Dihang Akong Nakita si Papa nga Mikanta

Maria Oka

California, USA

Paghulagway pinaagi ni Allen Garns

Didto ko sa akong misyon sa Honolulu, Hawaii, USA, sulod pa lamang sa upat ug tunga ka bulan dihang grabe ang akong pagpanggahi ug dayon nadayagnos nga duna koy patol. Ang misunod nga mga bulan nagkinahanglan og pag-adto kanunay sa ospital, daghang mga pagtesting, ug bag-ong pagtambal nga dunay makasagmuyo nga ubang mga epekto.

Hangtud karon, nakatutok ko og maayo sa misyonaryo nga buhat nga wala kaayo nako masinati ang kamingaw, apan sukad sa panahon sa akong pag-ataki, misakit ang akong kasingkasing. Gimingaw ko sa akong mga ginikanan ug mibating nag-inusara bisan gilibutan ko sa mga buotan, mapinanggaong mga tawo. Dili ko gustong mopauli, apan gusto kong mobati og kalinaw.

Pinaagi sa pagtugot sa akong presidente sa misyon, nakigsulti ko sa akong mga ginikanan sa telepono mahitungod sa akong pagpatambal. Ang akong papa, nga bag-o lang nakatuman sa tibuok kinabuhi niyang pangandoy nga makaapil sa Tabernacle Choir sa Temple Square, mipaniguro nako nga tarungon niya og maayo ang pagkanta alang kanako sa kinatibuk-ang komperensya, nga magsugod sa sunod nga adlaw.

Pagkaugma, nag-ampo ko og hugot alang sa kalinaw nga gikinahanglan kaayo nako. Nakadawat ko og mga tubag sa piho nga mga pangutana atol sa kinatibuk-ang komperensya kaniadto, ug misalig ko nga makadawat ko pag-usab og giya. Sa dihang ang komperensya gibuksan, mikanta ang choir sa “Dearest Children, God Is Near You [Pinalangga nga Mga Anak, ang Dios Haduol Kaninyo]” (Hymns, nu. 96). Sulod sa unang minuto, akong nakita ang akong papa sa TV screen. Ang camera naka-focus sa iyang nawong sulod sa igong panahon.

Ang mga luha milugmaw sa akong mga mata samtang ang lawom kaayong pagbati sa kalinaw mipalibut kanako. Nasayud ko nga gihigugma ako sa Dios. Nasayud Siya sa tukma gayud kon unsay akong gikinahanglan nianang adlawa—usa ka yano nga kasiguroan nga anaa ra Siya sa duol ug nakamatikod kanako. Akong gibati ang gugma sa Dios, ug usab, ang gugma sa akong pamilya, akong mga kompanyon, ug sa akong presidente sa misyon. Imbis mobati nga nabug-atan, karon nakita nako ang oportunidad nga mas mahiduol sa Ginoo.

Ang akong mga hagit sa kahimsog wala mawala. Kinahanglan kong mobiya sa akong misyon og sayo bisan pa, apan nasayud ko nga anaa ang Dios ug nahigugma Siya kanako. Kana nga kasiguroan miuban kanako latas sa daghan pang mga kasakit ug naghatag kanako og paglaum sa akong pinakangitngit nga mga gutlo. Ang uban motawag niini nga usa ka sulagma, apan nasayud ko nga dihang nakita nako si papa nga mikanta mahitungod sa gugma sa Dios usa kadto ka gamayng milagro sa akong panahon sa panginahanglan.