Ko Ha Palōmesi ki ha Kiʻi Taʻahine
Luvia Paletesi Kapalela
Iukatani, Mekisikou
Ngaahi tā fakatātā ʻa Pascal Campion
ʻI he ngaahi taʻu siʻi kuo hilí, naʻá ku mātuʻaki ongoʻi loto-mafasia. Ko e meʻa pē naʻá ku kiʻi tokanga ki aí ko hoku kaungāmeʻa lelei tahá mo ʻene fānaú. Naʻá ma faʻa luelue he fakaʻosinga ʻo e uiké, pea naʻá ku saiʻia ai. Ka neongo ia ʻi he ʻalu ʻa e taimí, ne fakaʻau ke siʻisiʻi ange ʻema taimi luelué. Ne kamata ke u ʻofa ki hoku kaungāmeʻá mo hono fāmilí. Ne u toki ʻilo kimui ange ne siʻisiʻi ange ʻema taimi luelué he naʻe toe fakahoko ʻe hoku kaungāmeʻá mo hono fāmilí ha meʻa ne nau taʻofi ʻi he ngaahi taʻu kimuʻá—ʻa ʻenau ʻalu ki he lotú.
ʻI ha ʻaho ʻe taha, naʻa nau fakaafeʻi au ke mau maʻu meʻatokoni hoʻatā. Naʻá ku ongoʻi fiefia ʻi heʻeku toe mamata kiate kinautolú. Naʻá ku talaange ʻeku ongoʻi ʻofa kiate kinautolú. Ne fokotuʻu mai ʻe he ʻofefine taʻu ono ʻo hoku kaungāmeʻá ke mau fakaleleiʻi ʻa e palopalemá ʻaki ʻemau ʻalu fakataha ki he lotú. Ko ia ai, ne ʻikai ke ne toe momou, ka ne fakaafeʻi au ke mau ʻalu.
ʻOiauē, ʻikai! ʻE founga fēfē nai haʻaku feinga ke mahino ki he fāmili ko ʻení ko kinautolu pē ʻoku tonu ki ai ʻa e ʻalu ki he lotú ka ʻoku fuʻu taʻeoli ia kiate au? Kuo taʻu lahi ʻa e teʻeki ke u ʻalu ki he lotú, ka te u ʻikai fēfē ki ha kiʻi leka? Naʻá ku talaange te u ʻalu, ka ko hono moʻoní naʻe ʻikai ke teitei ʻi ai haʻaku taumuʻa ke tauhi e palōmesi ko iá.
ʻI he Sāpate ko iá, naʻá ku maʻu meʻatokoni pongipongi mo ʻeku tangataʻeikí. Naʻe toutou tatangi ʻeku telefoni toʻotoʻó, ʻo fakamanatu mai kiate au kuó u palōmesi ki ha kiʻi taʻahine te ma maʻulotu. Ne u tukunoaʻi ʻeku telefoni toʻotoʻó kae ʻoua kuo ʻeke mai ʻe heʻeku tangataʻeikí pe ko e hā ne ʻikai ke u tali ai iá. Naʻá ku fakahoko ange kuo fakaafeʻi au ki ha fakatahaʻanga lotu ka naʻe ʻikai ke u fie ʻalu. Naʻá ne malimali mo pehē mai, “Luvia, ʻoua naʻá ke teitei fai ha palōmesi ki ha kiʻi taʻahine kapau ʻoku ʻikai ke ke loto-fiemālie ke fakahoko ia.” Naʻá ku fakakaukau te u tauhi ʻeku palōmesí.
ʻI heʻeku aʻu ki he lotú, naʻá ku ongoʻi makehe, naʻe ʻikai ke u lava ʻo fakamatalaʻi. ʻOku teʻeki pē ke u lava ʻo fakamatalaʻi pe naʻe anga fēfē ʻene hokó, ka ʻi he Sāpate hono hokó, naʻá ku toe ʻi ai pē, pea hokohoko atu, kae ʻoua kuo mahino kiate au e meʻa naʻá ku ongoʻí: ko e Laumālie Māʻoniʻoní.
Naʻe kamata ke talitali lelei au ʻe he kau mēmipa ʻo e Siasí. Naʻe ʻikai ha veiveiua, naʻá ku fie ʻilo kau ki he Siasí. Ne kamata ke u fakataha mo e kau faifekaú, pea ne kamata foki ke maʻu haʻaku fakamoʻoni. Ne fakaʻau ke hokohoko e ʻaʻahi ʻa e kau faifekaú, pea naʻe tupulaki ʻeku mahino ki he ongoongoleleí kae ʻoua kuó u ongoʻi ha holi lahi ke papitaiso au. Ne papitaiso au hili ha taimi nounou mei ai, pea ʻoku ou lolotonga fiefia ʻi he ngaahi tāpuaki ʻo e ongoongoleleí. ʻOku ou houngaʻia ʻi he meʻá ni, ko ʻeku tauhi ʻeku palōmesi ki ha kiʻi taʻahine taʻu ono.