Ang Nawala nga Amerikana [Coat]
Ang tagsulat nagpuyo sa Iowa, USA.
“Ako, ang Ginoo, mopasaylo kinsa Ako mopasaylo, apan kamo gikinahanglan nga mopasaylo sa tanan nga mga tawo” (Doktrina ug mga Pakigsaad 64:10).
“Ma, nawala ang akong amerikana!” Miingon si Brad. Oras na para mopauli gikan sa simbahan, apan wala na makit-i ni Brad ang iyang amerikana sa sab-itanan.
“Sigurado ka ba nga diha nimo gisang-at?” Nangutana si Mama.
“Oo. Dinhi ra gyud to.” Ang amerikana [coat] ni Brad hayag nga pagka blue ug pula. Dili mahimong mawala kadto.
“Tingali nabalhin to. Pangitaon nato sulod sa gambalay [building],” miingon si Papa.
Si Mama, si Papa, ug si Brad nagbulag sa pagsusi sa lain-laing kwarto. Gitan-aw nila ang kahon nga butanganan sa nawala ug nakit-ang mga butang, diha sa kapilya, sa lawak klasehanan ni Brad sa Sunday School, sa lawak sa Primary, ug sa tanang sab-itanan sa amerikana. Gani gisusi pa nila ang mga kaligoanan, apan wala nila makit-i ang amerikana.
“Tingali may nakadala niini nga wala tuyoa. Sigurado kong iuli to nila sa sunod semana inig kabantay nila nga dili to ilaha,” miingon sa Papa.
“Sa pagkakaron, isul-ob lang una nimo ang daan nimong amerikana,” miingon si Mama.
Nagmug-ot si Brad. Dili siya ganahan sa daan niyang amerikana. Nipis kini, nilubad na, ug gamay na kaayo para niya. Ganahan siya sa bag-o niyang pula ug blue nga amerikana nga daw superhero siya nga tan-awon.
“Tingali may nakakita kon unsa kanindot ang akong amerikana ug gikawat kini,” naghunahuna si Brad. Sa unsang paagi mahitabo kana sa simbahan? Ang tanan didto angay untang magmatinuoron. Dili makatugot si Brad nga dili masakpan ang kawatan. Duna siyay plano. Sa sunod Dominggo, bantayan niya’g maayo kon si kinsa ang magsul-ob sa iyang amerikana. Dayon iya kining bawion ug mosinggit, “Hunong, kawatan!” Magmahay ra unya sila nga ila kining gihilabtan.
Dili makapaabut si Brad sa Dominggo aron tumanon ang iyang giplano. Apan ang sunod nga Dominggo igang ra kaayo nga isul-ob ang mga amerikana, ug mao usab sa misunod pang Dominggo.
Sa pagka-Dominggo human niana, matahapon si Brad nga mitan-aw sa palibut sa tanang batang lalaki sa Primary, naghunahuna kinsay mikawat sa iyang amerikana. Kana ba kahang taas nga bata? O tingali usa ka babaye. Gibati niyang wala siyay bisan usa nga kasaligan. Dili ganahan sa Brad niana nga pagbati.
Pagkahuman sa simba nagdali si Brad nga milibut sa gambalay, nagtan-aw sa mga pamilya nga misul-ob sa ilang mga amerikana. Apan wala niya makita ang iyang amerikana bisan asa. Gisusi pa gani niya ang kahon nga sudlanan sa nawala ug nakit-ang mga butang pag-usab … apan walay amerikana. Asa diay kaha to?
Sa pagpadulong nga mopauli, nakahunahuna si Brad og bag-ong plano. Mag-ampo siya. Nasayud siya nga ang Langitnong Amahan makakita sa nawalang mga butang. Nianang gabhiona nag-ampo si Brad ug miingon, “Langitnong Amahan, palihug sultihi ko kon kinsa ang mikuha sa akong amerikana. Gusto kong mabalik kini.”
Nagpaabut si Brad og ngalan sa usa ka kawatan o nawong nga maporma sa hunahuna. Apan nagsugod hinoon siya sa paghunahuna mahitungod sa iyang higala nga si Carl. Sa kasagaran si Brad motupad ni Carl sa Primary. Magkinomedyahay sila ug mangatawa og maayo. Apan wala si Carl sa simbahan sa pipila ka semana. Gimingaw na si Brad kaniya.
Unsa kaha kon si Carl ang mikuha sa iyang amerikana? Tingali nahadlok nang moadto si Carl sa simbahan tungod kay nagtuo siya nga dili na makighigala si Brad kaniya. Gusto si Brad nga mosimba og balik sa Carl. Kon si Carl ang mikuha sa iyang amerikana, mihukom si Brad, dili niya siya singgitan. Iya siyang pasayloon.
Misaka si Brad sa higdaanan, mas maayo ang gibati.
Sa pagkasunod Dominggo sa Primary, wala didto si Carl, apan dunay bag-ong batang lalaki. Nagsul-ob siya og pula-ug-blue nga badlis-badlis nga kurbata.
“Nindot nga kurbata,” miingon si Brad, naglingkod tupad sa bag-ong batang lalaki. “Daw superhero kang tan-awon.”
Mipahiyom ang bata.
Mipahiyom usab si Brad. Wala na siya mangita og mga kawatan. Nangita na siya og mga higala.