Pe a foliga le leaga i le lelei ma foliga le lelei i le leaga
Saunia e Elder Quentin L. Cook
O Le Korama a Aposetolo e Toasefululua
Mai se saunoaga i le faigalotu, “O se Faatasiga i le Iuga: O le Faaiuga Tuufaatasi o Filifiliga Uma,” na tuuina atu i le Brigham Young University ia Fepuari 7, 2017. Mo le tuatusi atoa i le faaPeretania, asiasi i le speeches.byu.edu.
O auala o loo taumafai le tiapolo e taufaasese ma faamaualaloina ai faamanuiaga o le ola e tusa ai ma fuafuaga a le Tama.
O se tasi o tulaga sili ona faitogafiti o taumafaiga a le tiapolo e taofia ai fuafuaga o le fiafia a lo tatou Tama i le Lagi o ana aoaoga pepelo e faapea e leai se aafiaga leaga po o le (tiapolo 2 Nifae 28:22) ma ana taumafaiga e toe faamatala le leaga e lelei ma le lelei e leaga, o le pogisa e faapea o le malamalama ma le malamalama o le pogisa, ma le oona e faapea e suamalie ma le suamalie o le oona! (Tagai i le 2 Nifae 15:20).
E taua lenei o le fesuiaiga o le faatulagaga o mafaufauga “pe a faapea ua suia le auala e masani ona mafaufau iai poo le faiga o se mea i se auala fou,”1 ma ua faaalia ai le faafeagai tonu o mea nai lo le mea moni. I lana tusitusiga The Screwtape Letters, na tusia e C.S. Lewis mai le manatu matua o le tiapolo. Sa suia e Lewis aga masani e faaaoga ai e faaali mai ai o le leaga e foliga mai e lelei ae o le lelei e foliga mai i le tiapolo.2
I lenei tulaga, sa faia ai sa ma fonotaga feteenai ma se tagata tomai faapitoa lauiloa i faasalalauga i ni nai masina ua tuanai. Sa ma talanoaina i le aafiaga o le tiapolo ma le taui o filifiliga leaga.
Sa ia vaai i se ata faalemafaufau malie i se fonotaga a Lusifelo ma se kamupani faasalalau. Sa faamatala e le tiapolo lona faafitauli: o ia ma lana au sa latou teena le fuafuaga a le Tama ma ua malamalama e le mafai ona latou tetee atu i le Atua. Na malamalama Lusifelo e ui o le fuafuaga a le Tama e faatatau i le olioli ma le fiafia, o lana ia fuafuaga e ala mai ai le loto nutimomoia ma le faanoanoa. O le faafitauli, sa faamatala mai e Lusifelo i le ofisa o faasalalauga, pe faapefea ona faatosina e mulimuli mai.
Sa maitauina e pau lava le faamoemoe o Lusifelo e manuia ai o le suia lea o mafaufauga poo aga fetuunai—i se isi faaupuga, o le faauigaina o le fuafuaga a le Tama e oo mai ai le loto nutimomoia ma le faanoanoa ma le fuafuaga a Lusifelo e oo mai ai le olioli ma le fiafia.
O lenei fonotaga faataitai faalemafaufau e iai se faamoemoega aoga. O le mea moni e faapea, e le gata ina taumafai fili o le fuafuaga a le Tama e faamaualaloina aoaoga ma mataupu faavae o le fuafuaga, ae ua latou taumafai foi e faaleaoga faamanuiaga a tafe mai le fuafuaga. O la latou taumafaiga faavae o le faia lea o mea lelei, tonu ma le fiafia e foliga mai e leaga.
O le a ou talanoa i nisi o taumafaiga a le tiapolo e faaleaogaina ma faamaualaloina ai faamanuiaga o le ola e tusa ai ma fuafuaga a le Tama.
Upu o le Poto
I le faagasologa o le soifuaga, ua ou vaai ai i le olaga o le toatele o au uo ua faatama’ia ma nisi o taimi ua faaleagaina e le ava malosi. O le aga masani o le ava malosi e le faatatau i na o aoaoga faavae o le Ekalesia; e faasino foi i le soifua maloloina ma le fiafia o tagata uma. O tagata o le Aupaia o Aso e Gata Ai e mafai ona avea ma leo taua e aoao ai le atunuu e uiga i le iuga o lenei faafitauli.
I le fuafuaga a le Tama, o le Upu o le Poto—ua tuuina mai ona o “fuafuaga a le tiapolo … o le faatosinaga o tagata” —ua avea ma mataupu faavae o le soifua maloloina. Ua “fetuunai mo le gafatia a le ua vaivai ma e ua sili ona vaivai o le aupaia uma.” Ua faatulaga patino, e aofia ai ma lena “uaina poo se meainu malosi [ava malosi] … e le lelei lea.” O le tapaa ma meainu vevela (ti ma le kofe) “ua le mo le tino lea” (MF&F 89:4, 3, 5, 8–9).
O lenei faaaliga o loo fautuaina mai ai foi faataitaiga o le soifua maloloina atoa ma se tautinoga. Ua tautino mai o i latou e usiusitai i le poloaiga paia “o le a maua le malosi … ma o le a maua le poto ma ‘oa sili o le malamalama” (MF&F 89:18–19).3
O le faapogisaina e faaaoga e le tiapolo o loo faasino manino mai i ana fautuaga mo le tapaa ma le ava malosi.
E oo lava foi i le ata faataitai faalemafaufau i le ofisa faasalalau o le a faigata ona latou faasalalau le tapaa i se auala malamalama e tauaogaina ai i aso nei. Sa maua e le Perofeta o Iosefa Samita (1805–44) le faaaliga o le Upu o le Poto i le 1833. I le 1921, na musuia ai Peresitene Heber J. Grant (1856–1945), e le Alii, e valaau atu i le Aupaia uma ina ia ola atoatoa ai i le Upu o le Poto.4 I le taimi lea, o faasalalauga faalauaitele ma faatosinaga i tifaga ua avea ai le tapaa e foliga o se mea e tausaafia, aoga, ma malie. Seia oo i le tausaga 1964, e 43 tausaga mulimuli ane, na faamautu ai e le Fomai Tipitipi Aoao o le Iunaite Setete, “O le taumafa tapaa o se faafitauli tau le soifua maloloina ua tele lona taua i le Iuniate Setete ua alagatatau ai ni togafitiga e taofia ai.”5
E le fesiligia faamaumauga e faatatau i le taumafa tapaa i aso nei. E faigofie ona maua le tagata e taumafa tapaa nai lo le tagata e le taumafa tapaa i le gasegase o le fatu, pepe le tino, ma le kanesa o le mama. Ua fuafuaina o le taumafa tapaa e faateleina ai le avanoa e maua ai i le kanesa o le mama i le 25 o taimi.6
O lea o le faailoa mai e le tiapolo o le tausaafia, manaia ma le malie ua avea ma mea e taunuu atu ai i le faanoanoa ma iu ai lava ina oti mo le miliona o tagata.
O le ava malosi le isi faataitaiga. I le tele o tausaga ua ou mulimuli ai i se galuega suesue lea na amata i le 1940. I le amataga, e 268 alii na auai i le Iunivesete o Harvard sa suesueina faavaitaimi i o latou olaga atoa. Mulimuli ane, o nisi, e aofia ai tamaitai, na avea ma vaega o le suesuega. O le sini o le uluai suesuega o le sailia lea e uiga i le faamanuiaina ma le fiafia.
O lenei suesuega e aofia ai ni manatu taua e tolu. Muamua, e maualuga le fesootaiga o le fiafia o tagata matutua ma le fiafia o le aiga ao laiti, aemaise lava o le alofa ma le tausia lelei e matua.7 Lona lua o le taua o le faaipoipoga lelei ma malosi i le fiafia i le soifuaga atoa.8 Lona tolu o aafiaga leaga o le ava malosi i ulugalii ma le soifuaga manuia ma le fiafia. O le faaaoga faatautala o le ava malosi ua aofia ai le tasi o vaetolu o aiga i le Iunaite Setete ma aofia ai le tasi o vaefa o i latou ua taofia i le falemai. Ua fai ma mafuaaga toatuga o le maliu, soifua le maloloina, ma le faaitiitia o galuega faatinoina.9
Talu ai nei i le Washington Post se tusiga i le itulau muamua o loo faasino i faamaumauga a le soifua maloloina a le malo o le ISA sa lipotia ai “o tamaitai i Amerika ua tele naua lo latou taumamafa i ava malosi, sili mamao atu, nai o latou tina poo tina matutua, ma o le taumafa i le ava malosi ua maliliu ai le toatele o i latou e pei ona faaalia mai fuainumera faamaumau.” Na faaiuina le tusiga e faapea “e le lagolagoina e le saienisi o loo iai nei ma o loo faasolosolo mai ni mea lelei mai le taumafa i le ava malosi” ma “o le faailoga o le maliu mai le kanesa e foliga mai ua faaopoopo pea i soo lava se tulaga o le taumafa ava.”10
I ni nai tausaga ua mavae, e toatele iunivesete i le lalolagi ua taumafai e faaitiitia le faaaogaina o le ava malosi ona o lo latou aafiaga matautia i amioga le fiafesootai, e aofia ai ma feusuaiga faatautala ma le matautia o le soifua maloloina, aemaise ai ua fai lea ma mea e fiafia iai. O le matautia o aafiaga a le ava malosi i faiai talavou ua faavae faafomai nei.11
I le tau faailoa atu o tulaga patino i le soifua maloloina, sa ou le taumafai e tuu faavasega isi faaiuga matautia o le tagofia o le ava malosi e pei o faalavelave i taavale ao ona, ma le taumafai o alii e fai le ava malosi ma mafuaaga o le faatautala faaletino ma feusuaiga, ma le aafiaga o le ava malosi i faiai o pepe e lei fananau e tina i le taimi o maitaga.12
E faapea o le taumafa tapaa, faatautala i le ava malosi, ma vailaau faasaina o se gasegase13 e le afaina ai le atunuu, o lea ua tatou vaai i le malosi o le tiapolo o loo uunai e faatagaina faaletulafono le faaaogaina faasamasamanoa o le mariuana.
Filifiliga Faaleaiga
E mulimuli filifiliga faaleaiga i se mamanu faapenei I le fuafuaga a le Tama, ua manino lelei le faataatiaga o le matafaioi a aiga.
I le “O le Aiga: O se Folafolaga i le Lalolagi,” ua tatou faitau ai: “Ua faapaiaina le aiga e le Atua. O le faaipoipoga i le va o le alii ma le tamaitai e taua i Lana fuafuaga e faavavau. E tatau ona fanauina fanau i totonu o feagaiga o le faaipoipoga, ma ia tausia e se tamā ma se tina o ē ua faamamaluina ma le faamaoni atoatoa feagaiga faaleulugalii. “E mafai ona maua le fiafia i le olaga faaleaiga pe a faavae i aoaoga a le Alii o Iesu Keriso.”14
Ua fai ma masani i le lalolagi i nei aso, o se isi fesuiaiga o le faatulaga o mafaufauga, o le faia o filifiliga talafeagai i se auala faatosina e feteenai tonu ma le fuafuaga ma e le manuia mo le faaipoipoga ma le aiga.
•O le filifliga a tamaitai ma alii e ave le faamuamua i aoaoga ma galuega nai lo le faaipoipoga ma le aiga.
•O le filifiliga patino e aua nei iai pe faaitiitia foi le iai o ni fanau15 poo le faamuta o le maitaga pe a le talafeagai ai.
•O le filifiliga e auai i amioga le mama e sui ai le faatulagaga paia o le faaipoipoga.
Ua tulimatai e le tiapolo tamaitai ma ua valiina le avea o se tina ma taunuuga faigata ma le aoga. Ua ia tulimataia alii ma valiina le avea ai o se tama o se mea e le aoga ma le faamaoni o se “aoaoga tuai.” O le faaesea ma le faamaualaloina e mafua mai ponokalafi o se faataitaiga o amioga le mama ua fai ma sui o le faatasiga paia o le faaipoipoga. Na te faamamafa ai le matautia o le liliu mai le mea moni ma le amiotonu o loo saili e le tiapolo.
Ua valiina filifiliga le talafeagai i le faapea ua talafeagai e fesoasoani ai e faataunuu faamoemoega faale lalolagi o le saolotoga ma le tulaga tutusa. O le faaiuga o nei filifiliga, ua faaitiitia maoae ai le averesi o le fuainumera o tamaiti e fanau mai e se tamaitai i lona soifuaga. Ua fuafuaina e 46 pasene o le lalolagi o loo soifua i atunuu o lo latou gafatia e maua ai ni fanau e i lalo o le 2.1 tamaiti—o le fuainumera manaomia ina ia faatumau ai le aofai o tagata o se atunuu. O le tele o atunuu o Europa ma Asia e i lalo ifo o lenei faatulagaga. O Italia ma Iapani e tusa ma le 1.3 tamaiti fananau Ua fuafua e Iapani e faaitiitia le faitau aofai o ona tagata mai le 120 miliona i le tusa ma le 100 miliona i le tausaga e 2050.16
O lenei faaitiitia i le lalolagi atoa i le faitau aofai o tagata ua faamatalaina e nisi o se faatulagaga taumalulu.”17 O le tele o atunuu ua le lava a latou tamaiti e suia augatupulaga o loo ua maliliu.
Sei ou faasoa atu se tasi mea o loo tupu ua fai ma popolega tele ia te au. Sa iai sou aafiaga i Ierusalema i le 2016 i le Fale Faamanatu mo Tamaiti, o se vaega o le Fale Faamanatu o le Fasiotiga Tele i le Lalolagi. O Elder Jeffrey R. Holland o le Korama a Aposetolo e Toasefululua ma au, faatasi ai ma le toalua o taitai o Amerika Iutaia, sa matou faataatia le pale e faamanatu ai e ua maliliu. E talitonu e sili ae i le miliona tamaiti Iutaia na maliliu i le taimi o le Holocaust.18
A o ou matamata i le fale mataaga sa lofituina lava a’u i lagona ootia. A o ou tu i fafo ma tau faatoa filemu ifo, sa ou manatunatu i le matautia o le aafiaga ma vave ai ona iloa i le Iunaite Setete lava ia, e tutusa pau le tele o faapau pepe i tausaga e lua taitasi ma le numera o tamaiti Iutaia na maliliu i le Fasiotiga Tele i le taimi o le Taua Lona Lua o le Lalolagi.19
Na fasiotia tamaiti Iutaia ona o i latou o ni Iutaia, ma e leai se faailoga faatusatusa o lenei i le talafaasolopito atoa, ae o le loloto o ou lagona e faatatau i le fasiotia o tamaiti. O le aumaia o fanau i le lalolagi o se vaega paia o le fuafuaga o le faaolataga a lo tatou Tama Faalelagi. Ua tatou le gaoioi ma fefefe i le loloto o le faatinoga o le faapau pepe ua fai ma mea ua tatou faagalogalo ai i o tatou mafaufau ma taumafai e aveesea mai lo tatou malamalama. E manino mai o loo osofaia e le tiapolo aga faavae taua a tamaiti i ona vaega eseese.
E ao ona taulimaina ma le faaeteete le faapau pepe O le faafitauli lenei atonu e le mafai ona foia i le teena patino poo le faamasino vale. O nisi ua uma ona fautuaina ina ia aua nei faamasinoina se vaa—po o alii po o tamaitai—e aunoa ma le malamalama i le umi o le malaga ma matagi e ono afatia ai.20 Ou te fia faaopoopo atu, o le tele o lo o aafia ai i lenei uiga tetee malosi ua leai se molimau o le Faaola po o se malamalama i fuafuaga a le Tama.
Ae ui i lea, mo i latou ua talitonu tatou te tali atu i le Atua—ma e aofia ai ma i latou foi e le auai i la tatou faatuatuaga—ua avea lenei mea ma faafitauli faatusagata tele lava. A e tuufaatasia lenei ma le faatulagaga o le tau malulu ua tatou iloa nei, o se pisia matautia lea o amioga i lo tatou atunuu.
Na aoao mai Peresitene Spencer W. Kimball (2895–1985): “O le fiafia silisili i le faaipoipoga ua pulea lava lea e se uiga patino—o le maua lea ma le tausia o fanau. … E le faamaonia pe taliaina e le Ekalesia … auala e … faatapulaaina ai le aiga.”21
E tusa ai ma le aofai ma le tova o tamaiti, e ao ona silasila totoa i le soifua maloloina o le tina, ma o le faaiuga e ao ona faia ma le agaga tatalo e le tane ma le ava.22 O nei faaiuga e le tatau lava ona faamasinoina mai fafo. O nisi o le Aupaia faatuatua e le mafai ona maua ni fanau pe o le le maua o se avanoa e faaipoipo ai. O le a latou maua faamanuiaga uma lava i le taumafataga i le iuga.23
Ae peitai, ua lagolagoina e Lusifelo le faapau pepe ma i le fesuiaiga o manatu matautia ua faatalitonuina ai tagata e faapea o fanau ua tele ai avanoa tiai ma le faanoanoa nai lo le olioli ma le fiafia.
I le avea ai o ni tagata o le Aupaia o Aso e Gata Ai, e ao ona tatou muamua i luma i le suiga o loto ma mafaufau i le taua o fanau. O le osofai i le aiga e pei ona ou faamatala atu e iu lava i le lotomomomo ma le faanoanoa.
Ua fetalai mai le Alii e faapea, o Lana galuega maoae ma [Lona] mamalu o le “ia aumaia le tino ola pea ma le ola faavavau o le tagata” (Mose 1:39). O le fuafuaga e faatulaga e ala i aiga. E taua tagata uma lava o le aiga, ma o a latou matafaioi e matagofie, mamalu, ma faamalieina.
O le folafolaga i le aiga ua manino lelei lava e faatatau i le taui o filifiliga e le talafeagai ma le fuafuaga a le Tama. Ua folafola mai ma le faamaoni lava, “Matou te lapata’i atu foi, o le faamalepeina o le aiga o le a aumai ai i tagata taitoatasi, alaalafaga, ma malo, faafanoga ia na ulua’i ta’u mai e perofeta anamua ma aso nei.”24
O lenei ua faatulaga manino mai ai le faatasiga i le iuga ma aafiaga faifaipea o filifiliga ua le talafeagai ma le fuafuaga o le fiafia a le Tama.
I faaipoipoga uma ma i le tausia o fanau, e iai luitau ma osigataulaga. Ae o taui i lenei olaga ma i le faavavau e le mafaamatalaina lo latou matagofie. E puna mai i se Tama o le Lagi alofa.
Faamanuiaina i le Laueleele
E lua ni vaega o se mau masani o loo maua i le Tusi a Mamona. E faitauina, “E faapei ona e tausia poloaiga a le Atua, o le a e manuia i le laueleele.” O le vaega lona lua e faitauina, “E faapei ona e lē tausia poloaiga a le Atua o le a vavae ese oe mai ona luma” (tagai, mo se faataitaiga, Alema 36:30). Ua manino o le iai o faamanuiaga o le Agaga Paia e ala i le usiusitai o se elemene tupito o le faamanuiaina i le laueleele.
E faaopoopo iai, o aoaoga paia a le Ekalesia ua faatulagaina e faapea o le lava o mea ua maua mo mea manaomia o le fua faatatau sili lea o le famanuiaina faalesoifuaga. O le fesuiaiga o le faatulagaga o manatu o Lusifelo o le siitia lea o le sailia o le tamaoaiga e tele ma le naunau i mea vaaia iloga. O nisi e foliga ua matua uunaia lava e ausia le soifuaga o le tamaoaiga ma le tautaua. O le tele o le tamaoaiga ua le o faaagaga mo i latou o e faatuatua, pe maua ai foi le fiafia.
I le avea ai o ni tagata soifua, ua faamanuiaina lava le Aupaia o Aso e Gata Ai. O le mataupu faavae o le fuafuaga poto o tupe e aofia ai:
•Saili muamua le malo o le Atua
•Galue, fuafua, ma faaaoga tatau.
•Fuafua mo le lumanai.
•Faaaoga le tamaoaiga e fausia ai le malo o le Atua.
Faamoemoega o Lusifelo
I le faaopoopo i le faailoa mai o faamanuiaga o se faanoanoa, ua saili Lusifelo e tafiesea le fuafuaga a le Tama ma faatamaia le faatuatua ia Iesu Keriso ma Lana aoaoga faavae. O le osofaia o le Tusi Paia ma le paia o Iesu Keriso sa lei sili ona lamatiaina lava i lou olaga e faapei ona iai i le taimi nei. E pei ona faailoa mai e tusitusiga paia, ua faaaoga e Lusifelo ni auala eseese e faataunuuina ai lona faamoemoe.
O se tasi o mea o le taitaiseseina e le tiapolo. Ae o se isi o le avea ma ana auauna Na saunoa mai Elder Neal A. Maxwell (1926–2004) o le Korama a Aposetolo e Toasefululua, “O se mala tele ona o le toatele o e o loo soifua ua avea o ni auauna i le tiapolo … ma ua … faatauina i se tau taugofie lava. O se tulaga itiiti, o se tupe itiiti, o se viiga itiiti, o se tautaua itiiti, ma ua naunau ia latou faia se tau mo ia o le e ofoina atu ituaiga ‘taui’ eseese, ae e leai se taui faaselesitila.”25
Masalo e leai se faataitaiga sili o le aafiaga o auauna nai lo le miti a Liae i le laau o le ola ma le fale avanoa i le Tusi a Mamona. O i latou na iai i le fale sa tusitusi lima ia i latou ua piimau i le ai uamea ma aai foi i le fua o le laau. O i latou na aai i le fua sa latou “mamā, ona o i latou o e sa faatauemu mai ia te i latou; ma sa latou pauu ese atu ai i ala faasaina ma ua leiloloa” (1 Nifae 8:27–28).
O lea, o filifiliga sese e taunuu atu ai i le faatasiga e oona, mafu, mataga, ma faanoanoa.
Faatusa lenei i le faatasiga matagofie o iuga ua folafolaina ia te outou o e faatuatua. O le a “faatumulia outou i le mamalu o le Alii” ma le faapaiaina e le Agaga i le faafouina o o outou tino, ma mea uma lava e a le Tama o le a tuuina atu ia outou (MF&F 84:32, 33; tagai foi i fuaiupu e 34–38).
I lenei faatasiga o le iuga, o meaai faaleagaga tatou te aai ai e manogi, feu, suamalie, susua, aoga, ma faatumulia ma o le a olioli o tatou loto. Pe a tatou “o mai i Lē Paia o Isaraelu, ma aai i mea e le pala, e le mafai foi ona faapalaina” (2 Nifae 9:51), tatou te mulimuli i le ala vaapiapi ma le ala sao e aumaia i tatou i Lē Paia o Isaraelu, “aua o le Alii le Atua o lona suafa” (2 Nifae 9:41).