Fakafeʻiloaki ʻe he Kau Takí ʻa e Polokalama Foʻoú ʻa e Fānaú mo e Toʻu Tupú
ʻE fakahoko ʻi Sānuali 2020 ʻa e Fānaú mo e Toʻu Tupú ke tokoni ki ha kakai kei talavou ke nau muimui ki he Fakamoʻuí ʻi heʻenau tupulaki fakalaumālié, fakasōsiale, fakatuʻasino, mo fakaeʻatamaí. Ki he ngaahi lea ʻi he makasini ko ʻeni ʻoku aleaʻi ai ʻa e Fānaú mo e Toʻu Tupú, vakai ki he peesi 40 mo e 53..
Naʻe lea ʻa Palesiteni Lāsolo M. Nalesoni ʻi ha fakamafola makehe ʻi he ʻaho 29 ʻo Sepitema 2019 ʻo pehē, “Kuo hokosia eni e taimí ki ha founga foʻou, kuo fokotuʻutuʻu ke tokoni ki he fānau mo e toʻu tupu ʻi he funga ʻo e māmaní he ʻaho ní.”
Naʻá ne pehē ki he fānaú mo e toʻu tupú, “Makehe mei hono ʻoatu ha ngāue lahi tuʻupau, ʻoku mau fakaafeʻi kimoutolu ke fealēleaʻaki mo e ʻEikí ki he founga te ke tupulaki ʻi ha founga ʻoku napangapangamālié. ʻE hoko ia ko e tāpuaki pea fakafiefia, ka ʻe fie maʻu foki ke ke fai ha ngāue. ʻE fie maʻu ke ke fekumi ki ha fakahā fakatāutaha. ʻE fie maʻu ke ke fili e founga ke ke ngāueʻi ai iá. Taimi ʻe niʻihi, ʻe ueʻi koe ʻe he Laumālié ke fai ha ngaahi meʻa faingataʻa. ʻOku ou tui kuo mou mateuteu ki he pole ko iá. Te ke lava ʻo fakahoko e ngaahi meʻa ʻoku faingataʻá.”
Naʻe pehē foki ʻe Palesiteni Nalesoni ʻoku maʻu ʻe he mātuʻá ha fatongia mahuʻinga ke fai. Naʻá ne pehē, “Mou fakatupulaki ha ngaahi vā fetuʻutaki mālohí mo hoʻomou fānaú mo e toʻu tupú.” ʻE lava e kau takí ʻo e siasí ʻo tokoni, ka ko hoʻomou fānaú ʻeni. He ʻikai ha taha te ne maʻu ha ivi tākiekina ʻe mālohi ange ki heʻenau lavameʻá ka ko koe. ʻOfaʻi, poupouʻi, mo faleʻi kinautolu, kae fakaʻehiʻehi mei hono fakahoko ʻo e ngaahi ngāué maʻanautolú. Te nau lelei ange ʻi heʻenau tauʻatāina ke filí.
Naʻe hoko atu ʻa Palesiteni Nalesoni ʻo pehē, “ʻOku ʻoatu foki e faleʻí ni ki heʻetau kau taki mo e kau faiako lelei ʻo ʻetau fānaú mo e toʻu tupú.” “ʻOku fie maʻu ke tau tuku e toʻu tupú ke nau tataki, kae tautautefito kiate kinautolu kuo ui mo vaheʻi ke ngāue he kau palesitenisī fakakalasi mo fakakōlomú. Kuo ʻosi foaki kiate kinautolu ʻa e mafai ʻo e Lakanga Fakataulaʻeikí. Te nau ako ke maʻu ha ueʻi fakalaumālie ki hono tataki ʻenau kalasí pe kōlomú.”
ʻI he polokalama tatau pē, naʻe fakafeʻiloaki ai ʻe Palesiteni M. Lāsolo Pālati, ko e Palesiteni Leʻoleʻo ʻo e Kōlomu ʻo e Kau ʻAposetolo ʻe Toko Hongfulu Mā Uá, ʻa e vīsone ʻo e Fānaú mo e Toʻu Tupú: ke “fakamālohia ʻa e tui ʻa e toʻu tangata kei tupu haké kia Sīsū Kalaisi, mo tokoni ki he fānaú, toʻu tupú, mo honau fāmilí ke fakalakalaka ʻi he hala ʻo e fuakavá ʻi heʻenau fehangahangai mo e ngaahi pole ʻo e moʻui ní.”1 Naʻá ne pehē ko hono “tokoniʻi ʻe fānaú mo e toʻu tupú ke maʻu ha fakamoʻoni kia Sīsū Kalaisí ʻa ia te ne tāpuekina ʻetau moʻuí kotoa.”
Hili e kau mai ʻa e toʻu tupú ki he fakamafolá naʻa nau toe kau ʻi ha ʻekitivitī ke fakatātaaʻi hono ngāue ʻaki ʻo e Talateu ʻo e Tohi Fakahinohino maʻá e Fānaú mo e Toʻu Tupú, naʻe pehē ʻe Palesiteni Pālati: Ko e kamataʻangá pē ʻeni. ʻI he ʻahó ni, ʻoku tau toki kamata pē ʻi he ʻekitivitī ko ʻení. Ko ha meʻa ʻeni ʻe hokohoko atu ʻi homou fāmilí pea ʻi hoʻomou ngāue fakatahá. ʻOku mau fakaafeʻi kimoutolu ke mou hoko atu hono fakahoko e ʻekitivitií. … Mātuʻa, kātaki ʻo hoko atu ʻeni ʻi ʻapi. Naʻá ne fakamamafaʻi “ko ha polokalama ʻeni ʻoku fakatefito ʻi ʻapi, pea poupouʻi ʻe he Siasí” pea “ʻoku kau fakataha ʻa e ngaahi fāmilí ʻi he polokalama ko ʻení. Ko e founga ia ʻe ola lelei aí.”
ʻOku maʻu foki ʻe he mātuʻá mo e kau takí ʻenau tohi talateu ki he fakahinohinó ʻi he ngaahi feituʻu lahi ʻo māmani. ʻE liliu ʻa e Fānaú mo e Toʻu Tupú ʻi he ngaahi feituʻu kehé ki heʻenau ngaahi lea fakafonuá ʻamui ange ʻi he 2020.
ʻE hoko hono ako ʻo e ongoongoleleí, ngāue tokoní mo e ngaahi ʻekitivitií,, mo e fakalakalaka fakatāutahá (kau ai hono fokotuʻu mo lavaʻi ha ngaahi taumuʻa) ko e ngaahi konga mahuʻinga ia ʻo e Fānaú mo e Toʻu Tupú, pea ʻoku totonu ke taki ʻa e toʻu tupú ʻi hono palaní. ʻOku fekumi ʻa e fānaú mo e toʻu tupú ki ha fakahā fakatāutaha ʻi heʻenau tupulaki ʻi he hala ʻo e fuakavá, mo e poupou mei he fāmilí, kau takí, mo e niʻihi kehé. Naʻe fakatokangaʻi ʻe Palesiteni Pālati ko e Fānaú mo e Toʻu Tupú ko ha polokalama fakamāmanilahi ia pea ko ia ai ʻoku feliliuaki ʻo fakatatau ki he “feituʻu ʻokú ke nofo aí mo e ngaahi tūkunga fakafāmilí.”
ʻE ʻoatu ha toe ngaahi fakaikiiki mo e ngaahi maʻuʻanga tokoní ʻi ha fakamafola Face to Face maʻá e fānaú mo e toʻu tupú ʻi he ʻaho 17 ʻo Nōvema 2019, kau ai ʻa ʻEletā Kēliti W. Kongo ʻo e Kōlomu ʻo e Kau ʻAposetolo ʻe Toko Hongofulu Mā Uá. ʻOku fakaafeʻi atu ʻa e fānau te nau taʻu 8 ki he taʻu 18 lolotonga ʻa e 2020, ʻenau mātuʻá, mo e kau taki ʻo e Kau Finemuí, kau ʻetivaisa ʻo e Lakanga Taulaʻeiki Faka-ʻĒloné, mo e kau taki ʻo e Palaimelí ke nau kau mai. Fakahū mai hoʻo ngaahi fehuʻi fekauʻaki mo e polokalama ʻa e Fānaú mo e Toʻu Tupú kia Elder Gong ʻi he facetoface. ChurchofJesusChrist.org. Hili e polokalama ʻe fakamafola fakahangatonu atu ʻi he ngaahi lea fakafonua ʻe 18, ʻe ʻākaivi koeʻuhí ke lava fakamafola atu pe download ʻi ha faʻahinga taimi pē.