Hangtud sa Sunod Natong Panagkita
Usa ka Leksyon gikan ni Dandy
Gikan sa Conference Report, sa Okt. 1968, 87; ang punctuation ug capitalization gi-moderno.
Sama sa ubang batan-ong mga tawo, ang akong kabayo nga si Dandy molugnot kon higtan.
Image © iStock/Thinkstock
Nakabaton ko makausa ug malipayon kaayong mibansay sa [usa ka maayong liwat nga nati nga ginganlan og Dandy]. Kini adunay maayong barug, limpyo, nindot og mata, maayong pagkabalanse, ug sa kinatibuk-an, usa ka pinili nga [hayop]. Kon may mokabayo monunot ra kini, masulundon kaayo, ug mauyon-uyonon nga pagkakabayo. Kini ug ang akong iro, nga si Scotty tinuod nga mga kauban. Ganahan ko sa paagi nga siya moadto ngadto sa usa ka butang nga gikahadlokan niini. Kini adunay pagsalig nga kon buhaton niini ang akong mando, dili kini maangol.
Apan si Dandy molugnot kon higtan. Maglangas kini kon ihigut ug kitkiton ang ang pisi hangtd makabuhi kini. Dili man kini molayas; apan gusto lang kini nga mahimong gawasnon. Naghunahuna nga mao usab ang gibati sa ubang kabayo, mopadayon kini sa pagbadbad sa mga pisi sa uban. Dili kini ganahan nga matanggong sa turil diha sa katugwayanan, ug kon siya makakita og koral nga gialambre lang, maampingon niya kining itulod sa iyang tiil hangtud nga makagawas. Pipila ka higayon nga ang akong mga silingan mabination ra usab nga mopabalik niini sa nataran. Nakat-on pa gani kini sa pag-abli sa ganghaan. Bisan tuod [kanunay kining makaguba] makasaput ug usahay gasto kaayo, nakadayeg ko sa kalantip ug kaigmat niini.
Apan ang iyang kakuryuso ug tinguha sa pagsuhid sa kasilinganan ang nagdala niini ug kanako ngadto sa kasamok. Kausa diha sa highway nadasmagan kini og sakyanan, nga ang resulta nadaot ang makina, nadaot ang kabayo, ug gamay, bisan og dili grabi, naangol ang drayber.
Pagkaayo gikan niana, ug ganado gihapon kining molaag, gilibut niini ang tibuok utlanan. Iyang nakaplagan ang mga ganghaan nga gialambrihan. Mao nga taud-taud kaming nagtuo nga nasiguro ang pagkabutang ni Dandy sa kasagbutan.
Usa ka adlaw, hinoon, usa ka tawo nga mibiya sa ganghaan wala maalambri. Nakamatngon niini, naablihan kini ni Dandy, midala og [laing kabayo] uban kaniya, ug ang duha mibisita sa umahan sa silingan. Miadto sila sa usa ka karaan nga balay nga gihimong kamalig. Ang kakuryuso ni Dandy miaghat niya sa pag-abli sa pultahan. Sumala sa iyang gihunahuna, dihay usa ka sako sa lugas. Pagkaanindot sa nakit-an! Oo, ug pagkadakong trahedya! Ang lugas gibutangan og hilo ipaon sa mga ilaga! Pipila ka minuto si Dandy ug ang iyang kauban mibati na og panagsa nga mga kasakit, ug wala madugay nangamatay.
Kadaghanan sa mga kabatan-onan susama ni Dandy! Dili sila mga dautan; Dili gani tuyo nila nga mohimo og sayop; apan dili sila maghunahuna, puno sila sa kalagsik; puno sila sa kakuryuso, ug gusto nilang dunay mabuhat. Sila usab [dili mahimutang] ubos sa pagpugong, apan kon sila himoon nga ma-busy, magiyahan sa hustong paagi, pamatud-an nila nga sila masulundon ug angayan; kon pasagdaan nga maglatagaw nga walay maggiya, silang tanan usab kanunayng molapas sa mga baruganan nga matarung, nga kasagaran modala kanila sa kadautan, kadaut, ug gani kamatayon.