Sa Digital Lamang: Mga Young Adult

Alang sa Wala Damhang Ma-Reassign nga Misyonaryo

Ni Amy Davis

Ang imong misyon may kalit ba nga kausaban? Aniay mga sugyot gikan sa tawo kinsa nakasabut og gamay sa unsay imong gisinati.

Imahe

Babaye nga nagbasa og mga kasulatan

Ang tagsulat nagpuyo sa Utah, USA.

Daghan kaninyong mga misyonaryo wala diha sa unsay inyong gilauman karon—nga naghulat aron masayud unsay bag-o ninyong assignment, o tingali papaulion. Ang pagtan-aw niining mga gisugilon nga istorya nagdala og maanindot nga mga panumduman sa akong kaugalingong kasinatian sa misyon mga tuig nang milabay. Naghunahuna ko nga tingali pwede kong mopaambit og pipila ka mga panglantaw nga posibling makatabang, gikan sa usa ka wala damhang na-reassign nga misyonaryo ngadto sa lain.

Usa ka Pagbakwit sa Albania

Sa sayong bahin sa tuig 1997, misyonaryo ko sa Albania. Ako ug ang akong mga kompanyon ganahan kaayo sa kabaryohan [countryside], sa lamiang keso ug agbati nga mga pie, ug ang tunog sa sinultihan nga gipaningkamutan namo nga makat-unan. Labaw sa tanan, ganahan kaayo kaming makigtrabaho sa mga tawo didto.

Paglabay sa panahon, ang kahimtang sa politika sa among palibut misamot nga makapabalaka. Gipaningkamutan namo nga magpabiling naka-focus sa pagpaambit sa ebanghelyo apan dili makapugong sa pagkadungog og mga balita mahitungod sa mga rebelde nga pwersa nga nagkalig-on tadlas sa nasud. Dayon ang gobyerno miimplementar og mga curfew, ug ang mga butang nagsugod sa pagkabayolente. Ang nasud nag-ungaw sa sibil nga gubat.

Sa katapusan, niadtong Marso 14, ang among tibuok nga misyon gipabakwit. Dili gayud nako makalimtan ang tawag sa telepono nga nagsulti kanamo nga oras na sa pagpundok aron madali dayon mi sa pagbiya gikan sa nasud. Nagkasukwahing mga panghunahuna ug pagbati mituyok sa akong hunahuna. Siyempre gusto ko og kasigurohan, apan ang hunahuna nga mobiya sa mga pamilya nga nakat-unan na namong higugmaon, labi na niadtong samok nga sitwasyon, nakapahugno kanako. Wala gani kami panahon sa pagpanamilit.

Ang among panaw gawas sa nasud naglakip sa usa ka pagsakay og helikopter ngadto sa eroplano dayon usa ka mubo nga pagbalhin sa Italya sa wala pa i-reassign sa managlahing mga misyon. Miabut ko sa England. Pas-pas kaayo kadto, ug may gamay nga kahinam, apan sa kasagaran lisud gayud. Usa sa akong katapusang panumduman sa Albania mao ang pagtan-aw sa landscape ubos sa helicopter nga nagkagamay, nabalaka kon unsay dangatan sa mga tawo nga among gipangbiyaan.

Pagpangita og Kalinaw

Samtang ang mga detalye sa inyong mga kasinatian lahi sa akoa, sigurado ko nga pipila kaninyo mibati karon og susamang dili masabut nga mga emosyon. Mao nga nanghinaot ko nga ang akong sunod nga ipaambit pamilyar usab diha kaninyo. Aniay unom ka baruganan nga nakatabang kanako nga makakaplag og kalinaw human sa makapakurat nga mga kausaban sa akong full-time nga misyonaryo nga kasinatian.

Pakigkonektar sa uban. Posibling kamo may subo ug libug nga mga pagbati nga nakapahimo kaninyo nga gustong mopalayo sa uban. Apan importante nga magpadayong konektado, ilabi na sa mosunod nga mubong panahon samtang nag-adjust pa kamo. Pakig-istorya niadtong mapinanggaong mga tawo kinsa makatabang nga mapadayon ang imong kadasig. Tungod sa teknolohiya nga anaa karon, wala gayuy dili mahimo! Tingali makakita ka og tawo nga mobansay sa imong kahanas sa lahi nga pinulongan. Pwede sab nimong kontakon kadtong imong mga naserbisyuhan ug natudloan. Bisan og sa pagkakaron mobati ka nga walay labut, wala ka mag-inusara. Bisan og ang imong pamilya ug mga higala wala mahibalo sa unsang paagi ka nila masuportahan sa hingpit, sigurado ko nga kadaghanan nila tinuoray nga naghunahuna kanimo ug gusto nga ikaw OK ra.
Ipadayon ang pagpaambit sa imong pagpamatuod. Bisan og asa ka mang dapita samtang gibasa nimo kini, wala akoy pagduhaduha nga ikaw gilibutan og mga tawo kinsa mapanalanginan tungod sa imong lahi nga panglantaw. Ayaw kaulaw sa pagpaambit sa unsay imong nakat-unan ug gibati isip full-time nga misyonaryo—bisan unsa man kadugay o kamubo sa imong panahon “diha sa nataran sa misyon”. Samtang imong iproseso ang mga bag-ong panghitabo ug moila sa kamot sa Dios diha sa imong kinabuhi, ipaambit kana nga mga katumanan ngadto sa imong mga minahal. Tingali ang usa ka nakat-unan nga leksyon gikan sa imong panimpalad mao gayud ang tukmang butang nga kinahanglang madungog sa uban.
Saligi nga ang Langitnong Amahan nakaila kanimo. Tag-ana kon unsa? Nahibalo ang Dios nga mahitabo kini! Nahibalo Siya sa tanang panghitabo sa imong kinabuhi. Ug ang imong Manluluwas, si Jesukristo, nakasabut sa tukma gayud sa unsay imong gibati. Kauban nimo Sila samtang ikaw maglakaw niini nga dalan ug makahupay kanimo pinaagi sa Espiritu Santo. Ang sakit nga mga pagbati posibling molungtad og dugay, ug kana OK ra. Saligi ang Ginoo dihang Siya miingon, “Ako anaa sa inyong tuo nga kamot ug sa inyong walà, ug ang akong Espiritu mahimo nga anaa sa inyong mga kasingkasing, ug ang akong mga anghel anaa libut kaninyo, aron sa pagtabang kaninyo” (Doktrina ug mga Pakigsaad 84:88).
Pagmapailubon samtang ikaw nagbangutan. Ikaw ba mibati og kapungot? Kaguol? Kasagmuyo? O naghunahuna nga, “Dili kini makiangayon!”? Tingali mibati ka og hingpit ka lahi nga mga emosyon. Hibaloi lang nga bisan unsay imong gibati karon makatarunganon. Ikaw nagbangutan tungod kay nawad-an, ug importante ang pagpasensya sa imong kaugalingon samtang lihukon kana nga proseso. Sa samang higayon, matnguni nga dili kaayo mapasubraan ang imong mga kasinatian o mohunahuna pag-ayo sa nangagi nga kini makaapekto na hinoon sa imong abilidad sa paglihok karon. Kon ikaw mibati nga naglisud sa pagdumala sa maayong mga paagi, hangyoa ang imong bishop o mission president aron sa pagtabang nga makakita ka og usa ka propesyunal nga tigtambag. Walay angay ikaulaw sa pagpangayo og tabang.
Paningkamot sa pagdapit sa Espiritu. Ipadayon ang pagsubsob sa imong kaugalingon sa buhat sa ebanghelyo. Kon ikaw gi-reassign, ipadayon ang pagkamasulundon sa mga lagda sa misyon. Pangita og mga paagi matag adlaw nga ikapakita sa Espiritu nga gusto ka nga Siya imong ikauban, ug isulat ang inspirasyon nga imong nadawat gikan Kaniya. Ang pagpabiling duol sa Espiritu makatabang kanimo sa paghimo og mga desisyon mahitungod sa imong kaugmaon ingon man sa pagpangita og kahupayan sa imong kasamtangan nga sitwasyon.
Pagbaton og pagsalig nga ikaw sa gihapon “gitawag sa buhat.” Sulod sa dugayng panahon, naghunahuna ko sa akong “calling” nga adto ra ko kon asa ko gitawag sa pagserbisyo isip misyonaryo. Unta nahibaloan nakong daan nga ang tinuod diay nakong calling mao ang pagpangalagad sa mga anak sa Dios bisan asa ako. Bisan human nako og tangtang sa akong itom nga name tag, anaa pa gihapon ako ubos sa mga pakigsaad sa bunyag sa pagdala diha sa akong kaugalingon sa ngalan ni Jesukristo ug sa pagtratar sa uban sa paagi nga Iyang buhaton sa matag adlaw. Duna ka may bag-ong mission assignment o kaha na-release na gikan sa full-time nga pagserbisyo, laumi nga ang imong mga talento magamit sa pagtukod sa gingharian sa Dios bisan asa ka moadto.

Diha sa Iyang mga Kamot

Tingali ang usa sa makapabalaka kaayo nga mga aspeto sa pagbiya sa Albania mao ang among pagbiya sa bag-o pa kaayong mga Santos nga magmaneho sa ebanghelyo nga wala ang among tabang. Apan nahibalo ka ba unsa? Makapatingala ang ilang gipanghimo. Bisan og wala kami didto sa pagtabang nila, ang Dios kauban nila. Sukad sa akong pagbiya kapin sa 20 ka tuig na ang milabay, ang buhat sa mao nga dapit milambo, ug lig-on ang mga Santos.

Busa, minahal nga misyonaryo, ipadayon ang pagpangita sa balaang mga buhat nga gihikyad sa imong atubangan. May mga tawo gihapon nga nagkinahanglan sa imong tingog, ug anaa pa gihapon ang daghang kalipay nga makaplagan. Gamita kining talagsaon nga kasinatian isip usa ka oportunidad sa pagpalambo sa imong relasyon sa Dios. Unta Siya mopanalangin kanimo samtang magpadayon ka uban sa pagtuo.