Naggiya ba Kanako ang Dios?

Ang atong kinabuhi puno sa dagkong mga pagpili: unsa nga dalan sa panarbaho ang subayon, kinsa ang minyoan, asa moeskwela, ug uban pa. Ang atong kinabuhi puno usab sa inadlawng mga kabalaka: pagpili sa pinakamaayong paggamit sa panahon, paningkamot sa pagsabut sa doktrina, ug pagpangita og kalinaw taliwala sa mga pagsulay. Suma total, nagkinahanglan kita og personal nga pagpadayag. Apan usahay lisud ang pagkahibalo unsaon sa pagkadawat niini ug unsaon sa pag-ila niini kon kini mahitabo kanato. Kon wala kita makadawat o makamatikod sa mga tubag, tingali maghunahuna kita, “Sa Espiritu ba kadto o akoa rang ideya?” “Nganong nadasig man ko sa paghimo niana ug dayon napakyas?” “Nganong mobati man ko nga daw ang Dios dili motubag sa akong mga pag-ampo?”

Maayo na lang, kay diha sa , “Paghimo og mga Desisyon: Kabubut-on vs. Pagpadayag” (pahina 44), mipaambit si Erin sa iyang sugilanon mahitungod sa personal nga pagpadayag dihang kinahanglan siyang mohimo og usa ka makausab sa kinabuhi nga pagdesisyon. Samtang ang Dios gusto nga mogiya kanato, gusto usab Siya nga motabang kanato nga makakat-on sa pagsalig sa atong kabubut-on sa paghimo og maayong mga pagpili.

Ang pagkat-on kon sa unsang paagi ang Espiritu Santo makigsulti kanimo sa personal nga paagi usa ka mahinungdanong bahin sa pagkadawat ug pag-ila sa pagpadayag. Posibling managlahi kini sa matag usa kanato. Diha sa pahina 48, daghan sa batan-ong mga hamtong [young adults] mipaambit sa unsang paagi nila nadawat ang pagpadayag.

Diha sa digital lamang nga artikulo, gipasabut ni Aspen nga ang personal nga pagpadayag nagkinahanglan sa “Pagbansay-bansay sa Imong Espirituhanong mga Braso.”

Ang Paghunahuna sa umaabut posibling lisud, gani makahadlok. Ilabi na isip usa ka batan-ong hamtong. Apan kon akong mahinumduman kon giunsa sa paggiya sa Dios ang akong kinabuhi sa nangagi, naghatag kini kanako og kaisug sa pagpadayon ug sa paglihok, misalig nga Siya magpadayon sa paghatag kanako og giya nga akong gikinahanglan sa akong pagpadayon.

Matinuoron,

Katie Sue Embley

Labing Maayo nga Tambag …

Ang batan-ong mga hamtong mipaambit sa labing maayong tambag nga ilang nadawat sukad mahitungod sa personal nga pagpadayag:

“Ang akong magtatambag sa EFY kausa misulti kanako, ‘Palamboa ang imong relasyon sa Dios isip imong literal nga Amahan sa espiritu. Kon unsa kalig-on ang imong relasyon Kaniya, mas daghan ka og masabtan ug magiyahan.’ Nakahimo kana og dako kaayong kalainan sa akong mga pag-ampo.”

—Grant Goolsby, California, USA

“Ang among patriyarka sa stake mopamemorya namong tanan sa mga pulong nga: ‘aron makadawat og pagpadayag, basaha ang pagpadayag.’ Nakatabang kaayo kini kanako kay ako nagbasa sa mga kasulatan.”

—Shellby Tippetts, Missouri, USA

“Paggahin og panahon sa pagpamalandong. Si Joseph Smith namalandong sa Santiago 1:5 sa wala pa siya modesisyon sa paglihok. Usahay gusto sa Langitnong Amahan nga mamuhunan kita pinaagi sa pag-ampo ug pagtuon sa dili pa Siya mohatag kanato og mga tubag. Nakakat-on kami og daghan sa ingon niana nga paagi.”

—Natasha Herbst, Utah, USA

“Paminaw gamit ang imong kasingkasing, dili pinaagi sa imong dunggan.”

—Sai Tua, American Samoa

Unsa ang pinakamaayong tambag nga imong nadawat sukad mahitungod sa paghinulsol? Ipadala kanamo ang imong mga tubag diha sa liahona.lds.org sa dili pa ang Abril 30, 2019.