Ang Gahum sa Pagtudlo sa Doktrina

Ni Douglas D. Holmes

Unang Magtatambag sa Kinatibuk-ang Kapangulohan sa Young Men

Sa unsang paagi nga atong madugangan ang atong abilidad sa pagtudlo sa doktrina uban sa gahum ug awtoridad?

Isip bag-ong presidente sa misyon, miabut ko sa gi-assign kanamo nga misyon uban sa dakong kahinam sa mga miting sa misyonaryo nga puno sa Espiritu sama sa akong nahinumduman isip batan-ong misyonaryo. Apan human makompleto ang among unang hugna sa mga zone conference, nasagmuyo ko. Ang Espiritu dili sama ka abunda sa akong gilauman, ug pipila ka mga misyonaryo morag dili interesado.

Samtang ang akong asawa ug ako namalandong ug nag-ampo kon unsaon nga mahimong mas espirituhanon ang among kinabuhi ug ang kinabuhi sa mga misyonaryo, nagiyahan kami nga motutok sa pagtudlo sa doktrina ni Kristo ug sa gahum niini sa pag-usab kanato. Samtang gisunod namo kini nga plano sa misunod nga mga bulan, pipila ka mga misyonaryo miduol kanako nga mipakigbahin og mga pagmahay sa nangaging mga kinaiya ug mipahayag og tinguha nga mas magmakugihon sa pagtuman sa mga patakaran sa misyon ug pagsunod sa ebanghelyo.

Unsa ang Hinungdan Niini nga Kausaban?

Si Presidente Boyd K. Packer (1924–2015), Presidente sa Korum sa Napulog Duha ka mga Apostoles, kanunay nga mitudlo: “Ang tinuod nga doktrina, unya nasabtan, mopausab sa mga kinaiya ug pamatasan. “Ang pagtuon sa mga doktrina sa ebanghelyo mas dali nga makapalambo sa pamatasan kay sa pagtuon bahin sa pamatasan aron mapalambo kini.”¹ Nasayud ako niini kaniadto, apan pagkahuman niining kasinatian uban sa akong mga misyonaryo, duna na koy mas dakong pagsabut sa gahum ug hiyas sa pulong sa Dios nga mousab og mga kasingkasing (tan-awa sa Alma 31:5). Samtang nag-uswag ang among misyon ug nagpadayon kami sa pagtutok sa pagtudlo sa doktrina, ang ilang mga kasingkasing nausab ug mao usab ang amoa. Tungod kay nakasabut kami sa doktrina, nakasabut kami sa “ngano” sa pagkamasulundon, dili lamang sa “unsa” ug “unsaon.”

Nganong Ang Pagtudlo Sa Doktrina Gamhanan Kaayo?

Si Presidente Henry B. Eyring, Unang Magtatambag sa Unang Kapangulohan, mitudlo nga “ang pulong sa Dios mao ang doktrina nga gitudlo ni Jesukristo ug sa Iyang mga propeta.”² Ang tinuod nga doktrina nakasentro kang Kristo. Ang Iyang doktrina, kon gitudlo ug gidawat pinaagi sa Espiritu, kanunay nga mopalambo og pagtuo kang Jesukristo (tan-awa sa Alma 32:28–43; Moroni 7:25, 31–32).³ Ang hugot nga pagtuo mao “ang hinungdan sa tanang mga buhat” o kinaiya.⁴ Samtang ang Amahan ug Anak gipadayag ngari kanato pinaagi sa mga pulong nga puno sa Espiritu, motubo ang atong pagtuo, ang atong mga tinguha sa paghinulsol ug pagsunod madugangan, ug kita mausab.

Ang gahum sa pag-usab og mga kasingkasing wala diha sa magtutudlo apan diha “sa hiyas sa pulong sa Dios” (Alma 31:5). Ang mga letra diha sa pahina o mga tingog nga mogawas sa ba-ba walay natural nga gahum nga mousab og mga kasingkasing, apan kon ang tinuod nga mga pulong dasigon sa Balaang Espiritu sa Dios, makadala kini og dakong kausaban sa kasingkasing (tan-awa sa 1 Mga Taga-Corinto 2:4; 1 Mga Taga-Tesalonica 1:5; Mosiah 5:2; Alma 5:7; D&P 68:4). Kon atong itudlo ang Iyang pulong pinaagi sa Espiritu, ang Espiritu Santo modala sa kahayag ug kamatuoran ngadto sa kasingkasing sa nagkat-on (tan-awa sa Juan 6:63; 2 Nephi 33:1; D&P 84:45). Kon ang mga nagkat-on moabli sa ilang mga kasingkasing sa pagdawat sa pulong, ang Espiritu molamdag sa ilang mga hunahuna ug mousab sa ilang mga kasingkasing—sa ilang mga motibo ug mga kinaiya.

Ang Basahon ni Mormon usa ka gamhanan nga saksi nga “ang tinuod nga doktrina, unya nasabtan, mopausab sa mga kinaiya ug pamatasan.” Ania ang pipila lang ka mga ehemplo.

Si Haring Benjamin mitudlo sa mga pulong nga iyang nadawat gikan sa usa ka anghel ngadto sa iyang katawhan, ug ang Espiritu midala og dakong kausaban sa ilang mga kasingkasing nga sila “wala nay hilig sa pagbuhat og dautan, apan sa pagbuhat og maayo sa kanunay” (Mosiah 5:2).
Samtang si Alma ang Tigulang mitudlo sa mga katawhan, “ang ilang mga kalag nalamdagan pinaagi sa kahayag sa walay katapusan nga pulong,” ug sila naluwas (Alma 5:7; tan-awa usab sa bersikulo 9).
Ang mga anak nga lalaki ni Mosiah, “tungod sa gahum sa iyang pulong” (Alma 26:13), mitabang sa pagdala og hingpit nga kausaban sa kasingkasing sa liboan ka mga Lamanite (tan-awa sa Alma 17:14–17; 53:10).

Unsaon Nato sa Paglambo?

Adunay mga butang nga mahimo natong tanan aron madugangan ang atong abilidad sa pagtudlo sa doktrina uban sa gahum ug awtoridad (tan-awa sa Alma 17:3; Helaman 5:18). Dili kinahanglang mokuha kita og doctorate degree sa pagtudlo o sa relihiyuso nga mga pagtuon, apan kinahanglan kitang maningkamot og maayo. Ang mosunod nga mga ideya makatabang samtang magtinguha kamo sa pagdapit sa gahum sa doktrina diha sa inyong pagtudlo.

Ampingi ug pagpakabuhi pinaagi sa pulong. Aron makatudlo sa doktrina uban sa gahum ug awtoridad, kinahanglan kitang mahibalo sa doktrina. Ang Manluluwas misulti ni Joseph ug Hyrum Smith nga sa dili pa sila magtinguha sa pagpahayag sa Iyang pulong, kinahanglang unahon nila ang pagtinguha nga makabaton niini. Niana sila makabaton sa Iyang Espiritu ug sa Iyang pulong, “ang gahum sa Dios ngadto sa pagkabig sa mga tawo” (D&P 11:21). Kini nga matang sa pagsabut “nagkinahanglan og labaw kay sa pagpakli-pakli lang [nga pagbasa],” sama sa gitudlo ni Presidente Howard W. Hunter (1907–95). Nagkinahanglan kini og inadlaw-adlaw, mapahinunguron nga pagtuon.⁵

Ang pagtuon lamang dili paigo. Kon kinahanglan natong mahibalo sa doktrina, kinahanglan gayud natong mosunod niini (tan-awa sa Juan 7:17; Alma 12:9). Ang makugihong pagtuon ug paggamit sa mga kasulatan ug sa mga pulong sa buhing mga propeta mao ang paagi nga kita makabaton og gahum sa Iyang pulong “[diha] kanato” (Alma 26:13; tan-awa usab sa Alma 17:2–3; 32:42).
Itudlo ang doktrina. Kinahanglang mag-amping gayud kita nga ang tinuod ra nga doktrina ang itudlo. Ang Espiritu Santo mao ang “Espiritu sa kamatuoran” (Juan 15:26). Ang mga nagkat-on mahimong mobati sa Iyang nanghimatuod nga saksi kon kita mopahayag “sa walay lain nga mga butang gawas sa gitudlo sa mga propeta ug mga apostoles” (D&P 52:36) ug molikay sa pagpangagpas ug personal nga interpretasyon. Usa sa labing maayong pamaagi sa paglikay nga mahaduol sa sayop nga doktrina mao ang paghimo sa atong pagtudlo nga yano (tan-awa sa Mosiah 25:22; 3 Nephi 11:39–40). Dugang pa, kinahanglang ikonektar nato ang mga komentaryo ug mga kasinatian nga gipakigbahin sa mga sakop sa klase ngadto sa mga doktrina nga atong gitun-an.
Pagtudlo pinaagi sa Espiritu. Kinahanglan natong hinumduman nga ang pagtudlo dili gayud angay nga nakatutok kanato. Kinahanglang bug-os ang atong tinguha ngadto sa himaya sa Dios. Dili kita angay nga molingaw o mopakita sa atong kaugalingon nga eksperto. Gisultihan ni Pablo ang mga Taga-Corinto nga siya uban kanila “diha sa kahuyang ug sa labihan nga kahadlok ug pagkurog” (1 Mga Taga-Corinto 2:3; tan-awa usab sa bersikulo 4). Morag wala diha migamit si Pablo og maayong pagkapraktis ug binuhat nang daan nga presentasyon.

Aron mahimo kitang instrumento sa mga kamot sa Dios sa pag-usab og mga kasingkasing, kinahanglang dili kita makabalda sa Espiritu ug atong tugutan ang Espiritu Santo nga motudlo sa kamatuoran. Samtang mangandam kamo sa pagtudlo, hinumdumi nga ang butang nga labing importante sa inyong klase mao ang presensya sa Espiritu Santo. Buhata kutob sa mahimo sa pagdapit sa Espiritu nganha sa inyong klase. Samtang motudlo kamo, ayaw kahadlok nga mohunong aron maminaw ug mobati sa giya sa Espiritu.

Samtang magpakabusog kita ug magpakabuhi sumala sa matag pulong sa Dios ug motudlo sa tinuod lamang nga doktrina pinaagi sa gahum sa Espiritu Santo, atong madiskubrihan ang Ginoo nga nag-usab sa atong kasingkasing ug sa kasingkasing niadtong atong gitudloan. Nagpasalamat ko sa Dios matag adlaw alang sa kausaban nga gidala sa Iyang pulong sa akong kasingkasing ug alang sa mga magtutudlo nga mitudlo kanako sa tinuod nga doktrina uban sa gahum ug awtoridad.