Ta Lotu ʻo Ofi ki he Temipalé

Juan Beltrame

Puenosi ʻAealesi, ʻAsenitina

ʻI he taʻu tolu homa foha ko Mākoó, naʻá ma fakatou konā ʻi he meʻakai. Naʻe puke lahi ʻa Mākō pea ʻikai ke ne toe ʻilo ha meʻa. Naʻá ma leleakiʻi ia mo hoku hoa ko Malianelá ki he falemahakí. ʻI heʻema tūʻuta atú, ne hangē kuó ne maté. Hili ha houa nai ʻe fā, ne faifai peá ne ake.

Talu mei ai, ne faʻa hamu ʻa Mākō ʻi he ngaahi taʻu ʻe nima hono hokó. ʻI heʻema faʻa tuku hifo ia ki hono mohengá ʻi he efiafí, naʻá ma faʻa fifili pe te ma toe leleakiʻi nai ia ʻi he tuʻuapoó ki he falemahakí. Ne faingataʻa ʻaupito ke ma mohe he ngaahi taʻu fakaloto-mafasia ko iá, pea naʻá ma fakafalala ki he lotú, tuí, ʻaukaí, mo e ngaahi tāpuaki ʻo e lakanga fakataulaʻeikí.

Fakafuofua ki he taʻu ono nai ʻo Mākoó, ne tā mai ʻa Malianela ki he ngāué ʻo talamai ke u fakavavevave ange ki he falemahakí. Ne hamu lahi ʻa Mākō pea kuó ne longo. ʻI heʻene fetuʻutaki maí, naʻá ku ngāue ki hono fakafoʻou ʻo e Senitā Akoʻanga Fakafaifekau ʻAsenitiná, ʻa ia naʻe tuʻu ʻi he tafaʻaki ʻo e Temipale Puenosi ʻAealesi ʻAsenitiná.

Kimuʻa peá u mavahe atu ki he falemahakí, ne pehē mai ha kaungāmeʻa ʻokú ma ngāue fakataha, “Fēfē kapau te ta tomuʻa lotu fakataha he ʻokú ta ofi ki he fale ʻo e ʻEikí?” Naʻe tāpuni ʻa e temipalé ke fakaleleiʻi mo fakalahi, ka naʻá ma fakaofi atu ki he fale ʻo e ʻEikí, ʻo ma lotu ai maʻa Mākō.

Neongo e ngaahi meʻa kotoa kuó ma foua mo Mākoó, naʻá ku ongoʻi loto houngaʻia ki he ʻOtuá koeʻuhí ko e taimi naʻá ma maʻu mo Malianela ke nofo mo iá. ʻI heʻeku lotú, naʻá ku talaange ki he Tamai Hēvaní kuó ma feinga ke hoko ko ha ongomātuʻa lelei pea kuó ma tokangaʻi ʻa Mākō ʻaki e lelei taha naʻá ma lavá. Naʻá ku talaange foki kiate Ia te ma tali Hono finangaló kapau kuó Ne ui ʻa Mākō ki ʻapi.

ʻI heʻeku tūʻuta he falemahakí, naʻe ʻikai ke u ʻilo pe ʻe toe moʻui ʻa Mākō mei heʻene longó, pe kapau ʻe sai, pe ʻe toe lava nai ʻo lue pe talanoa. Hili ha houa mātuʻaki faingataʻa moʻoni ʻe ua, naʻá ne ake. Naʻá ne fuʻu ongosia, ka naʻá ne sai pē. Talu mei ai, ko ha mana ia ʻene fakalakalaká. Ne faifai pē pea ʻikai toe fie maʻu ke faitoʻo pea fakaʻatā ʻaupito ia mei he falemahakí.

ʻOkú ma manatu mo Malianela ki he taimi faingataʻa ko iá mo houngaʻia ʻi heʻema kei maʻu ʻa Mākoó pea houngaʻia ʻi he ngaahi meʻa kuó ma akó. Naʻe fakatahaʻi kimaua ʻe homa faingataʻaʻiá pea ngaohi ke ma mālohi fakalaumālie ange. Ka ne taʻeʻoua ia, he ʻikai lava ke ma ako ʻo ʻiloʻi e ngaahi founga ʻoku fakahaaʻi ai ʻe he ʻEikí Hono toʻukupú ʻi heʻetau moʻuí.

Hangē ko e faʻa lea ʻa Malianelá, “Kuó ma mamata ki hano fakamoʻoniʻi mo e aʻusia lahi fau kuó ne ʻomi kiate kimaua ha fakamoʻoni ʻo e ʻafio mai ʻa e ʻOtuá, pea ʻokú Ne ʻiate kitautolu mo Ne fanongo mai. Kapau te tau ‘ūkuma mo faʻa kātaki, ʻe lava ke hoko mai e ngaahi tāpuakí ʻi he taimi taʻeʻamanekina tahá.”