Gikan sa Natad sa Misyon
Matinud-anong Nagduha-duha, Napanalanginan Pag-ayo
Ang tagsulat nagpuyo sa Guerrero, Mexico.
Isip usa ka misyonaryo sa Mexico, ako adunay kasinatian nga nakatabang kanako nga makakita sa “maayong bunga” nga moabut kon atong palihukon ang atong hugot nga pagtuo.
Usa ka misyonaryo nga kalihokan giplano sa stake diin nagserbisyo ko. Ang akong kompanyon ug ako maoy mopasabut sa baruganan sa ebanghelyo ngadto sa mga investigator nga motambong. Apan sa dihang miabut mi sa meetinghouse, among nadiskubrihan nga wala pa gyuy miabut nga mga investigator. Imbis magtudlo sa mga baruganan sumala sa among giplano, gihangyo kami sa pag-adto sa dalan ug moimbitar sa mangagi nga mga tawo sa pagsulod ug pag-apil sa kalihokan.
Sa pagkatinuod, misulod sa akong hunahuna, “Dili kini magsilbi.” Akong gibati nga mausik ang among mga paningkamot—nga walay usa nga modawat sa imbitasyon sa pag-apil sa kalihokan, ilabi na nga mubo ra ang panahon sa pagpahibalo.
Apan nakasabut kami sa kaimportante sa pagkamasulundon, mao nga ang akong kompanyon ug ako misulay sa pag-imbitar og mga tawo sa pag-apil. Wala madugay, usa ka babaye ug ang iyang anak nga babaye ug ang uyab sa iyang anak nga babaye miagi. Miimbitar mi nila sa pagsulod. Sa sinugdanan nagduha-duha sila, apan sa katapusan midawat sila sa imbitasyon ug miapil sa grupo sa mga tawo sa sulod. Natingala ko apan nalipay kaayo.
Gisugdan ang kalihokan: usa ka pasundayag sa musika kabahin sa ebanghelyo. Ang kalihokan milungtad og sobra sa usa ka oras. Nabalaka ko nga ang among mga bisita masuko tungod kay dugay kaayo nahuman, apan nag-ampo ko sa akong kasingkasing nga mamaayo ra ang tanan.
Pagkahuman sa kalihokan, miduol ko nila sa pagpangayo og pasaylo sa pagkuha og daghan sa ilang panahon. Sa wala pa ko makasulti ngadto kanila, ang babaye miingon, “Salamat. Salamat kaayo. Maanindot kaayo kadto. Salamat.”
Natingala ko; nagpasalamat sila kanamo sa kasinatian, ug sila wala maghunahuna sa oras. Talagsaon kaayo kadto, ug dihay kalipay sa akong kasingkasing. (Ug kon hunahunaon ako miingon nga ang pag-imbitar og mga tawo sa dalan dili magsilbi!) Ang babaye gusto nga masayud og dugang kabahin sa Simbahan ug sa pagtambong sa atong mga miting sa Dominggo.
Nakakat-on ko og dako gikan niining kasinatian: adunay gamay lang nga hugot nga pagtuo, bisan kon kini walay bili labaw pa kay sa usa lang ka tinguha sa pagtuo, nga itugyan makahatag og dako nga mga resulta (tan-awa sa Alma 32:27–28).
Kini nga kasinatian nakapausab sa akong kinaiya sa nahibilin sa akong misyon. Gikan niana nga panahon, sa matag kalihokan sa misyonaryo, ako makakita sa mga bunga sa akong mga kahago kon ako maningkamot uban sa paglaum ug uban sa mata sa hugot nga pagtuo.
Kon kita adunay hugot nga pagtuo, bisan kon naghunahuna kita nga kini dili mahitabo, makaangkon kita og nindot nga mga resulta. Unsay atong nakita nga imposible dili imposible alang sa Dios.