Kau Fakamoʻoní, Ngaahi Kōlomu ʻo e Lakanga Taulaʻeiki Faka-ʻĒloné, mo e Ngaahi Kalasi ʻa e Kau Finemuí
ʻOku fakataumuʻa ʻa e ngaahi liliu ʻoku mau fakahoko atu ko ʻení ke tokoniʻi ʻa e kau talavoú mo e kau finemuí ke nau fakatupulaki honau tuʻunga fakataautaha toputapu ke aʻusiá.
Kāinga ʻofeina, ko ha meʻa fakaʻofoʻofa ke to e fakataha mo kimoutolu ʻi he konifelenisi lahí. Naʻe fakahoko atu ʻi he konga kimuʻa ʻo e uike ní ha ngaahi fanongonongo ki he kāingalotu ʻo e Siasí ki ha ngaahi liliu ʻi he tuʻutuʻuni fekauʻaki mo e niʻihi te nau lava ʻo hoko ko ha kau fakamoʻoni ʻi he ouau papitaisó mo e silá. ʻOku ou fie fakamahinoʻi atu e ngaahi meʻa lalahi ʻe tolu ko iá.
-
ʻE lava ha taha ʻoku ʻi ai haʻane lekomeni ʻoku kei ʻaonga, pe lekomeni fakangatangata ke hoko ko ha fakamoʻoni ʻi ha papitaiso fakafofonga maʻá ha taha kuo pekia.
-
ʻE lava ha taha kuo maʻu ʻenitaumeni pea ʻi ai haʻane lekomeni temipale kei ʻaonga ʻo hoko ko ha fakamoʻoni ki he ngaahi ouau silá, moʻuí mo e fakafofongá.
-
ʻE lava ke hoko ha mēmipa ʻo e Siasí kuo ʻosi papitaiso ko ha fakamoʻoni ki ha papitaiso ʻo ha taha moʻui. ʻOku fekauʻaki ʻa e ngaahi liliú ni mo e ngaahi papitaiso kotoa pē ʻi tuʻa he temipalé.
Ko e ngaahi liliu fakatuʻutuʻuni ko ʻení ko e founga fakangāue pē. ʻOku ʻikai liliu ai e tefitoʻi tokāteliné mo e ngaahi fuakavá. ʻOku nau mahuʻinga tatau ʻi he ngaahi ouaú. ʻOku totonu ke faitokonia lahi ʻe he ngaahi liliú ni e kau ʻa e fāmilí ʻi he ngaahi ouau ko ʻení.
ʻOku ou toe fie lea foki kiate kimoutolu he taimí ni ke fakafeʻiloaki atu e ngaahi liliu fekauʻaki mo hotau toʻu tupú mo honau kau takí.
Te mou manatuʻi, naʻá ku fakaafeʻi e toʻu tupu ʻo e Siasi ʻo Sīsū Kalaisi ʻo e Kau Māʻoniʻoni ʻi he Ngaahi ʻAho Kimui Ní ke nau kau ʻi he kongakau ʻo e toʻu tupu ʻa e ʻEikí, ke nau kau ʻi he ngāue maʻongoʻonga taha ʻi he māmaní he ʻahó ni—ko hono tānaki ʻo ʻIsilelí.1. Naʻá ku fakahoko e fakafé ni ki hotau toʻu tupú koeʻuhí he ʻoku makehe ʻenau mohufounga ʻi hono tokoniʻi ʻo e niʻihi kehé mo e vahevahe ʻo e meʻa ʻoku nau tui ki aí ʻi ha founga mahino. Ko e ngāue ʻo e tānakí ko ha konga mahuʻinga ia ʻo e tokoni ke teuteu ʻa māmani mo hono kakaí ki he Hāʻele ʻAngaua Mai ʻa e ʻEikí.
ʻOku taki e kongakau ʻo e toʻu tupu ʻa e ʻEikí ʻi he uooti takitaha ʻe ha pīsope, ko ha tamaioʻeiki faivelenga ʻa e ʻOtuá. Ko hono fuofua fatongia mo mahuʻinga tahá ke tokangaʻi e kau talavou mo e kau finemui ʻo hono uōtí. ʻOku tataki ʻe he pīsopé mo hono ongo tokoní e ngāue ʻa e ngaahi kōlomu ʻo e Lakanga Taulaʻeiki Faka-ʻĒloné mo e ngaahi kalasi ʻa e Kau Finemuí ʻi he uōtí.
ʻOku fakataumuʻa ʻa e ngaahi liliu ʻoku mau fakahoko atu ko ʻení ke tokoniʻi ʻa e kau talavoú mo e kau finemuí ke nau fakatupulaki honau tuʻunga fakataautaha toputapu ke aʻusiá. ʻOku mau loto foki ke fakamālohia e ngaahi kōlomu ʻo e Lakanga Taulaʻeiki Faka-ʻĒloné pea mo e ngaahi kalasi ʻa e Kau Finemuí mo poupou ki he kau pīsopé mo e kau taki lalahi kehé ʻi heʻenau tokoniʻi e toʻutangata kei tupu hake ko ʻení.
ʻE fakamatalaʻi atu he taimí ni ʻe ʻEletā Kuenitini L. Kuki ʻa e ngaahi liliu ʻoku fekauʻaki mo e kau talavoú. Pea ʻi he fakataha lahi ʻa e kakai fefiné he pōní, ʻe fakamatalaʻi ai ʻe Sisitā Poni H. Kōtoni, ko e Palesiteni Lahi ʻo e Kau Finemuí, ʻa e ngaahi liliu fekauʻaki mo e kau finemuí.
ʻOku kau fakataha ʻa e Kau Palesitenisī ʻUluakí mo e Toko Hongofulu Mā Uá ʻi hono poupouʻi ʻa e ngaahi ngāue ko ʻeni ke fakaivia hotau toʻu tupú. Hono ʻikai ke tau ʻofa mo lotua kinautolu! Ko kinautolú ko e [“ʻamanakiʻanga ʻo ʻIsilelí, ko e kautau ʻo Saione, ko e fānau ʻo e ʻaho kuo talaʻofá].”2 ʻOku fakahoko atu ʻemau falala kakato ki hotau toʻu tupú pea mo ʻemau houngaʻia ʻiate kinautolu. ʻI he huafa toputapu ʻo Sīsū Kalaisí, ʻēmeni.