Sa Digital Lamang: Mga Young Adult
Upat ka mga Leksyon sa Kahayag alang sa Mangitngit nga mga Panahon
Samtang ang sakit nga mikatap sa tibuok kalibutan mihulga sama sa mangitngit nga panganod ibabaw sa kalibutan, sa gihapon adunay mga paagi aron modan-ag ang kahayag.
Ang tagsulat nagpuyo sa Voronezh Oblast, Russia.
Samtang nagpasuroy-suroy ko sa akong iro bag-o lang, nakabantay ko og naglagitom nga panganod nga dunay milapos nga mga kasanag sa silaw sa adlaw. Nakapahinumdom kini kanako sa kasamtangang sakit nga mikatap sa tibuok kalibutan. Bisan og ang mga kahimtang daw mangitngit ug naglagitom sama sa panganod, ang gugma sa Ginoo mas labaw kagamhanan, sama sa adlaw.
Usa ka komon nga Ingles nga panultihon nag-ingon “Ang matag panganod adunay mahayag nga kilid [silver lining],” nagpasabut nga tanan nga kalisdanan makatudlo kanato og butang nga makaayo. Samtang naghunahuna ko unsay nakatabang nako nga magpabiling kalma atol sa nangaging pipila ka bulan ug unsay wala kaayo makatabang, nakaamgo ko nga adunay upat ka importanting mga kamatuoran nga akong gibati nga magpadayon sa pagpanalangin sa akong kinabuhi pagkahuman niini nga krisis.
1. Adunay Kasiguroan sa Pagsunod sa Propeta
Ang mga social media post mahitungod sa katapusan sa kalibutan ug ang dili tinuod nga mga report mahitungod sa mamugnaong mga paagi sa pagwagtang sa kagaw [virus] wala mohatag kanako og maayong pagbati mahitungod sa kinabuhi. Bisan og kini nga mga mensahe gituyo aron sa pagtabang sa katawhan nga magpabiling luwas ug himsog, mas nagpalisang hinoon kini kanako. Sama pananglit, human makakita sa ikaunom nga istorya mahitungod sa kon sa unsang paagi ang pihong mga panglamas makapatay sa coronavirus, nahinumdom ko sa akong kaguol kon kami duna bay igong suplay sa mga panglamas sa among tipiganan, dugang sa akong paghunahuna kon hapit na ba ang akong kamatayon.
Atol sa kinatibuk-ang komperensya sa mga tuig nga milabay, si Presidente Russell M. Nelson midapit kanato sa pag-apil sa 10 ka adlaw nga puasa gikan sa bisan unsang media nga nagdala og negatibo ug law-ay nga mga hunahuna sa akong hunahuna.1 Ang iyang tambag susama og usa ka pasidaan kanako, mao nga mihunong ko sa paggamit sa duha ka mga app sa social media nga mihurot ra sa akong libre nga panahon. Mas malipayon na ko ug dili na kaayo mabalak-on.
Karon akong naamguhan nga ako nagkinahanglang molimpyo sa akong mga kinaiya sa paggamit sa digital. Akong gihanduraw dala ang kahibulong ug katingala: Nahibalo ba diay si Presidente Nelson nga ang social media posibling maoy tinubdan sa pagkawala sa paglaum ug pagkanegatibo karon, niining panahon sa krisis? Tinuod gayud nga adunay kasiguroan sa pagsunod sa propeta. Ang mga pulong sa atong mga lider sa Simbahan susama sa usa ka silaw sa adlaw, nga mibaraw sa mga kalibug ug midan-ag sa dalan sa kalinaw.
2. Ang Pagpangandam Moharong sa Kahadlok
Ang ubang butang nga naghimo kanakong dili mahimutang mao ang pagkadungog sa mga tawo kinsa, sama sa kapanahunan ni Noe, mibugal-bugal sa uban sa ilang pagpangandam ug katin-aw sa pangisip. Sa akong tan-aw ang ubang mga tawo nagpalambo og danghag nga mga kinaiya mahitungod sa umaabut. Kadtong tinuod nga manggialamon mosunod sa tambag sa mga propeta ug mainampingong maningkamot nga makabarug pinaagi sa kaugalingong pagpaningkamot.
Sulod sa katuigan, ang mga lider sa Simbahan mitudlo kanato sa dili pagpangutang, sa pag-angkon og edukasyon aron mas makasangkap sa atong kaugalingon ug sa uban, aron adunay matipig nga pagkaon ug tubig, ug pagtigom og kwarta kon mahimo. Nahibalo ko nga managlahi ang matag sitwasyon, ug ang ubang mga nasud dili motugot sa mga lumulupyo sa pagtipig og pagkaon o ubang pisikal nga mga suplay. Apan bisan nianang mga matang sa mga pagdili, ingon og ang matag usa nato masayud sa butang nga atong mahimo aron mas maandam alang sa umaabut.
Mas mobati ko nga luwas kon naningkamot ko nga magmasulundon ug makaduol sa Ginoo nga may pagsalig kon mangayo ko og tabang. Kini nga pagpangandam susama sa lahi nga silaw sa adlaw, nga milahap sa kahadlok ug misiguro sa paglaum.
3. Ang Kinaiya Makahimo og Kalainan
Kini nga sakit nga mikatap sa tibuok kalibutan naghimo kanakong mas mapasalamaton sa mga tawo nga miawhag kanako pinaagi sa makadasig nga mga mensahe, espirituhanong mga panabut, ug maayong mga pasiaw. Kining minahal nga mga higala kanunay nga mihayag sa akong adlaw. Nagpahinumdom sila kanako nga kita makapili kon unsaon nato sa pagsanong ang bisan unsang panghitabo sa atong palibut.
Gipaningkamutan nako nga masunod kini nga ehemplo dihang gihunong ang mga miting sa Simbahan. Imbis monunot sa diha-diha nakong mga pangutana nga “ngano” ug “unsaon”, gipili nako nga tutukan ang positibong mga aspeto sa nakasentro sa panimalay nga pagkat-on sa ebanghelyo. Karon nakita na nako nga ang tinuoray nga pagbaton og positibong kinaiya, bisan lisud man usahay, nakatabang nga ako magpabiling lig-on sa espiritwal nga paagi kay sa magpabiling mao lang gihapon kon gipasagdan nako nga ang kayugot maoy mopatigbabaw. Sama sa ikatulong silaw sa kahayag sa adlaw, ang maayong kinaiya mowagtang sa pagduhaduha ug mopalagsik sa atong mga kalag.
4. Ang Espiritu Santo Usa Ka Gamhanang Kaabay
Usa ka adlaw dihang mibati ko og kaguol ug kasubo, mihukom ko nga maminaw sa channel sa Tabernacle Choir sa internet. Ang musika kanunay nagtabang kanako nga mobati sa impluwensya sa Espiritu Santo. Dunay live chat sa channel, ug makalingaw ang pagtan-aw sa mga tawo nga mopahayag sa ilang gugma ug pasalamat gikan sa tibuok kalibutan! Akong gibati nga ako kauban nila. Samtang ang impluwensya sa Espiritu Santo mihupay sa nagngutngot nakong kasingkasing, mas nalipay ko ug narelaks.
Kanunay kong makamatikod nga kon maningkamot ko sa pagdapit sa Espiritu Santo sa akong kinabuhi, motabang Siya nako sa bisan unsay akong gikinahanglan. Siya ang gamhanang kaabay kinsa gusto kaayong magdala kanato og mga gasa sa kalinaw, kahupayan, ug panabut. Sama sa usa ka silaw sa kahayag sa adlaw, pwede Niyang bungkagon ang kangitngit ug ipadayag unsay tinuod.
Pangitaa ang Silaw sa Adlaw
Ang Ginoo mas kusgan sa bisan unsang kalisdanan. Sama sa giingon sa ikaduhang bersikulo sa himno 46:
Ang Dios kahayag; sa ngit-ngit kong panaw,
Pagtuo ko lig-on kay sa panan-aw
Mohangad kang Jesus nga nagamando.
Nganong sa kangit-ngit ako magtago?2
Unta managkauban kita sa paglakaw karon. Kita pweding mohangad sa langit, nga maputos sa silaw sa adlaw, ug maghisgot mahitungod sa mga kamatuoran nga midan-ag sa atong kinabuhi. Sigurado ko nga duna kay talagsaong mga ideya sa pagpaambit niana nga kahayag ngadto sa uban. Tingali mahanduraw nimo ang usa ka paglakat nga sama niini sa sunod higayon nga ang emosyonal nga mga unos mopuno sa kapunawpunawan. Ang Ginoo anaa uban kanato, ug dili kita angayang mahadlok.