Mahinungdanon nga Gasa sa Dios

Ni Presidente Russell M. Nelson

Gikan sa “Salamat sa Dios,” Liahona, Mayo 2012, 77–80.

Bag-o lang, si Sister Nelson ug ako nalingaw sa kanindot sa isda nga tropiko diha sa gamayng aquarium. Isda nga dasig og mga kolor ug lain-laing mga porma ug gidak-on nga naglangoy-langoy. Nangutana ako sa nagbantay, “Kinsay nagpakaon niining nindot nga mga isda?”

Mitubag siya, “Ako.”

Dayon nangutana ko, “Nakapasalamat na ba kini nimo sukad?”

Mitubag siya, “Wala pa!”

Ang ubang mga tawo susama niadto nga mga isda. Wala sila mahibalo mahitungod sa Dios ug sa Iyang kamaayo kanila. Unsa kaha unta ka maayo kon ang tanan mas makaamgo sa kaayo ug gugma sa Dios ug magpadayag niana nga pasalamat ngadto Kaniya.

Mapasalamaton kang Jesukristo

Ang Dios mipadala sa Iyang Anak, nga si Jesukristo, aron sa pagtabang kanato. Gihimo Niya kana tungod kay Siya nahigugma kaayo kanato.

Mianhi si Jesus sa pagtubos kanato.

Tungod sa Iyang Pag-ula, mabanhaw kita human kita mamatay.

Tungod sa Iyang Pag-ula, makabalik kita sa pagpuyo uban sa Langitnong Amahan hangtud sa hangtud.

Mipasabut si Jesus:

“Ako mao ang pagkabanhaw, ug ang kinabuhi: ang mosalig kanako, bisan siya mamatay, mabuhi siya: Ug ang tanan nga buhi ug nagasalig kanako dili na gayud mamatay” (Juan 11:25–26).

Mao kini ang talagsaong mensahe sa Pasko sa Pagkabanhaw!

Si Jesus Mao ang Akong Manluluwas

Si Jesus nabanhaw sa buntag sa Pasko sa Pagkabanhaw. Basaha ang mga kapahayag [sentence] aron mahibalo unsay Iyang nahimo para kanato. Kolori ang silaw sa adlaw human nimo mabasa ang matag kapahayag. Dayon kolori ang uban pa diha sa litrato.

Nag-antus si Jesus sa Getsemani ug sa krus aron sa pagluwas kanato gikan sa atong mga sala.
Si Jesus namatay ug nabanhaw aron sa pagluwas kanato gikan sa kamatayon.
Si Jesus mihatag kanato sa sakrament aron motabang kanato sa paghinumdom Kaniya.
Si Jesus mitudlo kanato sa pagpasaylo sa uban.
Si Jesus mipakita kanato unsaon sa pagkamabination.
Tungod kang Jesus, tanan kita mabanhaw human kita mamatay.