Sa Digital Lamang: Mga Young Adult
Pagpangita og Paglaum diha sa Pinakasentro Gayud
Dihang natay-og sa hilabahin ang Italy sa COVID-19, nakakaplag ko og rason aron makahawid diha sa paglaum.
Ang tagsulat nagpuyo sa Catanzaro, Italy.
Ganahan ko sa makapahupay nga mga pulong nga gipaambit ni Jesus sa Iyang mga disipulo human sa Iyang Pagkabanhaw: “Ang Kalinaw magauban kaninyo” (Juan 20:19). Dili ba makahingangha nga ang atong Manluluwas kanunayng misaad og kalinaw sa Iyang mga sumusunod? Usa ka espesyal nakong kasinatian nagpahinumdom kanako niini nga kamatuoran.
Mabalak-on ug Gi-quarantine
Usa ka gabii samtang nagtan-aw sa TV, ang mga tigbalita naghisgot mahitungod sa COVID-19 ug sa epekto niini sa Italy, diin ako nagpuyo. Gihisgutan nila ang mahitungod sa daghang mga tawo nga nangamatay gikan sa kagaw ug sa nagkadaghan nga kumpirmadong nataptan. Bisan tuod og makapalisang kini, wala kaayo ko mabalaka mahitungod niini. Apan paglabay sa duha ka semana, migrabe pag-ayo ang kahimtang, ug mao usab ang akong kabalaka.
Mibati ako og kasubo ug kataranta taliwala niining tanan. Nabalaka kaayo ko nga magkasakit. Ug sa unang higayon sa akong kinabuhi, nahadlok ko nga moadto sa trabahoan. Magsul-ob gyud ko og gwantes ug mask sa matag higayon nga mogawas ko. Paglabay sa usa ka semana, ang tibuok nakong nasud gisarado ug ang tanan gipaubos sa hugot nga quarantine.
Niining higayona dili kami tugutan nga mobiya sa among mga balay gawas sa pag-grocery kausa sa usa ka semana. Lisud ang matanggong sa sulod. Tanang mga miting sa Simbahan temporaryong gipahunong, ug samtang kana nakapaguol kanako, ang labaw nga nakapahugno kanako mao ang pagsirado sa mga templo kay nagplano ko nga motambong sa sealing sa usa ka pamilya nga akong gitudloan sa akong misyon. Akong gibati ang hilabihang kasubo ug ang kawalay paglaum tungod sa mga kahimtang sa kalibutan.
Natandog tungod sa Musika
Usa ka buntag samtang nagbasa ko sa mga kasulatan ug naminaw sa kanta nga gitawag og “Kalinaw diha ni Kristo,” nag-ampo ko ug mihangyo sa Langitnong Amahan, “Unsaon man nako sa paghawid uban sa paglaum atol niining malisud nga panahon?”
Ug mao kadtong higayona nga gisugdan nako ang pagpaminaw og maayo sa mga pulong sa kanta:
Modasig S’ya
Sa nagluya.
Molig-on S’ya
Kon naglisud ta.
Motabang S’ya
Kon sulayan ta.
Kon walay kalinaw,
Kang Kristo duna.1
Akong gibati ang Espiritu nga mipamatuod kanako nga kini nga mga pulong tinuod. Gipasiplatan nako ang akong karaang missionary name tag ug nadungog kini nga mga pulong sa akong hunahuna: “Romina, gusto ko nga maangkon nimo ang susamang kalinaw nga imong gihatag sa uban sa imong misyon pinaagi sa pagpaambit sa akong mensahe sa paglaum. Ma-OK ra unya ang tanan. Dili ko kamo talikdan nga mag-inusara.”
Mao nga karon, gusto kong mopaambit niana nga mensahe sa paglaum! Bisan tuod og ako mibati sa hilabihan nga kahadlok ug kabalaka atol niini nga panahon sa kalisud sa kalibutan, sa pagkatinuod ako nasayud nga diha kang Jesukristo, adunay paglaum! Dangup ngadto Kaniya. Paminaw Kaniya. Sunda Siya. Makakaplag kita og kalinaw diha Kaniya. Adunay gahum diha sa pagtuo Kaniya, ug kon kamo mobuhat, Siya mohatag kaninyo sa kalig-on nga magpadayon sa paglaum (tan-awa sa Ether 12:4).
Paghawid ngadto sa Paglaum
Sa paghisgot mahitungod sa paglaum, si Elder Dieter F. Uchtdorf sa Korum sa Napulog Duha ka mga Apostoles mitudlo, nga ang “Paglaum sa Dios, sa Iyang kaayo, ug sa Iyang gahum nagbag-o kanato uban sa kaisug atol sa lisud nga mga hagit.”2 Sa ingon niining tingali makahadlok nga panahon, pwede natong pilion ang kaisug ug pagsalig sa mga saad sa Ginoo. Kon ang kinabuhi mahagiton, wala kinahanglana nga mangayo kita sa Langitnong Amahan sa pag-usab sa atong mga kahimtang, hinoon, kita makahangyo Kaniya sa pag-usab sa atong mga kinaiya. Makakat-on kita ug molambo sa bisan unsang sitwasyon.
Nasayud ko nga ang Dios nag-uban kanato ug nga Siya nahigugma sa Iyang mga anak — bisan niadtong kinsa anaa sa pinakasentro sa sakit nga mikatap [pandemic] sa tibuok kalibutan. Nasayud ako nga pinaagi Kaniya, ang tanan ma-OK ra. Ug nasayud ako nga ako makahawid ra kanunay sa kalinaw nga moabut pinaagi sa pagtuo kang Jesukristo. Tungod sa Iyang walay kinutuban nga Pag-ula, dili ako moatubang sa mga kalisdanan nga mag-inusara.