Mga Profile sa Young Adult
Tagamtama ang Kalibutan sa South Africa
Ang tagsulat nagpuyo sa Utah, USA
Ang lain-laing mga kaagi ug kultura dili makapugong sa mga Santos sa South Africa sa pag-atiman sa usag usa.
Init kadto nga Sabado sa buntag sa Neighborgoods Market. Maglakaw ka ilawom sa mabulukong mga payong nga naglinya gawas sa entrada ug maminaw sa live nga musika samtang magpili ka og lamian kaayong pagkaon. Ang tradisyonal nga pagkaon sa South Africa nga sulod sa gamayng kaldero—pesto, kinhason, mga utanon, mga linutong sud-an—gusto nimong tilawan ang tanan.
Maayong Pag-abut sa Johannesburg.
“Usa kini ka mainiton, maabiabihong dapit,” miingon si Ross Mpye, 28. Ang kalagsik sa “Johanesburg” mopatingala usahay sa mga bisita, kinsa dili magdahum og tag-as kaayong mga building. “Wala kay makitang kuyaw nga nagsuroy-suroy sa kadalanan,” miingon si Ross.
Estudyante sa unibersidad nga nagtuon og communications ug diborsyado nga inahan sa singko anyos nga anak nga lalaki nga si Nate, si Ross nagtrabaho isip production support analyst. Gikan sa kamaayo niyang motilaw ngadto sa iyang mga paningkamot nga makaserbisyo sa uban, ganahan siya sa pagpanimpalad, pag-abi-abi, ug matinud-anon sa inadlaw niyang kinabuhi.
Ang mga Santos sa Johannesburg nagtinabangay sa usag usa ug sa mga tawo sa ilang palibut. Sama pananglit, dihang ang balay sa higala ni Ross nga si Tumi gibahaan, daghang higala gikan sa simbahan mitabang og habwa sa tubig ug midasig sa pamilya. “Sinugdanan kadto sa pagkausab sa mama ni Tumi nga dili miyembro,” mipasabut si Ross. “Nagsugod siya sa pakigkita sa mga misyonaryo ug karon miyembro na siya ug teacher na sa Relief Society.” Ang sama niana nga mapinanggaong pag-atiman makonsiderar nga usa ka naandan, samtang angmga miyembro sa South Africa nagtagad sa usag usa isip mga igsoon. “Gihunahuna namo sama nga kini among problema,” miingon si Ross.
Sama sa nahibaloan ni Ross, kini nga pagbati ngadto sa uban gipakita sa Langitnong Amahan ug ni Jesukristo isip ehemplo. “Kini mao ang matang sa gugma nga gipanalangin kanato sa Langitnong Amahan. Siya nakasabut ug nakahibalo sa akong kalipay ug kasub-anan isip usa ka batan-ong tawo nga karon nag-atubang sa mga hagit nga Iyang gisigurado nga akong mabuntog,” miingon siya.
Ang relasyon ni Ross sa Manluluwas nakaapekto sa iyang kinabuhi sa daghang paagi, gikan sa iyang pakig-inter-aksyon sa uban sa iyang trabahoan ngadto sa iyang personal nga pagtuon. “Ang palibut sa trabahoan lisud,” miingon siya. “Ang ubang tawo mamalikas ug ang uban mangilad, nagtuo nga wala kini sangputan. Napanalanginan ko nga nakabaton og mga baruganan sa ebanghelyo ug sa mga pagtulun-an sa mga propeta sa akong kinabuhi. Kon sugdan nako ang akong adlaw og pagtuon sa kasulatan ug pag-ampo, nakatabang kini nga maanaa kanako ang Espiritu sa tanang panahon. Kon mag-atubang ko og mga tintasyon, ang hinay hinagawhaw nga tingog magpahinumdom nako kon kinsa ko ug unsay akong gituohan. Nakatabang kini nga magpabilin kong matinud-anon sa akong mga sumbanan.”
Ang Neighborgoods Market nagrepresentar sa espiritu sa Johannesburg cosmopolitan. Alang kang Ross, ang kamatuoran sa ebanghelyo nagrepresentar og mas lawom nga butang—ang saad sa kinabuhing dayon.