Sa Digital Lamang: Mga Young Adult
Naglantaw nga Ma-seal sa Umaabot
Bisan og nausab ang among mga plano, mas nagkasuod kami ug ngadto sa Dios.
Litrato sa mga modelo
Ang tagsulat nagpuyo sa Kantō, Japan.
Ang akong pamanhunon ug ako magpa-seal karong bulana sa Templo sa Sapporo Japan. Dayon ang mga kahimtang nagsugod sa pagkausab tungod sa coronavirus. Uban sa matag motumaw nga walay kasiguroan, mangita ko og tabang nga giya sa Dios pinaagi sa pag-ampo, pagbasa sa mga kasulatan, ug pagpaminaw sa mga pakigpulong sa kinatibuk-ang komperensya. Gibalik-balik ko kini nga proseso sa makadaghan samtang mihimo ako og mga desisyon mahitungod sa umaabut. Sa katapusan, gisirado ang mga templo. Karon nagpaabut pa gihapon kami nga ma-seal. Apan akong nakita giunsa kami sa pagtabang sa Dios nga makalabang niining lisud nga panahon.
Mga Panalangin taliwala sa Kawalay Kasigurohan
Sa pagkatinuod, lisud kini nga kasinatian. Apan nakasinati sab ko og daghang panalangin. Ang pagsulat sa journal nakatabang nako sa pag-ila niadtong mga panalangin ug nahimo kining dako nga katagbawan atol niining malisud nga panahon.
Usa ka panalangin nga akong nakita mao nga ang kasuod tali kanako ug sa akong pamanhunon nagkalig-on. Siya ug ako nagpuyo sa managlahing dapit, nagpuyo sa managbulag nga kinabuhi, ug dili mahimo nga magkauban. Apan nakahukom kami nga magdungan sa pag-ampo ug maghisgot sa mga butang nga among nakat-unan gikan sa among pagtuon sa ebanghelyo. Mihimo kaming duha og mga desisyon. Bisan og pabilin kaming managlagyo, nagkalig-on ang among kasuod, ug daw naa ra siya sa duol.
Padayon sa Unahan
Sa katapusan, nakahukom mi nga magminyo sa sibil nga paagi. Wala ko kahibalo kon kanus-a kami ma-seal sa templo, apan mahinamon ako niini.
Nagtuo ko nga duna pa koy daghan nga angayang makat-unan gikan niining sakit nga mikatap sa tibuok kalibutan. Misalig ko nga ang Ginoo adunay plano alang sa atong mahangturong kaayohan, bisan unsa pay mahitabo sa kalibutan nga naglibut kanato—“kay siya nahigugma sa kalibutan, gani siya mitugyan sa iyang kaugalingong kinabuhi aron siya makadani sa tanan nga mga tawo ngadto kaniya” (2 Nephi 26:24).
Mituo ako nga ang Ginoo gustong motabang natong tanan sa pagkaplag og kalipay atol niining lisud nga sitwasyon. Nakita na nako ang kalinaw sa pagtan-aw sa mga panalangin nga anaa kanako. Kon kamo nag-atubang og susamang mga pagsulay karon, ayaw pagpakawala sa paglaum. Kay bisan kini nga sakit nga mikatap sa tibuok kalibutan makapalig-on sa inyong pagpamatuod.