Mensahe sa Visiting Teaching
Ang Makaabag nga Gahum ni Jesukristo ug ang Iyang Pag-ula
Tun-i sa mainampuong paagi kining materyal ug pagtinguha sa inspirasyon aron masayud unsay angay nga ipakigbahin. Sa unsang paagi ang pagsabut sa katuyoan sa Relief Society nag-andam sa mga anak nga babaye sa Dios alang sa mga panalangin sa kinabuhing dayon?
“Mahimo ko ang tanang butang pinaagi kaniya nga nagapalig-on kanako” (Mga Taga-Filipos 4:13). “Bisan og kitang tanan adunay mga kahuyang, kita makabuntog niini,” miingon si Presidente Dieter F. Uchtdorf, Ikaduhang Magtatambag sa Unang Kapangulohan. “Sa tinuod pinaagi sa grasya sa Dios nga, kon kita magpaubos sa atong mga kaugalingon ug magbaton og hugot nga pagtuo, ang mahuyang nga mga butang malig-on.”1
Ang atong Manluluwas nag-ingon diha sa Doktrina ug mga Pakigsaad, “Ako molakaw diha sa inyong atubangan. Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (D&P 84:88).
“Si Nephi maoy usa ka ehemplo sa usa ka tawo kinsa nahibalo, nakasabut, ug nagsalig sa makaabag nga gahum sa Manluluwas,” miingon si Elder David A. Bednar sa Korum sa Napulog Duha ka mga Apostoles. “Ang mga igsoon ni Nephi migapos kaniya ug miplano sa iyang kamatayon. Palihug timan-i ang pag-ampo ni Nephi: ‘O Ginoo, sumala sa akong hugot nga pagtuo diha kanimo, luwasa ako gikan sa mga kamot sa akong igsoon nga mga lalaki; oo, gani hatagan mo ako sa kusog nga ako makabugto niini nga mga pisi diin ako gigapos’ (1 Nephi 7:17; emphasis gidugang).
“… Si Nephi wala mag-ampo nga usbon ang iyang mga kahimtang. Hinoon, nag-ampo siya alang sa kalig-on sa pag-usab sa iyang mga kahimtang. Ug ako nagtuo nga nag-ampo siya niining paagiha tungod kay nakahibalo, nakasabut, ug nakasinati siya sa makaabag nga gahum sa Pag-ula.
“Wala ko magtuo nga ang mga gapos nga gigapos ni Nephi nangabadbad lang gikan sa iyang mga kamot ug pulso. Hinoon, nagtuo ko nga gipanalanginan siya og determinasyon ug personal nga kusog lapas sa natural niyang kapasidad, nga siya ‘pinaagi sa gahum sa Ginoo’ (Mosiah 9:17) naningkamot ug milubag ug mibira sa mga pisi, ug sa katapusan ug sa tinuoray naabagan sa pagbugto sa mga gapos.”2
Dugang nga mga Kasulatan ug Impormasyon
Hugot nga Pagtuo Pamilya Kahupayan