Usa ka Nindot nga Pagbati
Ang tagsulat nagpuyo sa Colorado, USA.
Nakasala si Paulo. Unsay iyang mahimo?
Pagkahuman og haw-as ni Paulo gikan sa tubig, siya ug si Papa nag-ilis og uga nga mga sinina. Dayon si Papa ug si Lolo ug ang bishop mipandong sa ilang mga kamot sa iyang ulo ug mikumpirmar kaniya. Karon usa na siya ka miyembro sa Ang Simbahan ni Jesukristo sa mga Santos sa Ulahing mga Adlaw
“Nindot kaayo ang ako gibati,” miingon si Paulo. Iyang gihikap ang iyang kasingkasing. “Dinhi.”
Gigakos siya pag-ayo ni Mama. “Tungod kana kay nadawat nimo ang gasa sa Espiritu Santo sa dihang gikumpirmahan ka.”
Mitando si Paulo. Dili siya gusto nga mobuhat og bisan unsa nga makapawagtang nianang nindot nga pagbati.
Apan pagkasunod adlaw, ang iyang manghud nga si Carlo miguba sa iyang dulaan nga eroplano. Nagtigum si Paulo sulod sa usa ka bulan aron mapalit kini!
“Tan-awa unsay imong gibuhat!” Misinggit si Paulo. “Nganong manghilabut man ka sa akong mga butang?”
“Pasayloa ko,” miingon si Carlo. Mga luha midagayday sa iyang aping. “Tingali mahimo pa nato ning ayuhon.”
“Dili na ni maparehas sa una!”
Midagan si Carlo gikan sa kwarto nga naghilak.
Lain ang gibati ni Paulo. Nasayud siya nga si Jesus dili mosinggit o masuko. Mobati pa kaha siya pag-usab og sama niadtong iyang gibati human sa iyang bunyag?
“Misaad ko nga maningkamot ko nga mahisama ni Jesus,” iyang giingnan si Mama, nga nagkurog ang iyang tingog. “Apan nakasala na dayon ko.”
“Aduna kay nabuhat nga sayop,” hinay nga miingon si Mama. “Apan si Jesus mihatag kanato og paagi nga mabatunan nato pag-usab ang Espiritu Santo human kita makasala.”
Nasayud na si Paulo unsay iyang isulti. “Nakahibalo ko. Paghinulsol. Kinahanglang mangayo ko og pasaylo.”
Mitando si mama. “Dayon kon moambit ka sa sakrament, imong mabag-o ang saad nga imong gihimo sa pagsunod ni Jesus. Ug mamahimo kang sama ka limpyo niadtong pagkahuman nimo nga nabunyagan ug nakumpirmahan.”
Gipangita ni Paulo si Carlo. “Pasayloa ko nga gisinggitan tika,” miingon siya. “Ayuhon natong duha ang eroplano.”
Mipahiyom si Carlo, ug gibati ni Paulo nga daw iyang gibuhat ang unsay buhaton ni Jesus. Sa dihang nag-ampo siya nianang gabhiona, mihangyo siya sa Langitnong Amahan nga pasayloon siya ug tabangan siya nga mas buotan ngadto ni Carlo. Usa ka hilum nga kalinaw misulod sa iyang kasingkasing.
Nianang Dominggo sa simbahan, gihatagan ni Paulo og maayong pagtagad ang mga pag-ampo sa sakrament. Naminaw siya og maayo sa mga pulong. Sa dihang mikuha siya sa pan ug tubig, iyang gibati ang gugma sa Langitnong Amahan alang kaniya. Sakto si Mama. Kadtong nindot nga pagbati mibalik!