O Le Mea Tatou Te Talitonu I Ai
O Le Mafuaaga mo lo Tatou Faamoemoe
E i ai le fuafuaga e faavavau a le Tama Faalelagi ina ia e toe foi atu ia te Ia. O Lona Alo, o Iesu Keriso, sa faatasi ma oe ma o le a faapea lava ona i ai faatasi ma oe i laasaga uma lava o le ala.
Foafoaga
I lalo o le taitaiga a Lona Tama, sa foafoaina ai e Iesu Keriso se lalolagi matagofie mo i tatou (tagai Kolose 1:15–16; 3 Nifae 9:15). “O le telē naua o le faavavau, o mamalu ma mealilo o le atulaulau ma le taimi e le muta, ua fausia uma mo le manuia o tagata soifua masani e pei o oe ma a’u” (Dieter F. Uchtdorf, “E Amanaia Oe e Ia,” Liahona, Nov. 2011, 20).
Olaga i le Lalolagi
I le lalolagi ua tatou le toe i ai faatasi i le afioaga o le Atua, ae e mafai e le talalelei a Iesu Keriso ona taitaiina i tatou. E ui ina tatou agasala mai lea taimi i lea taimi, e mafai e le Faaola ona faamalolo ma faamagalo i tatou pe a tatou salamo. Sa puapuaga o Ia “e sili i mea e mafai ona onosaia e tagata” (Mosaea 3:7) ina ia tatou faatoilaloina a tatou agasala e aunoa ma le tausalaina e i latou! (Tagai Mosaea 4:2; Alema 42:14–15.)
Olaga pe a mavae le Oti
Pe a maliu, e tuueseese o tatou agaga ma o tatou tino, e faatalitali ai le Toetutu i le lalolagi o agaga. O le Toetu o Iesu Keriso ua leai ai se oti ia i tatou uma, ua faamatuu mai ai i tatou, pe a tatou faatuatua, e toe faatasi ma o tatou aiga ma le Tama Faalelagi. “O le a toe faatasia le agaga ma le tino i ona foliga atoatoa” (Alema 11:43) ma ola ai e faavavau. (Tagai 1 Korinito 15:22; 2 Nifae 9:4–13.)
Aso o le Faamasinoga
O Iesu Keriso o le a avea ma o tatou faamasino. O Ia o le sa fai ma o tatou fautua i le Tama Faalelagi o le a Ia tuuina mai se faamasinoga atoatoa, alofa, alofa tunoa, ma le tonu. O le a Ia faamasino i tatou e le gata i mea sa tatou fai, tautala, ma mafaufau i ai ae faapea foi o e ua tatou avea ai—le auala tatou te avea ai e pei o Keriso. (Tagai 2 Nifae 9:15; Mosaea 4:30; MF&F 45:3–5.)
Ola e faavavau
O i latou e o mai ia Keriso ma maua sauniga talafeagai uma, e pei o le papatisoga ma sauniga o le malumalu, ma ua faatuatua i poloaiga o le a maua le ola e faavavau i le afioaga o le Atua. E oo mai faamanuiaga “e ala i galuega, ma le alofa mutimutivale, ma le alofa tunoa o le Mesia Paia” (2 Nifae 2:8; tagai foi Mosaea 15:23).