Mga Hulagway sa Pagtuo
Bob ug Lori Thurston
Nakaserbisyo sa Cambodia Phnom Penh Mission
“Dihang nahibaloan namo nga gitawag kami nga moserbisyo sa Cambodia Phnom Penh Mission, mibakho kami. Mahinamon kami!” Miingon si Brother Bob Thurston. Dili siguro kami mopili sa Cambodia, apan kaanindot nga gasa! Pagkadakong panalangin!” Miingon si Sister Thurston.
Ang mga Thurston mibati og espesyal nga koneksyon sa mga tawo sa Cambodia. “Gihigugma namo sila, ug gibati namo agig balos kana nga gugma,” miingon si Sister Thurston. “Ang mga tawo sa Cambodia mipakita kanamo og labihang kamabination.”
Sa tanang responsibilidad sa mga Thurston atol sa ilang misyon, gibahandi nila sa hilabihan ang oportunidad nga makabisita sa mga miyembro diha sa ilang mga panimalay.
Nahinumdom si Sister Thurston nga nagtan-aw niadtong iyang mga giserbisyuhan sa Cambodia ug naghunahuna, “Dili ko makahulat hangtud nga makakita kanimo sa sunod nga kinabuhi, dayon makasulti na gayud ako kanimo sa tanang butang nga akong gibati alang nimo ug sa gugma nako diha kanimo.”
Sa una nilang panag-uban sa misyon, si Bob ug Lori Thurston nakakat-on nga ang makahuluganong pagpangalagad mahitabo bisan sa babag sa pinulongan ug sa mga kalainan sa kultura tungod kay tanan kita mga anak sa Dios.
Leslie Nilsson, tiglitrato
Bob:
Sa wala pa ako ug si Lori maminyo, gihisgutan na namo ang pagserbisyo og mga misyon kon moretiro na kami. Kaming duha nakaserbiyso na og mga misyon kaniadto. Si Lori miserbisyo sa Kobe, Japan, ug ako miserbisyo sa Brisbane, Australia. Sa katapusan dihang nangandam na kami sa pagretiro, gisultihan namo ang among mga anak nga gusto kaming moserbisyo og daghang misyon.
Swerte kami nga nakaretiro samtang mga batan-on pa. Dihang nabatian namo nga ang ubang mga senior nga magtiayon sa pipila ka dapit sama sa ikatulo nga lebel nga mga nasud sa kalibutan [third world country] wala makaserbisyo tungod sa problema sa kahimsog ug ubang mga problema, naghunahuna kami, “Wala pa gani kami mag-60 anyos. Himsog pa kami, paadtoa kami didto!”
Miretiro ko mga duha ka adlaw sa wala pa ang akong ika-56 nga birthday. Sa tinuod nadawat namo ang among tawag sa pagmisyon dihang nagtrabaho pa ko. Dihang giablihan namo ang among tawag ug nasayran nga gitawag kaming moserbisyo sa Cambodia Phnom Penh Mission, mibakho kami. Mahinamon kami!
Lori:
Ang Cambodia wala gayud sa among hunahuna. Naghunahuna ko nga maadto kami sa Africa o susama niana. Nagsugod kami sa pagpangutana sa among kaugalingon, “OK, unsa kaha nga kapalaran ang naghulat kanamo?” Wala kami mopili sa Cambodia, apan kaanindot nga gasa! Kadakong panalangin! Ang Ginoo mas maalamon kay kanamo. Gipadala niya kami kon asa kami gikinahanglan nga moadto.
Nagserbisyo kami og humanitarian nga misyon. Nagtrabaho kami og mga proyekto alang sa mga LDS Charity, mo-fill up og mga report, ug mangayo og bag-ong mga proyekto. Gisusi usab namo ang kanhi nga mga proyekto sama sa atabay nga gihimo duha na ka tuigang milabay. Nahitabo nga nagserbisyo usab kami sa laing mga paagi.
Mitambong kami og mga komperensya sa stake ug mga district aron sa pagbansay sa mga lider ug mga misyonaryo, gi-inspeksyon namo ang mga apartment sa misyonaryo ug mibisita og mga miyembro sa ilang mga panimalay. Gihimo namo ang tanang matang sa butang sa pagtabang nga modagan sa hapsay nga paagi ang misyon.
Walay duha ka adlaw nga magkapareha ra ang panahon sa among misyon. Sa ubang adlaw naa kami sa kasagbutan, motaak sa tubig o lapok nga kutob sa bitiis ang giladmon. Sa ubang adlaw naa kami sa opisina sa misyon. Kauban sa mga misyonaryo sa Public Affairs, mibisita kami sa Ministry of Cults and Religion [Departamento sa mga Kulto ug Relihiyon]. Sa Cambodia, ang termino nga “kulto” wala magpasabut og ngil-ad nga butang. Ang opisyal nga relihiyon mao ang Buddhism—ang uban pang relihiyon gikonsiderar nga kulto. Gibisitahan namo ang Departamento aron sa pagtabang nga mahan-ay ang pagpasiuna nga Ang Simbahan ni Jesukristo sa mga Santos sa Ulahing mga Adlaw usa ka maayo nga organisasyon ug kasaligan.
Nakapalambo kami og maayong relasyon kanila, ug sila abtik nga makapanawag dayon og tabang. Manawag sila ug moingon, “Dunay baha diri, ug nagkinahanglan kami og pagkaon sa kapin sa 200 ka pamilya nga naapektuhan.” Nasayud sila nga makasalig sila sa Simbahan aron makakuha sa mga butang diin kini gikinahanglan nga madali ug makasuplementar sa mga butang nga wala sa ilaha.
Unsay among nasinati sa Cambodia? Nganli kini, basin nasinati na namo kini! Nakalingkod kami sa pinakaubos nga klase sa mga salog—sa kasagaran sa yuta ra o kawayan—sa pinakaubos nga mga panimalay. Nakaadto usab kami sa mga dagko ug matahum nga mga balay sa mga opisyal sa gobyerno. Gani si Bob nakaserbisyo sa kapangulohan sa branch sa mubo nga panahon.
Bob:
Nanawag kanako ang presidente sa misyon ug miingon, “Ah, gusto ko nga mahimo kang ikaduhang magtatambag sa usa ka branch.” Usa ka tuig og tunga human niadto, didto ko sa kwarto nga pangsilyo [sealing room] sa Templo sa Hong Kong China kauban sa presidente sa branch nga akong giserbisyuhan. Mosulod siya sa templo sa pinakaunang higayon! Siya ug ang iyang pamilya nakatigom og kwarta ug misulay pito na ka higayon sa pag-adto sa templo, apan dunay maaksidente, o dunay masakit. Kanunay nga dunay mahitabo. Human sa pito ka tuig, nakatigom sila og 40 dolyares lamang.
Katulo ka higayon sa among misyon, nakatabang kami og mga Santos sa Ulahing mga Adlaw sa Cambodia nga makatambong sa templo. Gidala namo ang daghan sa mga branch president kinsa mihimo sa pagpang-interbyu alang sa mga rekomend sa templo apan sila mismo wala makaadto sa templo. Maayo na lang kay sa Cambodia. usa ka senior nga magtiayon moabag niini nga mga pamilya sa ilang pag-adto sa templo. Nagkinahanglan sila og tawo nga mouban kanila tungod kay dili sila kahibalo unsaon sa pagsakay og eroplano. Daghan ang wala pa gani makasakay og bus! Ug karon mag-eroplano sila sa Hong Kong ug mangadto sa templo. Lisud para nila ang paghimo niana nga sila ra. Nagpasalamat kami sa Pundo alang niadtong Mosulod sa Templo [Temple Patron Assistance Fund] nga nakatabang sa pag-atiman kanila.
Lori:
Ang pagkamiyembro sa Simbahan sa Cambodia posibling usa ka hagit. Sa tibuok nasud, ang Cambodia wala gayud maghunahuna sa adlaw nga Igpapahulay. Ang tanan nga moadto sa simbahan mohimo og mga pagsakripisyo sa pag-adto didto.
Ang Cambodia usab dunay sayis porsyento nga Muslim ug dos porsyento lang nga Kristiyano—ang uban niini mga Buddhist. Ang pagbalhin gikan sa Buddhist nga estilo sa kinabuhi ngadto sa pagka-Kristiyano nga estilo sa kinabuhi lisud kaayo. Ang ubang mga tawo mawad-an sa ilang mga trabaho, ug sa daghang higayon likayan sila sa uban nilang mga kasilinganan.
Ang ikapulo usa usab ka dako nga butang. Ang mga monghe sa Buddhist mosuroy kada buntag ug mangayo og bugas o kwarta, ug ang mga tawo naanad ra niana. Apan ang pagkadawat sa imong sweldo ug pagtibhang og bahin niana alang sa ikapulo usa ka dako nga butang.
Daghan ang adunay tinuoray nga truma sa ilang kinabuhi. Tungod sa Khmer Rouge, usa ka komunistang rehimen nga midumala sa Cambodia sa ulahing bahin sa tuig 1970, ang matag tawo nga lapas sa 40 anyos dunay personal nga pait nga sugilanon. Wala ko makakita og tawo nga wala maapektuhi niini. Ang tanan dunay mga sakop sa pamilya nga gipangpatay. Bisan og grabe ang ilang mga naagian, dili ko makatuo sa ilang kalig-on, unsa sila kaandam nga mosulay. Apan luyo sa ilang mga kalig-on, daghan ang kulang sa pagsalig sa kaugalingon. Daghan ang mibati nga dili sila importante o aduna silay bili.
Makatingala ang pagkakita kon sa unsang paagi sila natabangan sa ebanghelyo ni Jesukristo nga molambo. Dihang nahibaloan nila nga dili lang kay mga talagsaon sila apan anak usab sa Dios, miingon sila, “Nagkomedya ka ba? Karon duna na akoy ikatampo.’
Ang Simbahan sa tinuod molambo gayud sa Cambodia. Talagsaong mga tawo natultolan na sa Simbahan. Ang mga Santos didto maoy mga nag-una [pioneers] ug kadtong mihangop gayud sa ebanghelyo napanalanginan sa daghang paagi tungod kay nakaila na sila sa Manluluwas. Makatingala gayud.
Daghan kita og mga miyembro ug mga ward nga lig-on kaayo libut sa dapit nga gitawag og “Trash Mountain [Bungtod nga Tapukanan],” nga usa ka abli nga tapukanan diin ang mga tawo nagpuyo. Ang mga miyembro didto mga tigpunit ug mga tigkolekta. Makakwarta sila pinaagi sa pagbaligya sa mahalin pang mga plastik ug aluminum nga ilang makuha gikan sa tapukanan. Nagpuyo sila sa gagmay kaayong mga balay nga among naadtoan sa makadaghang higayon.
Bob:
Usa ka adlaw nakadungog kami og kusog nga tukar, ug among namatikdan nga usa ka tolda ang gipabarug. Sa Cambodia, pweding nagpasabut kana nga dunay kasal o namatay.
Lori:
Among nahibaloan nga usa ka inahan sa lima o unom ka anak ang bag-o lang namatay. Walay bana nga pweding ikasulti. Bag-o pang nangmata ang mga bata ug nakamatikud nga namatay ang ilang mama.
Usa ka anak nga babaye ang nagbakho lang. Pinaagi sa tighubad, miingon siya, “Ako ang kamagulangan. Ako ang mabinlan niining tanan nga igsoon. Wala ko kahibalo unsay akong buhaton.”
Gigakos lang nako siya og hugot. Nganong dili ko makapugong? Kining bataa bag-o lang nawad-an sa iyang inahan. Gisultihan nako siya sa iningles ug giingnan, “nasayud kong dili ka makasabut nako, apan mosaad ko nimo nga imong makita pag-usab ang imong mama. Mahimo ra nimo kini. Dili ka mapasagdan nga mag-inusara.”
Daghan kaayong kasinatian nga sama niini ang naghatag kanamo og espesyal nga koneksyon sa mga tawo sa Cambodia.
Gibati namo kana nga gugma agig balos. Ang mga tawo sa Cambodia mipakita kanamo og labihang kamabination. Gihigugma namo sila tungod kay mga anak sila sa Dios. Sila among mga igsoon.
Kauban sa ubang mga tawo, nahinumdom ko nga naghunahuna, “Dili ko makahulat hangtud nga makakita kanimo sa sunod nga kinabuhi, dayon makasulti na gayud ako kanimo sa tanang butang nga akong gibati alang nimo ug sa gugma nako diha kanimo, ug unsay akong ganahan kanimo tungod kay dili nako kini ikasulti karon.”
Ang among misyon nakapanalangin kanamo sa daghan kaayong mga paagi. Ang ubang mga tawo moingon, “Ambot lang kaha kon makamisyon ba ko. Dili ko makabiya sa akong mga apo.” Duna mi lima ka gagmayng mga apo nga lalaki dihang mibiya kami, nag-edad og lima, upat, tulo, duha, usa. Duha ka apong babaye ang natawo samtang wala kami. Akong hipuson ang duha sa akong mga name tag isip misyonaryo sa Cambodia ug ihatag kini sa akong mga apo nga babaye aron mahibalo sila nga ang ilang Lola wala didto tungod kay si Lola nagbuhat sa unsay gikinahanglan sa Ginoo kaniya nga buhaton.
Bob:
Dunay daghang paagi nga makaserbisyo sa Ginoo isip mga misyonaryo. Mituo gayud kami sa gisulti ni Elder Jeffrey R. Holland mahitungod sa senior nga misyonaryo nga pagserbisyo. Miingon siya, Ako mosaad nga makahimo kamo og mga butang alang [sa inyong pamilya] sa pagserbisyo sa Ginoo nga, sa mga kalibutan nga walay katapusan, dili gayud ninyo mahimo kon magpabilin lang kamo sa balay sa paggahin og daghang panahon kanila. Unsa pa ka dakong gasa ang ikahatag sa mga apohan ngadto sa ilang kaliwatan kay sa pagsulti pinaagi sa buhat ingon man sa pulong nga, “Niini nga pamilya kami nagserbisyo og daghang misyon!’ [“Apil Kitang Tanan,” Liahona, Nob. 2011, 46.]”