7 ka mga Butang nga Atong Gikahadlokan mahitungod sa Paghinulsol
Ug Nganong dili Kita Angayng Mahadlok
Sa kanunay mahadlok kita sa paghinulsol. Apan mahimo kitang magmaisugon diha sa kamatuoran.
Nakahibalo kita nga ang matag tawo nagkinahanglan sa paghinulsol (tan-awa sa Mga Taga-Roma 3:23). Nakahibalo kita nga kinahanglan kita nga maghinulsol aron makakaplag og tinuod nga kalipay pinaagi sa gahum sa maulaong sakripisyo ni Jesukristo (tan-awa sa Alma 36:24). Nakahibalo usab kita nga ang pagbaliwala sa paghinulsol usa ka dili maayo nga ideya (tan-awa sa Alma 34:32–34). Apan daghan kaayo nato ang nagbuhat niana. Ngano man? Mas nakahibalo kita, dili ba?
Usa sa posibling tubag mao ang kahadlok. Nakahimo man kita og seryoso nga sala nga kinahanglan natong ikumpisal sa atong bishop o duna kitay pipila ka ginagmayng mga nabatasan, kinaiya, o mga gawi nga makapugong kanato nga mahimong hingpit nga mapasaligon sa ebanghelyo sa Ginoo ug sa mga sumbanan niini, ang kahadlok makapugong kanato gikan sa pagbuhat sa unsay atong gikinahanglang buhaton aron sa pag-usab sa atong kinabuhi.
Ania ang pito ka mga kahadlok nga makahimo kanato sa pagsalikway sa paghinulsol, ingon man ang pipila ka mga ideya ug mga pagtulun-an nga makatabang kanato nga magmaisugon ug pagbuhat sa makahatag kanato og kalinaw ug kalipay.
1. Kahadlok nga Maulawan
Kon akong sultihan ang akong bishop sa akong nahimo, mahisagmuyo kaayo siya—ug ako maulawan og maayo. Unsa kaha kon akong sultihan ang akong mga ginikanan? Unsa kaha kon makahibalo ang uban?
Adunay mas ngil-ad pa nga mga butang kay sa pagkaulaw, sama sa espirituhanon nga mga palas-anon sa wala masulbad nga sala ug sa pagkawala sa pakig-uban sa Espiritu Santo. Ang bisan unsang mga pagbati sa pagkaulaw nga anaa ninyo sa pagkumpisal ngadto sa inyong bishop molungtad lamang sa mubo nga panahon ug unya hingpit mahanaw pinaagi sa kahupayan ug kalipay. Si bisan kinsa nga mikumpisal ngadto sa ilang bishop makapamatuod niini.
2. Kahadlok sa mga Sangputanan
Kon akong sultihan ang bishop sa akong mga sala, tingali adunay sangputanan—dili maka-ambit sa sakrament, dili makapanalangin o maka-pass sa sakrament, dili makaadto sa misyon kon gusto ko. Makaguba kaayo kana sa akong kinabuhi.
Hinumdumi nga ang positibong mga sangputanan sa paghinulsol mas molabaw pa sa unsay ingon og negatibong mga sangputanan. Tutuki ang maayong mga butang nga gisaad sa Ginoo niadtong kinsa mokumpisal ug maghinulsol.
3. Kahadlok sa Paningkamot
Ang paghimo sa mga matang sa kausaban nga kinahanglan nakong ingon og lisud kaayo. Tingali magkinahanglan usab kini og taas nga panahon.
Ang bisan unsang katakus nagkinahanglan og paningkamot. Kapasayloan, kalinaw, ug espiritwal nga pagtubo mao ang labing takus nga mga butang nga mahunahunaan.
4. Kahadlok nga Madaut ang Kaugalingong Imahe
Usa ko sa mga “maayong bata.” Kon moangkon ko nga nakahimo og kasaypanan, mao nana—dili nako “maayong bata”. Unsa kahay akong dangatan? Si kinsa ako nga mamahimo? Mas baling maningkamot nalang ko nga malimtan kini ug mopadayon nga daw ang tanan maayo ra.
Kita kinahanglang mapainubsanong moangkon sa atong mga sala sa atubangan sa Dios aron Siya “mohimo sa mahuyang nga mga butang nga malig-on” alang kanato (Ether 12:27). Ug ang inyong kaugalingong Imahe nga angay paningkamotan nga maangkon mao ang kanang gusto sa Langitnong Amahan ug ni Jesukristo nga naa kanimo: usa ka anak sa Dios kinsa, bisan og dili hingpit, walay kinutuban ug balaan nga potensyal pinaagi sa Ilang tabang.
5. Kahadlok nga Mawad-an sa Imong Personalidad
Kon ako mosunod sa sumbanan sa Simbahan, akong undangon ang pipila sa mga butang nga nakahimo nakong ako, sama sa akong paborito nga mga sine, salida sa TV, musika, ug mga paagi sa pagpahayag sa akong kaugalingon. Makigparehas nalang ko sa ubang mga Mormon. Mas maayong magpakaako nalang.
Pinaagi sa paghinulsol, kamo makabaton sa Balaang Espiritu sa inyong kinabuhi. Ug pinaagi sa Espiritu, imong madiskubrihan ang mas lawom, mas tinuod, ug mas maayo nga pagkaila sa pagkatawo. Gibase kini sa kon unsa kamo mamahimo sa mata sa Dios kay sa bisan unsang butang nga gitukod diha sa balason nga pundasyon sa mga hilig, mga kagustuhan, kinaiya, ug sa pagkalahi.
6. Kahadlok sa Kapakyasan
Naningkamot ko sa pag-usab sa daghang higayon apan nakahimo lang gihapon sa samang mga sayop. Tingali nahurot na ang tanan nakong kahigayunan. Tingali ako dili gayud mausab. Kon akong sulayan og kausa nalang ug mapakyas, dili ba nagpamatuod nalang kini?
Dili sayon ang paghinulsol. Gituyo kini nga dili sayon. Apan kini ang inyong dalan sa kalipay, mao nga padayona kini. Walay kinutuban sa sinsero nga paghinulsol (tan-awa sa Mosiah 26:30). Ang Anak sa Dios mihatag sa iyang Kaugalingon isip ang walay kinutuban ug mahangturong sakripisyo sa pag-ula sa atong mga sala aron kita mapasaylo kon kita magbaton og hugot nga pagtuo ug maghinulsol (tan-awa sa Alma 34:9–16). Timan-i kana? Walay kinutuban ug mahangturon. Wala pa kamo molapas sa utlanan sa Iyang Pag-ula, tungod kay kini walay utlanan. Padayon sa pagpaningkamot.
Unsa kaha kon ako makausab gayud sa akong kinabuhi? Tingali unya og dunay daghan kaayong lauman ngari kanako. Basin mas maayo nalang magpabilin nga dunay apan ug igo-igo lang aron dili ko mahimong lauman sa pagdala og mas daghang responsibilidad.
Ang pagkahadlok sa mas taas nga mga gilauman o dugang nga responsibilidad mahimong naggikan sa katapulan o kawalay siguridad. Apan ang plano sa Langitnong Amahan mao ang kalamboan ug kauswagan. Midawat ka niining plano sa wala pa niining kinabuhia; dawata kini karon pinaagi sa pagkugi ug pagbaton og hugot nga pagtuo. Paningkamuti nga makita ang matang sa tawo nga gusto sa Langitnong Amahan nga ikaw mamahimo ug ang matang sa kinabuhi nga gusto Niya nga imong maangkon. Kon kamo sa tinuod-anay makakita sa tawo nga kamo adunay potensyal nga mamahimo, mahimong lisud alang kaninyo nga makatuo niini. Uban sa tabang sa Langitnong Amahan ug sa Manluluwas imo ra kining makab-ut.