Usa ka Espesyal nga Mensahe alang sa Makuyaw nga mga Panahon

Dugang sa Mayo 2020 nga Liahona

Kitang tanan naapektuhan sa bag-ong kagaw [virus] nga nagkaylap sa tibuok kalibutan ug sa ubang mahagiton nga mga panghitabo sa tibuok kalibutan. Kini masabtan nga kining mga kasamok tingali moaghat og mga pagbati sa kasagmuyo, kabalaka, ug kahadlok. Apan ang Dios wala mobiya kanato. Makatabang Siya kanato sa pagpadayon sa unahan uban sa hugot nga pagtuo.

Andam alang sa mga Panahon sa Katalagman

“Busa, Ako ang Ginoo, nahibalo sa katalagman nga moabut diha sa mga lumulupyo sa yuta, mitawag sa akong sulugoon si Joseph Smith, Jun., ug namulong ngadto kaniya gikan sa langit, ug mihatag kaniya og mga sugo” (Doktrina ug mga Pakigsaad 1:17).

Kana nga sumbanan sa paggiya nga pagpadayag nagpadayon karon. Ang Ginoo nag-andam kanato alang sa mga panghitabo sama niini pinaagi sa mga propeta sa modernong panahon, lakip ang ato karong lider, si Presidente Russell M. Nelson.

“Kita nagpuyo sa usa ka talagsaong panahon diin kita kanunay makakita sa kamot sa Ginoo diha sa mga kinabuhi sa Iyang mga anak,” ang propeta sa bag-ohay mipamatuod diha sa online video. “Ang atong Langitnong Amahan ug ang Iyang Anak, si Jesukristo, nakaila kanato, nahigugma kanato, ug nagbantay kanato.”

Kini nga mga hagit makahatag kanato og oportunidad sa paggamit sa unsay atong nakat-unan mahitungod sa panimalay nga nakasentro sa ebanghelyo nga pagsimba. Uban sa usa ka tigpangalagad nga kasingkasing, makatabang kita diha sa kalooy ngadto niadtong nagpalibut kanato.

Kalinaw diha ni Kristo

Pinaagi niining tanan, ang Ginoo nagtanyag kanato og kalinaw nga mas gamhanan kay sa kaguliyang.

“Kaninyo ibilin Ko ang kalinaw, kaninyo ihatag Ko ang akong kalinaw: hatagan Ko kamo niini dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw” (Juan 14:27).

Sa ubos mao ang mga kapanguhaan nga among gilauman nga motabang kaninyo sa pagsagubang sa mga kalisud karon. Hibaloi nga kamo gihigugma. Isip mga anak sa Dios, kita makabuntog niini nga hagit nga mag-uban.

Mga Pangutana ug mga Tubag

1. Asa ako makakaplag sa labing bag-ong mga giya nga basahon mahitungod sa mga kalihokan sa Simbahan?

Ang home page sa Simbahan (ChurchofJesusChrist.org) kanunay nga i-update ang impormasyon mahitungod sa mga miting ma-Dominggo ug sa ubang mga kalihokan sa Simbahan. Sama pananglit, ang Unang Kapangulohan naghangyo sa mga bishop ug mga presidente sa stake sa pagtino kon sa unsa nga paagi ang sakramento maanaa sa mga miyembro sa labing minos kausa sa usa ka bulan. Nagpakita usab ang home page og makahupay nga mga mensahe nga mahimo nimong hunahunaon sa paggamit sa pagpakaylap og paglaum ngadto niadtong nagpalibut kanimo. Hinumdumi nga ang imong labing bililhon nga kapanguhaan mao ang Espiritu Santo, kinsa makahatag kanimo og personal nga pagpadayag mahitungod sa pagtabang sa mga tawo nga imong gigiyahan.

Adto sa “Mga Mensahe sa Paglaum ug Kahupayan” nga seksyon sa ubos alang sa lista sa mga artikulo mahitungod sa kaguol, pagdawat sa kabubut-on sa Ginoo, pagtabang sa mga anak nga makasugakod, ug ubang makahupay nga mga mensahe nga mahimo nimong ipakigbahin.

2. Unsaon nako pagpangalagad ngadto sa uban sa luwas nga paagi atol niini nga panahon?

Alang niadtong kinsa nagpuyo uban sa mga minahal, ang pipila sa labing bililhon nga pagpangalagad mahimong buhaton sulod sa atong kaugalingong mga panimalay. Mga sugyot alang sa pagtabang sa kabatan-onan ug mga kabataan makita diha sa katapusan niini nga artikulo. Alang sa pagkonektar ngadto niadtong anaa sa gawas sa panimalay, ang teknolohiya naghatag kanato og daghang mga kapilian. Tawag, text, o mangita og laing mga paagi sa pagtabang niadtong imong gimahal. Agig dugang sa pagsusi sa ilang pisikal nga panginahanglan, paghunahuna unsay imong mahimo sa pagtabang kanila nga mobati nga mas konektado ug dili kaayo napahilayo.

Ang mga lider kinahanglan usab nga mohunahuna kon sa unsang paagi ang teknolohiya makatabang kanila sa pagsiguro nga ang mga panginahanglan sa matag miyembro nahatag. Ang pagmensahe sa mga kapanguhaan naglakip sa Member Tools app, Gospel Living app circles, ug Leader and Clerk Resources.

Sukad niadtong Hunyo 2018, matag Liahona naglakip og mga artikulo sa “Mga Baruganan sa Pagpangalagad” nga mahimong makatabang kanimo. Sama pananglit, ang artikulo sa Disyembre 2018 nagpakigbahin og mga ideya alang sa lainlaing mga paagi sa pagpakigsulti ngadto sa uban nga ikaw nagpakabana. Hinumdumi nga ang pag-ampo alang sa mga tawo pinaagi sa ngalan gamhanan.

3. Unya ang bahin sa kinatibuk-ang komperensya?

Ang Unang Kapangulohan ug ang Korum sa Napulog Duha Ka mga Apostoles nagdapit kanatong tanan sa pagpangandam ug pag-apil sa kinatibuk-ang komperensya. Bisan og ang mga Santos dili pisikal nga magpundok sa Conference Center o sa mga meetinghouse inig ka Abril 4–5, ang teknolohiya makahimo kanato sa pagpundok sa digital nga paagi ug magkahiusa sa espiritu samtang kita magdungan sa pagbasa, pagtan-aw, ug pagpaminaw. Kini nga komperensya makatabang kanato sa paghinumdom ug sa pagsaulog sa Unang Panan-awon, nga nahitabo 200 ka tuig na ang milabay, ug sa nagpadayon nga Pagpahiuli sa Ebanghelyo ni Jesukristo niining ulahing mga adlaw.

Alang sa dugang nga impormasyon mahitungod sa pagpangandam ug pag-apil sa komperensya, bisitaha ang gc.ChurchofJesusChrist.org.

4. Unsaon nako pagsimba sa labing maayo gawas sa mga miting sa Simbahan?

Ang mga Santos sa tibuok kalibutan naggamit sa mga kasulatan, musika sa ebanghelyo, Dali, Sunod Kanako, mga magasin sa Simbahan, Sabbath.ChurchofJesusChrist.org, ug ubang mga kapanguhaan sa Simbahan aron pagpuno sa ilang pagsimba sa mga adlaw nga Igpapahulay. Pipila ka mga pamilya miingon nga ang nakasentro sa panimalay nga mga miting mao ang labing espiritwal nga mga kasinatian nga sila aduna isip usa ka pamilya! Kon ikaw nalisdan, ayaw pag-undang. OK lang ang paghimo og yano sa mga butang—usa ka awit, istorya sa kasulatan, ug mubo nga pagpamatuod makahimo og nindot kaayo nga kasinatian sa pagsimba.

Aron makahibalo mahitungod sa unsang paagi ang mga Santos sa Ghana nagsimba diha sa panimalay sa panahon sa pagpugong [“freeze”] sa gobyerno sa mga kalihokan sa Simbahan, tan-awa sa “Kamo Dili Makapugong sa Unsay Anaa sa Akong Kasingkasing” (Pebrero 2018 Liahona).

Mga Mensahe sa Paglaum ug Kahupayan

Uban sa mapaubsanong balita nga naglibut kanato, kita nagkinahanglan nga mogahin og panahon sa pagpalayo gikan sa makaugtas ug amumahan ang atong mga kalag. Kining mga artikulo sa ubos makadapit sa Espiritu ug makabutang sa mga hagit diha sa hustong panan-aw. Kita kinahanglang magmahunahunaon sa unsay gisinati karon sa mga kabataan ug mga kabatan-onan, ug magsensitibo sa mga kasamok ug mga kapakyasan nga ilang giatubang. Isip mga hamtong, kini ang atong trabaho sa paghatag kanila sa mga tubag ug tabang nga ilang gikinahanglan.

Gikan sa Nangaging mga Komperensya

• Bisitaha ang gc.ChurchofJesusChrist.org ug i-klik ang “Mga Hilisgutan” aron sayon nga makaplagan ang nangaging mga pakigpulong nga gilain-lain pinaagi sa mga tema sama sa pagpang-ayo, pasalamat, ug gugma.

Mahitungod sa Pagpangita og Kalinaw

• “Kalinaw Niining Kinabuhia” (Disyembre 2016 Liahona): Si Presidente Eyring nagpamatuod kabahin sa sakramento ug sa kalinaw sa mga saad sa Manluluwas.

• “Mga Tinubdan sa Kalinaw ug Gahum” (Marso 2019 Liahona): Si Elder Godoy nag-awhag kanato sa paghatag sa Ginoo sa atong labing maayo ug sa pagsalig sa Iyang grasya.

• “Pagkaplag og Kalinaw alang sa Imong Kaugalingon ug sa Uban sa Samok nga mga Panahon” (Abril 2019 Liahona): Walo ka mga sugyot alang sa pagpangita ug pagpakigbahin sa kalinaw.

Christ’s Image [Imahe ni Kristo], ni Heinrich Hofmann

“Kaninyo ibilin Ko ang kalinaw, kaninyo ihatag Ko ang akong kalinaw: hatagan Ko kamo niini dili sama sa hinatagan sa kalibutan. Kinahanglan dili magkaguol ang inyong kasingkasing, ni magtalaw” (Juan 14:27).

Kabahin sa Pagsagubang sa mga Kalamidad

• “Natural nga mga Kalamidad—Dili Kita Kinahanglang Mahadlok” (Agosto 2012 Liahona): Si Elder Ellis nakigbahin og mga sugyot alang sa wala pa, atol, ug human ang katalagman mihampak.

Mahitungod sa Pagdawat sa Kabubut-on sa Ginoo

• “Pagdawat sa Kabubut-on ug Panahon sa Ginoo” (Agosto 2016 Liahona): Si Elder Bednar nakigbahin og mga istorya kalabut sa matinud-anong mga Santos.

• “Apan Kon Dili” (Oktubre 2002 nga kinatibuk-ang komperensya): Si Elder Wickman nag-awhag kanato nga dili magduha-duha sa kaayo sa Dios, bisan kon usa ka butang nga makalilisang mahitabo.

Bahin sa Kasub-anan

• “Ang Dominggo Moabut” (Oktubre 2006 nga kinatibuk-ang komperensya): Si Elder Wirthlin nagpahinumdom kanato nga kita makapanglantaw ngadto sa pagkamamaayo.

Alang sa Pagtabang sa mga Kabataan

• “Pagsagubang sa Trahedya” (Abril 2019 Liahona): Mga kapanguhaan sa pagtabang sa mga kabatan-onan ug mga kabataan nga makakaplag og kalig-on ug kahupayan.

• “Siya Akong Makita Pag-usab” (Abril 2019 Liahona): Si Sister Aburto nagpamatuod sa Pagkabanhaw. Ang ikaduhang pahina naglakip og makahupay nga mga kard sa kinutlo.

• Bisitaha ang lessonhelps.ChurchofJesusChrist.org ug i-klik ang mga hilisgutan sama sa “Kahadlok/Kabalaka.”

Samtang kita maghunahuna mahitungod ni Jesukristo niining panahon sa Pasko sa Pagkabanhaw, kita mahinumdom nga Siya nasayud sa tanan natong mga sakit, kasubo, ug mga kahuyang. Nahigugma Siya kanato ug sa kanunay nag-uban kanato.

Tan-awa sa Dali, Sunod Kanako—Alang sa mga Indibidwal ug mga Pamilya: Basahon ni Mormon 2020, 54–57.