Mga Tingog sa mga Santos sa Ulahing mga Adlaw
Nakit-an Ako sa Akong mga Visiting Teacher
Sa dihang usa pa ako ka batan-ong inahan uban sa usa ka dos anyos nga anak nga lalaki, nagpuyo ko kadiyot sa Santa Catarina, Brazil, ug pipila ra ka mga miyembro sa Simbahan ang akong nailhan. Nagpuyo ko sa usa ka nagtubo apan hilit nga dapit, mao nga dili kaayo daghan nga mga silingan duol sa akong balay.
Usa ka adlaw gibati nako nga nasakit ug dali nga nadehydrated. Sa wala madugay dili na ko makabarug aron sa pag-atiman sa akong anak o pag-adto sa labing duol nga telepono sa pagtawag sa akong bana. Nagsugod ko sa pag-ampo, apan sa matag higayon nga mosulay ko nga mobarug, gibati nako nga mas naluya.
Wala madugay ang akong mga visiting teacher nanuktok sa akong pultahan. Nakahibalo dayon sila nga gigiyahan sila sa Langitnong Amahan sa pagpangita nako. Giandaman ko nila og tambal, mitabang pag-atiman sa akong anak, ug gihugasan ang mga plato. Dayon miingon sila nako nga taud-taod na silang naglakaw sa pagpangita sa akong balay ug kaundangon na unta, apan ang Espiritu misulti kanila nga dili moundang.
Sa pagbiya na nila, arang-arang na ang akong pamati. Sa wala pa sila mobiya, nag-ampo kami.
Wala siguro sila masayud kon unsa kadako ang ilang natabang ug pag-amuma nako sa espirituhanong paagi sa ilang ehemplo sa pagkamabination ug kawalay langan sa pagpaminaw ug pagpatalinghug sa tingog sa Espiritu.