ʻOku Kaunga Kotoa Ia ki he Langí

Ko ha faingamālie hāhāmolofia ia ke ʻinitaviu e kau mēmipa kotoa ʻo e Kōlomu ʻo e Kau ʻAposetolo ʻe Toko Hongofulu Mā Uá ʻo kau ki he lakanga fakaeʻaposetolo māʻoniʻoní (vakai, “Ko Ha Kau Fakamoʻoni Kimautolu,” peesi 12)

Hili ʻeku talanoa mo Palesiteni M. Lāsolo Pālatí, ko e Palesiteni Leʻoleʻo ʻo e Kōlomu ʻo e Toko Hongofulu Mā Uá, naʻá ku toe vakai atu ki hono ʻōfisí. Naʻá ne ʻi hono tesí, ʻo tohi ha lea ki he konifelenisi lahí. Ko e mēmipa fuoloa taha ia ʻo e Kau Taki Māʻolunga ʻo e Siasí—ʻa ia ne hikinimaʻi ki he Kōlomu ʻUluaki ʻo e Kau Fitungofulú ʻi he 1976. Ne fotu mai ʻoku ongosia mo fakaivia ʻi he taimi tatau. Ne toki ʻosi pē haʻane fehuʻi mai, “ʻOkú ke fēfē hake?” pea muimui mai ai ha naʻinaʻi angaʻofa: “ʻOua te ke fuʻu ngāue ke ke ongosia.” Ne mahuʻingamālie kiate au e fepōpoakiʻaki ko ení ʻi heʻene haʻu mei ha taha kuó ne tali ha uiuiʻi ke fakaongosia moʻoni ʻene moʻuí ʻi he ngāue ʻa e ʻEikí.

ʻOku ui ʻa e Toko Hongofulu Mā Uá ke “tokangaʻi [e] ngaahi meʻa kotoa pē [ʻa e Siasí] ʻi he ngaahi puleʻangá kotoa pē” (Tokāteline mo e Ngaahi Fuakava 107:33). Ka ʻi hoʻo feohi mo kinautolú, ʻoku hiki ʻenau tokangá mei he Siasi fakamāmanilahí ki he tokotaha fakafoʻituitui ʻi muʻa ʻiate kinautolú. Ne nau omi ki honau ngaahi fatongiá mei he ngaahi lakanga ʻoku māʻolunga ʻi he lau ʻa e māmaní, ka ʻi heʻeku mavahe mei honau ngaahi ʻōfisí, ko e ongo foʻi lea ke ne fakamatalaʻi kinautolú ʻoku tatau ai pē—loto-fakatōkilalo mo e manavaʻofa.

“ʻOku ou faʻa fehuʻi pē kiate au, ʻNaʻe anga fēfē ʻeku ʻi heni mo e kau tangata maʻongoʻonga ko ʻení?’” Ko e fakamatala mai ia ʻa Palesiteni Pālatí. Hili iá naʻá ne fakamoʻoniʻi, “ʻOku kaunga kotoa ia ki he langí.” ʻOku ou ʻamanaki te ke fiefia ʻi he kiʻi vakai nounou ko ʻeni ki he uiuiʻi ʻo ha ʻAposetolo.

Sarah Jane Weaver

ʻĒtita ʻo e Church News