Batan-ong mga Hamtong [Young Adults]
Paghimo og mga Desisyon: Kabubut-on vs. Pagpadayag
Ang tagsulat nagpuyo sa Utah, USA.
Kon hisgutan ang dinagkong mga desisyon, unsa ka dako ang atong panginahanglan sa pagsalig ngadto sa Dios aron sultihan kita unsay buhaton?
Mga paghulagway pinaagi ni David Green
Sa matag adlaw ang matag usa kanato nag-atubang og daghang mga pagdesisyon. Ang pipila mas komon, sama sa, “Unsay akong isul-ob?” “Unsay akong kaunon sa paniudto?” “Panahon na ba nga mopalit ko og bag-ong sakyanan, o ipadayon ba lang una nako sa paggamit ang akong karaan?” Apan sa kasagaran gayud makasugat kita og dagkong mga pagdesisyon—”Mobalik ba ko sa pag-eskwela?” “Dawaton ba nako kining trabahoa?” “Mobalhin ba ko sa bag-ong siyudad?” “Mopalit ba ko og balay?” “Makig-date ba ko niining tawhana?” “Makigminyo ba ko niining tawhana?” ug uban pa.
Kon mag-atubang og dagkong mga pagdesisyon, lagmit kita nga—sa tukmang paagi—mogahin pa og dugay-dugay sa pagpili. Sundon nato ang tambag nga gihatag ngadto kang Oliver Cowdery diha sa Doktrina ug mga Pakigsaad 9:8–9, diin ang Ginoo miingon:
“Apan, tan-awa, Ako moingon nganha kanimo, nga ikaw kinahanglan gayud nga magtuon niini diha sa imong hunahuna; unya ikaw kinahanglan nga mangutana kanako kon kini husto, ug kon kini husto Ako mohimo sa imong dughan nga moinit diha sulod kanimo; busa, imong mabati nga kini husto.
“Apan kon kini dili husto ikaw dili makabaton niana nga mga pagbati, apan ikaw makabaton og kasamok sa hunahuna nga makahimo kanimo sa pagkalimot sa butang nga sayop.”
Bisan og siguradong maayo kini nga tambag, kon hisgutan ang dinagkong mga pagdesisyon, usahay mosalig ra kaayo kita sa porsyon diin ang Dios mosulti kanato kon unsay eksakto ug nakalimtan nato ang porsyon diin mosulti Siya kanato sa pagtuon niini diha sa atong hunahuna. Mas nakatutok kita pag-ayo sa paghulat sa Dios nga mokumpirma sa atong mga desisyon nga ato na hinoong napasagdan nga mawagtang na kanato ang talagsaong mga oportunidad. Gani makamatikod kita sa tahas sa kabubut-on, apan malisang kita nga mohimo og desisyon nga mopatipas kanato sa dalan gikan sa atong gitino nang daan nga “plano” ug mosangko sa pagbana-bana nga ang bisan unsang desisyonkon wala ang kainit sa dughan o sa usa ka tingog gikan sa langit nagpasabut nga ang atong desisyon sayop. Alang sa daghan kanato kining wala litoka nga kabalaka tali sa kabubut-on ug personal nga pagpadayag mosangput sa usa ka makahuluganong pangutana: Unsa ang tahas sa Dios sa pagtabang kanato sa paghimo og mga desisyon?
Ang tahas sa Dios sa Atong Paghimo og mga Desisyon
Tingali kini nga pangutana mas matubag pinaagi sa sugilanon mahitungod sa igsoong lalaki ni Jared. Dunay maka-interes nga sundanan sa paglambo dinhi niini nga sugilanon nga nagtudlo kanato mahitungod sa gilauman sa Dios kanato bahin sa paghimo og mga desisyon. Human gilibug [gilahi-lahi] ang mga pinulongan didto sa Tore sa Babel, mihangyo si Jared sa iyang igsoong lalake sa pagpangutana sa Ginoo kon kinahanglan ba silang mobiya sa maong dapit, ug kon mao, asa man sila moadto (tan-awa sa Ether 1:36–43). Ang igsoong lalake ni Jared nangutana, ug ang Ginoo midala kanila ngadto sa baybayon. Samtang nagbiyahe sila ang Ginoo namulong kanila sa usa ka panganod ug migiya sa matag lakang sa ilang panaw. Sa katapusan nangabut ra sila sa baybayon, diin didto sila mipuyo sulod sa upat ka tuig.
Dapit sa katapusan sa upat ka tuig, gisultihan sa Dios ang igsoon ni Jared sa pagtukod og mga sakayan ug mangandam sa pagtabok sa dagat. Dihang ang igsoon ni Jared nakabantay nga walay hangin ang mga sakayan, gisunod niya ang susamang pamilyar nga paagi [sundanan] sa pagduol sa Dios sa pagpangutana unsay iyang buhaton. Sigun sa gilauman, mitubag ang Ginoo pinaagi sa paghatag kaniya og detalyadong mga instruksyon sa paghimo og mga lungag diha sa mga ibabaw ug ilawom sa mga sakayan. Bantayi ang paagi [sundanan] sa pagpadayag sa pagkakaron: Ang Dios mihatag kanila og usa ka plano, nangutana sila unsaon sa pagtuman ang plano, ug ang Dios mitubag gamit ang detalyado ug klarong mga tubag.
Apan human niya nahimoan og mga lungag ang mga sakayan, nakabantay si Jared nga ang mga sakayan wala diay suga. Nangutana na usab siya sa Dios unsay angay niyang buhaton. Imbis tubagon, nangutana hinoon ang Dios, “Unsa ang buot nimo nga Ako kinahanglan mobuhat nga kamo makabaton og kahayag diha sa inyong mga sakayan?” (Ether 2:23). Imbis mohatag og detalyadong mga instruksyon sama sa Iyang gihimo kaniadto, niining higayona ang Ginoo naghulat sa igsoon ni Jared nga mohukom unsay buhaton.
Kini nga tubag gikan sa Ginoo tingali maoy pinakalisud sabton kon mosulay sa paghimo og desisyon. Gitudloan kita sa pag-ampo ug maghulat sa tubag, mao nga natural lang nga mabalaka kita kon wala kitay madungog nga tubag. Sa kasagaran maghunahuna kita kon ang kakulang sa klaro nga tubag masabut ba isip “kasamok sa hunahuna” nga nagpasabut nga ang atong pagpili sayop. Sa ubang mga panahon maghunahuna kita kon nagpasabut ba kini nga dili igo ang atong pagkamatarung o wala ba kaha kita mangayo uban sa “tinuod nga katuyoan” (tan-awa sa Moroni 10:4). Apan adunay ikatulong opsyon nga usahay wala nato mahunahuna—tingali, sama sa igsoon ni Jared, ang Dios naghulat kanato sa paghimo og atong kaugalingon nga desisyon.
Ang Paghimo og Desisyon
Bag-o lang nakasugat ko og sitwasyon nga misukod sa paagi sa akong paghunahuna mahitungod sa kabubut-on ug personal nga pagpadayag. Sa nagkaduol na ang katapusan sa akong graduate school, nakadawat ko og pipila ka lahi nga mga tanyag sa trabaho sa lahi-lahing mga siyudad ug dili makahukom kon asa ang akong dawaton. Sama sa igsoon ni Jared, nakasinati ko ug daghang higayon diin nag-ampo ko mahitungod sa dagkong mga desisyon ug mitubag ang Dios pinaagi sa daw klaro nga tubag. Misalig niadtong nag-unang mga kasinatian, nagsugod ko sa pag-ampo ug sa pagpangayo og tabang sa Dios aron tabangan ako sa paghukom kon asa nga trabaho ang akong dawaton. Gibuhat usab nako ang akong bahin pinaagi sa pagtuon sa matag oportunidad sa panarbaho ug pagpakigtambag sa daghang tawo. Apan bisan unsaon nako sa pag-ampo og maayo o pagpuasa, nagpabiling hilom ang kalangitan, ug wala koy nadawat nga tubag.
Ang tagal sa paghimo og desisyon nagsingabut na, ug nataranta na ko. Siguradong mao kini ang matang sa desisyon nga hatagan gayud sa Ginoo og pagtagad, ngano kaha nga wala man Siyay tubag? Posibling dili importante Kaniya kon asa nga trabaho ang akong pilion, apan kinahanglang hatagan Niya sa pagtagad kon asa nga siyudad ako mobalhin tungod kay siguradong may epekto kini sa akong kinabuhi. Sa kanunay ang Ginoo naghunahuna mahitungod sa akong mga desisyon sa nangagi, mao nga nganong dili man kaha usab Siya motagad niini?
Sa gihapon bisan sa tinuoray nakong paningkamot, walay tubag nga miabut. Nagsugod ko sa paghunahuna kon wala ba ko magpakabuhi subay sa pamaagi sa Dios nga dili na nako madungog ang Iyang tubag. Naghunahuna pud ko nga basin dili ko makadungog tungod kay dunay porsyon sa akong hunahuna nga dili ko gustong makadungog sa tubag. Sa katapusan, sa adlaw sa wala pa ang tagal, nasayud kong kinahanglan kong mopili, mao nga gigamit nako ang akong panghukom ug mihimo sa desisyon. Nianang gabhiona nag-ampo ko sa yanong paagi, naghangyo kon sultihan ba ko Niya kon ang akong tubag sayop. Sa gihapon walay tubag, mao nga mipadayon ko ug gidawat ang trabaho.
Human sa daghang bulan, nagduha-duha gihapon ko sa akong desisyon, mao nga nangayo ko og panalangin sa priesthood aron makadawat na usab og kasiguroan. Diha sa pagpanalangin gisultihan ko nga wala ako makadawat og tubag sa akong pag-ampo tungod kay nalipay ang Ginoo sa bisan unsang desisyon nga akong gihimo. Ang panalangin mipalig-on sa tambag nga kanhi gihatag kanako sa akong presidente sa misyon, kinsa misulti nako nga sa kasagaran dili importante unsa nga desisyon ang atong himoon. Ang Dios gusto nga makat-on kita sa pagbarug sa kaugalingon natong mga tiil ug modesisyon unsaon nato pagpakabuhi. Gipahinumduman usab ako sa akong presidente sa misyon nga ang Dios, nga atong Langitnong Amahan, dili mosilot kanato ug motangtang sa gisaad nga mga oportunidad kon tinuoray kitang maningkamot sa pagdiskobre unsay buhaton.
Ang igsoon ni Jared lagmit nga nakasugyot sa hapit bisan unsang sulbad aron mohayag ang mga sakayan, ug ang Ginoo uyon ra niini. Ang punto sa kasinatian dili lamang para sa igsoon ni Jared sa paglig-on sa iyang pagtuo apan sa pagkat-on usab unsaon sa paghimo og desisyon.
Paggamit sa Kabubut-on
Gikan sa usa ka mahangturong panglantaw, ang paggamit sa kabubut-on usa ka gikinahanglan nga elemento sa personal nga paglambo. Kon wala kini, dili kita makahimo sa mga matang sa mga pagdesisyon nga makatabang kanato sa pagkab-ot sa atong hingpit nga potensyal. Ang kalamboan, sama sa tanan pang butang sa ebanghelyo, moabut “pagtulun-an human sa usa ka pagtulun-an, lagda human sa usa ka lagda” (2 Nephi 28:30). Gusto sa Dios nga usa kita ka andam nga katawhan, dili usa ka paralisadong mga tawo, ug naglaum Siya kanato sa paggamit sa atong kabubut-on sa pagpakabuhing maayo kutob sa atong mahimo.
Kon makat-unan na nato ang pagpangita sa balanse tali sa kabubut-on ug pagpadayag, makasinati kita og tinuod nga espiritwal nga paglambo. Mao kini ang nahitabo sa igsoon ni Jared. Human sa paghunahuna gayud niini, milihok siya sa pag-umol og 16 ka gagmay nga mga bato gikan sa usa ka bato ug mihangyo sa Dios sa paghikap niini ug pasidlakon kini” (tan-awa sa Ether 3:1-5). Niining higayona, dihang mitubag ang Dios, ang tanan nausab. Imbis makadungog sa tingog sa Dios diha sa usa ka panganod, ang igsoon ni Jared sa tinuod nakakita sa Ginoo, kinsa wala lamang mopakita sa personal apan mipakita usab sa igsoon ni Jared og usa ka talagsaong mga panan-awon sa kalibutan ug sa tanang butang nga moabut (tan-awa sa Ether 3:6–26). Posible nga ang igsoon ni Jared dili unta andam sa espiritwal nga paagi aron makadawat niana nga panan-awon kon sa una wala pa siya makasinati sa personal nga paglambo nga miabut gumikan sa paghimo og iyang kaugalingon nga desisyon.
Kon maghimo kita og mga desisyon, kinahanglan gayud nato nga sundon ang tambag ni Alma, “Pagpakigtambag sa Ginoo uban sa tanan nimo nga buhaton” (Alma 37:37). Kon gikinahanglan sa Ginoo nga kita mohimo og piho nga desisyon, Siya mopahibalo kanato ug motabang aron dili kita mahisalaag. Apan kinahanglan nga andam usab kitang mobarug ug magpadayon diha sa pagtuo, moabut man o dili ang tubag. Hangtud nga kita magtuman sa atong mga pakigsaad ug magpabiling matinud-anon sa ebanghelyo ni Jesukristo, mabati nato ang kamasaligon diha sa atong matarung nga mga desisyon ug kalinaw nga ang Ginoo nahimuot sa atong mga paningkamot.