Liliu ki he Ngaahi Fehuʻi ki he Lekomení mo e Ngaahi Ongoongo Kehe ʻo e Temipalé

Naʻe ʻoatu ʻa e ngaahi fakamatala fakamuimuitaha ki he ngaahi fehuʻi ʻinitaviu ki he lekomeni temipalé ʻe Palesiteni Lāsolo M. Nalesoni lolotonga e konifelenisi lahi ʻo ʻOkatopa 2019 (vakai, peesi 121). ʻOku kei tatau pē ʻa e ngaahi tuʻunga moʻui ʻo e temipalé, ka kuo fakalea foʻou ʻa e ngaahi fehuʻi ʻe niʻihi ke toe mahino ange. ʻOku totonu ke ʻosi maʻu ʻe he kau taki taau ʻo e Siasí ha tohi mei he Kau Palesitenisī ʻUluakí naʻe fai ʻi he ʻaho 6 ʻo ʻOkatopa 2019, ʻa ia ʻoku kau ai ʻa e ngaahi fakamatala fakamuimuitaha ki he ngaahi fehuʻí.

Naʻe toe fanongonongo foki ʻe Palesiteni Nalesoni ha palani ki ha ngaahi temipale foʻou ʻe valu. (vakai, peesi 79). ʻE langa ʻa e ngaahi temipale foʻoú ʻi Freetown, Sierra Leone; Port Moresby, Papua New Guinea; Bentonville, Arkansas, USA; Bacolod, Philippines; McAllen, Texas, USA; Cobán, Guatemala; and Orem and Taylorsville, Utah, USA.

Talu mei he konifelenisi lahi ʻo ʻEpeleli 2019, kuo fakatapui ha ngaahi temipale ʻi Kinshasha, Democratic Republic of the Congo; Lisbon, Portugal; Port-au-Prince, Haiti; mo Fortaleza, Brazil; pea toe fakatapui ʻi Oakland, California, USA; Memphis, Tennessee, USA; Frankfurt, Germany; Oklahoma City, Oklahoma, USA; mo Raleigh, North Carolina, USA.

Naʻe tanupou ha ngaahi temipale ʻi Yigo, Guam; Praia, Cabo Verde; San Juan, Puerto Rico; Lima, Peru (Los Olivos); mo Belém, Brazil, mo e ngaahi feituʻu naʻe fili ki ha ngaahi temipale ʻi Auckland, New Zealand, mo Layton mo Saratoga Springs, Utah, USA.

Naʻe fakahā ki he kakaí ʻa e ngaahi palani ki hono fakaleleiʻi ʻo e Temipale Salt Lake, ʻa ia ʻe tāpuni ʻi Tīsema pea toki toe fakaava ʻi he 2024, pea mo e Temipale St. George Utah, ʻa ia ʻe tāpuni ʻi Nōvema 2019 pea ʻe toki toe fakaava ʻi he 2022.