Mga Bata nga adunay Kasingkasing
Pagpintal og Gugma
Hi! Lucy ang akong ngalan!
Nagpuyo ko sa Utah, USA, uban sa akong pamilya. Ganahan ko nga magpintal, ug ganahan ko nga mopakigbahin og gugma ngadto sa uban.
Nag-anam Kalig-on
Si Lucy natawo nga adunay sakit nga nakapahimo sa iyang mga kaunuran nga dili maayong molihok. Maglisud siya sa pagtulon ug pag-istorya. Mosakay siya og espesyal nga bisikleta ug mag-hike uban sa iyang pamilya sa pagtabang kaniya nga malig-on.
Pagpintal
Ang mama ni Lucy usa ka artist. Sa dihang usa pa ka masuso si Lucy, ganahan siyang motan-aw sa iyang mama nga magpintal. Karon ang iyang mama nagtudlo usab kaniya sa pagpintal. Ganahan si Lucy nga mogamit og mga kolor nga nindot tan-awon nga mag-uban, ug mainampingon kaayo siyang magpintal. Gusto niya nga sa umaabut nga adlaw aduna siyay art studio uban sa iyang mama.
Ang Kasingkasing ni Lucy
Si Lucy ug ang iyang mga magulang nga babaye miapil og contest sa art sa ilang eskwelahan mahitungod sa paghimo sa kalibutan nga mas maayong dapit. Nasayud si Lucy nga gusto niyang mopintal og kasingkasing. Miingon siya, “Ang kalibutan mahimong mas maayong dapit kon aduna kitay gugma sa atong mga kasingkasing.”
Usa ka Mahigugmaon nga Igsoong Babaye
Sa dihang nasayran ni Lucy nga ang iyang painting nakadaog sa contest, giingnan niya ang iyang magulang nga babaye nga si Ruby, “Nindot kaayo ang imoha. Gusto unta nako nga ikaw ang midaog imbis nga ako.” Si Lucy dili makatuo dihang iyang nasayran nga midaog usab ang iyang painting sa contest alang sa tibuok Estados Unidos!
Usa ka Espesyal nga Paagi sa Pagpakigsulti
Lisud alang kang Lucy ang pagsulti sa uban kon unsay iyang gibati. Apan gusto niyang motabang sa mga tawo nga mobati nga gihigugma ug malipayon. Ug ang iyang mga painting nakahimo niana!