Sulayi ang Pipila ka Bag-ong mga Tradisyon sa Pasko sa Pagkabanhaw
Niining Pasko sa Pagkabanhaw, gahini og pipila ka dugang pang mga minutos ang paghinumdom sa pinakatalagsaong gasa nga gihatag sukad.
Detalye gikan sa Kay alang Kanato ang usa ka Bata Natawo, pinaagi ni Lynne Millman Weidinger
Ang Pasko sa kasagaran maoy makakuha sa dako nga pagtagad kon hisgutan ang mga adlaw nga walay trabaho [holiday]. Gani, kon wala ang dugay nang mga panghitabo nga atong gisaulog matag Pasko sa Pagkabanhaw, ang Pasko wala unta.
Si Presidente Gordon B. Hinckley (1910–2008) kausa mitudlo, “Walay Pasko kon wala ang Pasko sa Pagkabanhaw. Ang bata nga si Jesus sa Betlehem mahisama ra unta sa laing bata kon wala pa ang matubsanon nga Kristo sa Getsemani ug sa Kalbaryo, ug ang madaugon nga kamatuoran sa Pagkabanhaw.”1
Ania ang pipila ka mga tradisyon nga pwede nimong ikonsiderar nga idugang sa imong tinuig nga mga pagsaulog.
1. Paghimo og usa ka Pagpanaygon sa Pasko sa Pagkabanhaw
Nga dili iapil ang makahimuot nga handurawan mahitungod sa mga reindeer ug mga duwende, ang mga daygon sa Pasko tanan parehong mahitungod kang Jesukristo. Ang Pasko sa Pagkabanhaw mao ang perpektong panahon alang sa musika mahitungod sa Manluluwas, ug oo, gani bisan kantahon diha sa atubangang mga pultahan sa imong mga silingan.
Kon wala kay mahunahunaan, susiha ang mga “hilisgutan” [topics] nga seksyon sa hymnbook ubos sa “Easter” [Pasko sa Pagkabanhaw] ug “Pag-ula” alang sa mga kanta. Ang bisan unsa nga kanta nga pagsaulog kang Jesukristo usa ka tukma para sa pagpanaygon alang sa Pasko sa Pagkabanhaw.
2. Mopasaylo og Tawo
Unsa ka sagad ka nga nagpasalamat sa gasa sa paghinulsol? Ang Pasko sa Pagkabanhaw nagtanyag og higayon sa paghunahuna og mas daghan kon unsaon nato nga mapahigayon ang susamang diwa sa pagpasaylo ngadto sa uban.
Mitudlo si Jesus: “Busa, Ako moingon nganha kaninyo, nga kamo kinahanglan gayud nga mopasaylo sa usag usa. …
“Ako, ang Ginoo, mopasaylo kinsa Ako mopasaylo, apan kamo gikinahanglan nga mopasaylo sa tanan nga mga tawo” (Doktrina ug mga Pakigsaad 64:9–10).
Pangutan-a ang imong kaugalingon: Si kinsang tawhana ang imong gikayugtan? Pag-ampo alang sa kalig-on nga mopasaylo niining tawhana, ug tugoti nga motabang ang Manluluwas sa pagwagtang nianang sakit nga mga pagbati.
3. Paghimo og usa ka Pasundayag [Pageant], Dula, o Ubang Pasundayag
Pwede kang maghimo og usa ka pasundayag alang sa Pasko sa Pagkabanhaw. Usa ka yano nga ehemplo posibling mao ang pagbasa sa kasulatan alang sa family home evening o usa ka sing-a-long nga konsyerto sa komunidad.
4. Mobisita sa mga Lubnganan sa mga Minahal
Tungod ni Jesukristo, ang kamatayon nawad-an sa ikot niini (tan-awa sa 1 Mga Taga-Corinto 15:55). Gahini og panahon ang pagbisita sa mga lubnganan sa mga minahal aron makapamalandong niining dakong balita.
Pwede gani nga magbasa ka og kusog sa pipila ka paboritong mga kasulatan nga naghisgot mahitungod sa Pagkabanhaw samtang mobisita ka niini nga mga lubnganan. Ang pipila (sa daghan) nga mga kasulatan nga ikonsiderar alang niini mao ang 1 Mga Taga-Corinto 15:20–22; Alma 11:42–44; ug Doktrina ug mga Pakigsaad 88:14–16.
5. Pun-i og Gamay ang Imong Pagkamaayo
Detalye gikan sa Pagbisita ni Jesus sa Amerika, ni John Scott
Ang Pasko sa Pagkabanhaw nagtahud sa mga hitabo sa Getsemani, unsay nahitabo sa krus, sa Pagbangon sa Manluluwas gikan sa pagkamatay sa ikatulong adlaw, ug dayon sa Iyang pagpangalagad sulod sa 40 ka adlaw sa wala pa mokayab ngadto sa langit.
Dugang pa, sa wala madugay human mokayab sa langit, si Jesus mipakita ngadto sa mga Nephite ug nangalagad kanila (tan-awa sa 3 Nephi 11–28). Daghan na kaayo kana nga ikasaulog!
Nganong dili man palapdan pa ang imong kapanahonan sa Pasko sa Pagkabanhaw? Tugoti nga mahimuot ang imong kasingkasing diha sa mga milagro sa Pasko sa Pagkabanhaw. Gahini og mabuot nga pagpaningkamot ang pagkahimong labaw nga Kristohanon sulod sa 40 ka adlaw human sa Pasko sa Pagkabanhaw. Alang sa inspirasyon, ikonsiderar ang pagdapit nga gikan ni Presidente Russell M. Nelson: “Itutok ang porsyon sa imong panahon matag semana sa pagtuon sa tanang butang nga gisulti ni Jesus ug gibuhat sigun sa narekord diha sa Daang Tugon, kay Siya ang Jehova sa Daang Tugon. Tun-i ang Iyang mga balaod sigun sa narekord diha sa Bag-ong Tugon, kay Siya ang Kristo niini. Tun-i ang Iyang doktrina sigun sa narekord diha sa Basahon ni Mormon, kay walay basahon sa kasulatan diin ang Iyang wali ug ang Iyang pangalagad mas klarong gipadayag. Ug tun-i ang Iyang mga pulong sigun sa narekord diha sa Doktrina ug mga Pakigsaad, kay Siya nagpadayon sa pagtudlo sa Iyang katawhan niini nga dispensasyon.”2
Nanaghulat ang Imong mga Tradisyon
Si Elder Dieter F. Uchtdorf sa Korum sa Napulog Duha ka mga Apostoles mitudlo, “Aron makakita sa labing importante nga adlaw sa kasaysayan, kinahanglan gayud kita nga mobalik nianang gabii nga hapit 2,000 ka tuig na ang milabay didto sa Tanaman sa Getsemani sa dihang miluhod si Jesukristo sa grabe nga pag-ampo ug mihalad sa Iyang kaugalingon isip bugti alang sa atong mga sala.”3
Ang pipila sa labing importante nga mga hitabo sa kasaysayan takus nga gahinan og panahon sa pagpamalandong matag tuig. Ang mga tradisyon makatabang nato sa paghimo niana, ma-anaa man niini nga lista o bisan unsa nga imong pilion.
Unsay idugang nimo niining tuiga?