa mga pagtuo ug mga ideya nga lahi sa atoa ug sa mga tawo nga naghupot niini. …
“Kining dinasig nga pasidaan nagpahinumdom kanato nga alang sa mga tawo nga nagtuo sa hingpit nga kamatuoran, ang pagkamatugtanon sa batasan adunay duha ka bahin. Ang pagkamatugtanon o pagtahud mao ang usa ka bahin niini, ug ang kamatuoran mao ang pikas bahin.”1
Sa kalibutan nga dali kaayong nabahin bahin ug mas mabingkilon—diin ang mga pagpang-atake naggikan sa bisan asang dapit—gusto kong mohagit kaninyo sa pagtimbang-timbang kon unsa na ang inyong nabuhat niining duha ka dapit? Sa matag sitwasyon nga motunga sa inyong kinabuhi, pangutan-a ang inyong kaugalingon kon unsaon ninyo sa pagtudlo sa labing maayo ug pagpanalipod sa doktrina sa ebanghelyo ni Jesukristo samtang magpakita og gugma, kamabination ug pagsabut ngadto sa tawo kinsa wala modawat sa doktina.
Sa inyong pagbuhat sa ingon, ako mopamatuod nga kamo makabaton sa panabang ug giya sa Langitnong Amahan. Inyo Siyang mabati nga naggiya kaninyo, naghatag og mga hunahuna, mga pagbati diha sa inyong kasingkasing, ug mga pulong diha sa inyong mga ba-ba sa tukmang higayon nga kini gikinahanglan. Iyang Espiritu mangulo ug mogiya kaninyo, sa pag-usab kaninyo ngadto sa usa ka tinuod nga mga “ehemplo sa mga tumutuo”—dili lamang kadtong nagsunod sa ebanghelyo ni Jesukristo apan sa tanan usab kinsa nanalipod ug mipasabut sa doktrina sa usa ka lig-on apan mahigugmaon ug malukpanon nga paagi.