Aumaia e Laau Su’isu’i ni Uaga o Faamanuiaga
O loo aoaoina le suisui a Tamaitai i Salelesi.
Sa faipaaga talu ai nei le LDS Charities ma le komiti a tina ma tamaitai a le Ekalesia Nasareta (ua ta’ua “Uaga o Faamanuiaga”) e tuuina atu ni laau suisui mo tamaitai.
O le manatu na aliae ina ua feiloai Mauga Reupena, o le faletua o le Faifeau o le Ekalesia Nasareta, ma Peresitene Elder O. Vincent Haleck i se fonotaga mo le Fono a Ekalesia Soofaatasi i Samoa.
Sa fesili atu Mauga ia Elder Haleck po o le a se mea e mafai ona fai e fesoasoani ai i tamaitai o lana ekalesia ma le nuu e faaleleia ai olaga o o latou aiga.
Sa fautua atu Elder Haleck ia faatoai atu sana talosaga i le ofisa o le Uelefea a le Ekalesia i Apia sei vaai pe mafai ona fesoasoani atu le LDS Charities (Fesoasoaniga Alofa a le AAG).
Na tauaao atu e Mauga lana talosaga ia Elder Meliula Fata, o le Fitugafulu Eria ma o le pule o le Uelefea i Samoa, e sailia ai se fesoasoani mo tamaitai e ala i le sauniaina o ni laau suisui ma masini ovaloka mo tamaitai o lana ekalesia ma le nuu.
Sa feiloai faifeau faamisiona matutua o le Au Paia o Aso e Gata Ai, o Elder Cliff ma Sister Kathleen Vellinga, ma Mauga Reupena ma isi sui o le komiti a tamaitai. Sa la matauina a uma ona faapipiiina ni palaka eletise, ona talafeagai loa lea o le fale komiti a le nuu e fai ma potuaoga mo suisuiga. Na latou iloa foi o loo i ai ia Mauga ni tomai e aoao ai isi tamaitai ia iloa suisui.
Sa mananao le komiti a tamaitai e fesoasoani i aiga o le nuu ia mafai ona suiina lavalava ma isi mea, ina ia mafai ai ona sefeina ni tupe mo isi manaoga autu e pei o meaai, eletise ma pili aoga.
Na latou mananao foi e fesoasoani i tamaitai talavou o le nuu e aoao se tomai e mafai ona fesoasoani ia i latou i o latou olaga i le lumanai. Ona o ni faigata i mea tautupe o nisi o tamaitai talavou o le nuu na le toe faaauauina ai le a’oga.
Na tuuina atu e le LDS Charities ni laau suisui se 13 ma le masini ovaloka e tasi ae o le Komiti a Tamaitai na sauniaina le avanoa mo le potu aoga ma sauniaina e ala i le faaopoopoina i ai o isi palaka eletise, laulau ma nofoa, ma meafaigaluega suisui.
Ua atoa ai le 18 poloketi e pei o lenei ua foai atu i ai le LDS Charities i lenei tausaga e fesoasoani ai i tagata o Samoa ina ia ola-tutoatasi atili i totonu o o latou aiga ma nuu.