Siya Akong Makita Pag-usab

Ni Reyna I. Aburto

Ikaduhang Magtatambag sa Kinatibuk-ang Kapangulohan sa Relief Society

Nagdako ko sa Nicaragua. Sa gamay pa ko, ako ug ang akong magulang nga lalaki kanunay nga magkauban sa tanan namong buhaton. Magkuyog mi sa pagpanglakaw padulong sa eskwelahan. Magkuyog mi sa pag-adto sa tindahan. Duna kami sa tanang matang sa mga makalingaw nga panimpalad sa likod nga tugkaran sa among balay. Malipayon kami.

Dayon, dihang nag-edad ko og siyam, dunay subo kaayong nahitabo. Namatay ang akong igsoon sa usa ka linog. Sa sinugdanan wa ko mobati nga tinuod nga namatay siya. Magsige ko og hunahuna nga manuktok siya sa among atubangan nga pultahan. Nga mosulti siya nga duna lang siyay giadto. Kaniadto magsige ko og tutok sa pultahan, nanghinaot nga kini mahitabo. Gusto kaayo kong makakita niya pag-usab.

Paglabay sa panahon, mas nagkagaan na. Gimingaw gihapon ko sa akong igsoon, apan mibati na usab ako og kalipay.

Kaniadto, dili pa ko miyembro sa Ang Simbahan ni Jesukristo sa mga Santos sa Ulahing mga Adlaw. Apan dihang midako na ko, nakakat-on ko mahitungod sa Simbahan ug nabunyagan. Usa ka adlaw nanghugas ko sa akong mga plato. Panahon kadto sa Pasko sa Pagkabanhaw. Naghunahuna ko mahitungod sa Pagkabanhaw ug naghunahuna bahin sa akong igsoon.

Sa kalit usa ka pagbati miabut kanako. Nakahinumdom ko sa akong pangindahay mahitungod sa akong igsoon. Akong naamguhan nga dili gayud kadto binuang! Naggikan kadto sa Espiritu Santo, sa paghupay kanako ug paggiya kanako. Ugma damlag ang akong igsoon sa tinuod mabanhaw gayud. Ug sa tinuod siya akong makita pag-usab.

Kon duna kay minahal nga patay na, OK lang nga mingawon ka nila ug mobati og kaguol. Pakigsultihi ang imong pamilya o ang usa ka hingkod na kon mobati ka nga andam na. Pag-ampo sa Langitnong Amahan mahitungod sa imong gibati. Makatabang Siya kanimo nga mobati og kalinaw pag-usab.

Bisan unsay mahitabo, hinumdumi nga si Jesukristo nahigugma kanimo. Atol sa Pasko sa Pagkabanhaw hinumduman nato ang Iyang sakripisyo para kanato. Tungod Kaniya, tanan kita mabanhaw ug makapuyo uban sa atong mga pamilya sa hangtud.

Mga Kard sa Paghupay

Guntinga kini nga mga kard. Pwede nimo kining piloon og katunga o gamiton kini isip mga bookmark. Hipusa kini diha sa imong mga kasulatan o sa ubang dapit nga matan-aw kon mobati ka og kasubo, kaguol, o kahadlok.

“Dili ko kamo pagabiyaan nga daw mga ilo: ako mobalik ra kaninyo.”

Juan 14:18

“Ug pagapahiran [sa Dios] ang tanang luha gikan sa ilang mga mata.”

Pinadayag 21:4

“Paglipay, ug ayaw kahadlok, kay Ako ang Ginoo anaa uban kaninyo, ug mobarug diha kaninyo.”

Doktrina ug mga Pakigsaad 68:6