Mosalig sa Pagluwas sa Manluluwas

Ni Presidente Henry B. Eyring

Ikaduhang Magtatambag sa Unang Kapangulohan

Gikan sa usa ka pakigpulong sa debosyonal, “Ang Gahum sa Pagluwas,” nga gipamulong didto sa Brigham Young University niadtong Enero 15, 2008.

Ang Pag-ula sa Manluluwas ug ang Pagkabanhaw naghatag Kaniya sa gahum sa paglig-on kanato diha sa atong mga pagsulay o moluwas kanato gikan niini.

image of the Savior with arms outstretched

Para kanatong tanan nawad-an og mga minahal, ang dalan sa unahan posibling subo ug makaguol—labaw na gayud niadtong walay kahibalo ug pagpamatuod sa Pag-ula ug Pagkabanhaw sa Manluluwas nga si Jesukristo. Imong mahinumduman ang Iyang duha ka maduha-duhaong mga disipulo sa dalan sa Emaus. Ang nabanhaw nga Ginoo mipaduol kanila ug nangutana kon nganong nagmasulub-on sila. Si Lucas mihatag kanato sa tubag:

“Ug sila miingon kaniya, “Mahitungod ba kang Jesus nga Nazaretnon, nga usa ka propeta nga gamhanan sa buhat ug sa pulong sa atubangan sa Dios ug sa tanang mga tawo:

“Ug siya gitugyan sa among mga sacerdote nga punoan ug sa among mga pangulo aron pagahukman sa silot sa kamatayon ug ilansang sa krus.

“Ug nanaglaum unta kadto kami nga siya mao gayud ang magtubos sa Israel. (Lucas 24:19–21).

Mikuha kita og kahupayan gikan sa atong kahibalo ug pagpamatuod nga Siya kadto ang mitubos sa Israel. Siya kadto ang “mibugto sa mga higot sa kamatayon” (Mosiah 15:23). Siya kadto “ang nahaunang gibanhaw sa mga nangamatay” (1 Mga Taga-Corinto 15:20). Siya kadto ang naghimong posible sa mga pakigsaad sa templo nga nagbugkos kanato sa hangtud ngadto sa atong “gihigugma sukad kaniadto, ug nawala sa makadiyot!”¹

Niining Pasko sa Pagkabanhaw, gusto kong mopaambit og usa ka bahin sa mensahe sa debosyonal nga akong gipamulong pipila ka tuig nang milabay mahitungod sa gahum sa Manluluwas sa pagluwas. Milig-on kini kanako samtang nangandam ako niini ug namulong niini. Nag-ampo ko nga kini molig-on kaninyo samtang basahon ninyo kini.

Ang kinabuhi sayo nga natapos alang sa uban ug sa katapusan para kanatong tanan. Ang matag usa kanato pagasulayan pinaagi sa pag-atubang sa kamatayon sa tawo nga atong gihigugma.

Niadtong unang adlaw nakatagbo ako og tawo nga wala na nako makita sukad namatay ang iyang asawa. Usa kadto ka sulagma nga pagkatagbo sa usa ka makahimuot nga sitwasyon sa katilingbanong kalihokan. Nagpahiyum siya samtang miduol kanako. Nahinumdom sa pagkamatay sa iyang asawa, gihulma nako ang sagad nga pagtimbaya sa mainampingon kaayong paagi: “Kumusta ka?”

Nawagtang ang pahiyom, miluha ang iyang mga mata, ug miingon siya sa hilom, uban sa dakong panglimbasog, “Maayo ra ko. Apan lisud gayud kaayo.”

Lisud gayud kaayo kini, sigun sa nahibaloan sa kadaghanan kaninyo ug tanan kita sa umaabut mahibalo. Ang kinalisdang bahin sa pagsulay mao ang pagkahibalo kon unsay buhaton uban sa kasubo, sa pag-inusara, ug sa pagkawala nga atong bation sama nga ang usa ka bahin kanato nawala. Ang pagbangutan posibling magpadayon sama sa walay katapusang kasakit. Ug alang sa uban, posibling dunay mga pagbati sa kapungot o kawalay kaangayan.

Nahibalo ang Manluluwas sa Atong mga Pagbangutan

Ang Pag-ula ug Pagkabanhaw sa Manluluwas naghatag Kaniya sa gahum sa pagluwas kanato sa ingon niana nga pagsulay. Pinaagi sa Iyang kasinatian, mianhi Siya aron masayud sa atong mga pagbangutan. Pwede nga mahibalo Siya niini pinaagi sa inspirasyon sa Espiritu, apan hinoon gipili Niya ang pagkahibalo pinaagi sa Iya mismong kaugalingong kasinatian. Mao kini ang sugilanon:

“Ug tan-awa, siya matawo kang Maria, didto sa Jerusalem diin mao ang yuta sa atong mga kagikanan, siya ingon nga usa ka birhen, usa ka bililhon ug pinili nga tawo, kinsa gilandongan ug gipanamkon pinaagi sa gahum sa Espiritu Santo, ug manganak og usa ka bata nga lalaki, oo, gani ang Anak sa Dios.

“Ug siya magpadayon, mag-antus sa mga sakit ug mga kasakit ug mga pagtintal sa matag matang; ug kini aron ang pulong matuman nga nag-ingon nga siya modala diha kaniya sa mga sakit ug mga balatian sa iyang mga katawhan.

“Ug siya modala diha kaniya sa kamatayon, nga siya mahimo nga mobadbad sa mga higot sa kamatayon diin naghigot sa iyang mga katawhan; ug siya modala diha kaniya sa ilang mga kahuyang, nga ang iyang kasingkasing mahimo nga mapuno uban sa kalooy, sumala sa unod, nga siya mahimo nga masayud sumala sa unod unsaon pagtabang ang iyang mga katawhan sumala sa ilang mga kahuyang” (Alma 7:10–12).

Ang maayong mga tawo nga nagpalibut kanimo mosulay sa pagsabut sa imong pagbangutan sa pagkamatay sa usa ka minahal. Posibling sila mismo magbangutan. Ang Manluluwas dili lamang makasabut ug magbangutan apan mobati usab sa imong kaugalingong pagbangutan nga ikaw lamang ang mibati. Ug Siya nakaila kanimo sa hingpit. Nasayud Siya sa imong kasingkasing.

Dapita ang Espiritu Santo

Nahibalo ang Manluluwas asa sa daghang mga butang nga imong mahimo ang pinakamaayo kanimo samtang dapiton nimo ang Espiritu Santo sa paghupay ug pagpanalangin kanimo. Masayud Siya kon asa ka labing maayong magsugod. Usahay kini mao ang pag-ampo. Usahay kini mao ang pag-adto aron sa paghupay sa laing tawo. May nailhan kong usa ka biyuda nga adunay makapabalda nga balatian kinsa nadasig sa pagbisita og laing biyuda. Wala ko didto, apan sigurado ko nga ang Ginoo midasig sa usa ka matinud-anong disipulo sa pagtabang sa lain ug sa ingon niana nakatabang nilang duha.

Dunay daghang paagi nga ang Manluluwas makatabang niadtong nagbangutan, ang matag usa mihaom alang niini. Apan makasiguro ka nga Siya makahimo ug mohimo niini sa paagi nga maoy pinakamaayo alang niadtong nagbangutan ug niadtong mga anaa sa ilang palibut. Usa sa makanunayong butang kon luwason sa Dios ang mga tawo gikan sa pagbangutan mao nga mobati sila og sama sa bata nga pagpaubos sa Iyang atubangan. Usa ka talagsaong ehemplo sa gahum sa matinud-anong pagpaubos naggikan sa kinabuhi ni Job (tan-awa sa Job 1:20–22). Laing makanunayong butang, nga anaa usab kang Job, mao ang maunongon nga pagtuo diha sa gahum sa Pagkabanhaw sa Manluluwas (tan-awa sa Job 19:26).

Tanan kita mabanhaw, lakip ang inyong mga minahal nga namatay. Ang atong pagkapundok og balik uban kanila dili ang sobra kaanindot apan uban sa lawas nga dili na mamatay dili matigulang dili masakit.

Dihang mipakita ang Manluluwas sa Iyang mga Apostoles human sa Pagkabanhaw, wala lang Siya mopaniguro kanila diha sa ilang mga pagbangutan apan kanatong tanan usab kinsa tingali makasinati og pagbangutan. Mipaniguro Siya kanila ug kanato niini nga paagi:

“Ang kalinaw mag-uban kaninyo. …

“Tan-awa ninyo ang akong mga kamot ug akong mga tiil, nga mao gayud ako: hikapa ninyo ako, ug tan-awa, kay ang espiritu walay unod ug mga bukog, ingon sa inyong nakita nga ania kanako” (Lucas 24:36, 39).

Ang Ginoo makadasig kanato sa pagsangpit alang sa gahum sa pagkaluwas gikan sa atong pagbangutan sa paagi nga maoy pinakamaayo kanato. Makapili kita nga moserbisyo sa uban alang sa Ginoo. Makapamatuod kita sa Manluluwas, sa Iyang ebanghelyo, sa pagpahiuli sa Iyang Simbahan, ug sa Iyang Pagkabanhaw. Makatuman kita sa Iyang mga sugo.

Ang tanan niana nga mga pagpili magdapit sa Espiritu Santo. Ang Espiritu Santo maoy makahupay kanato sa paagi nga haum sa atong panginahanglan. Ug pinaagi sa inspirasyon sa Espiritu, makabaton kita og pagpamatuod bahin sa Pagkabanhaw ug sa tin-aw nga talan-awon sa mahimayaong panagpundok sa umaabut. Gibati ko kana nga kahupayan dihang mitan-aw ko sa lubnganan sa tawo nga akong nailhan—tawo nga akong nahibaloan nga sa umaabut nga panahon magunitan sa akong mga kamot. Sa pagkahibalo niana, wala lang ako maluwas gikan sa pagbangutan apan mapuno usab sa malipayong pagpaabut.

Kon kanang gamay nga binuhat miabut pa sa pagkahingkod, magkinahanglan unta siya og kaluwasan sa laing hut-ong sa mga pagsulay. Masulayan unta siya sa pagpabiling matinud-anon sa Dios pinaagi sa pisikal ug espiritwal nga mga hagit nga moabut sa tanan. Bisan og ang lawas usa ka talagsaon nga nilalang, ang pagmintinar niini sa hustong kondisyon usa ka hagit nga mosulay kanatong tanan. Ang tanan kinahanglang manglimbasug latas sa mga balatian ug sa mga epekto sa katigulangon.

“Magpaubos Ka”

Ang gahum sa pagkaluwas gikan sa atong mga pagsulay anaa na. Molihok kini sa samang paagi sa pagkaluwas gikan sa pagsulay nga moabut gumikan sa pag-atubang sa kamatayon sa usa ka minahal. Sama nga ang pagkaluwas dili kanunay mao ang pagkaluwas sa kinabuhi sa usa ka minahal, ang pagkaluwas gikan sa ubang mga pagsulay posibling dili ang pagwagtang niini. Ang Ginoo tingali dili mohatag og kahupayan hangtud atong mapalambo ang pagtuo sa paghimo og mga pagpili nga magdala sa gahum sa Pag-ula nga moepekto sa atong kinabuhi. Wala kita Niya pabuhata niana tungod kay wala siya magpakabana apan tungod sa gugma alang kanato.

Ang usa ka giya alang sa pagdawat sa gahum sa Dios sa pagkaluwas gikan sa oposisyon sa kinabuhi gihatag ngadto ni Thomas B. Marsh, kanhi Presidente sa Korum sa Napulog Duha ka mga Apostoles. Anaa siya sa lisud nga mga pagsulay, ug ang Ginoo nasayud nga mas daghan pa siya og atubangon. Mao kini ang tambag ngadto kaniya nga akong gigamit sa akong kaugalingon ug itanyag kaninyo: “Magpaubos ka; ug ang Ginoo nga imong Dios moagak kanimo pinaagi sa kamot, ug mohatag kanimo og tubag sa imong mga pag-ampo” (Doktrina ug mga Pakigsaad 112:10).

Gusto kanunay sa Ginoo nga tultulan kita ngadto sa pagkaluwas pinaagi sa pagkahimo natong mas matarung. Nagkinahanglan kana og paghinulsol. Ug gikinahanglan ang pagpaubos. Mao nga ang pamaagi sa pagkaluwas nagkinahanglan kanunay og pagpaubos aron makahimo ang Ginoo sa pag-agak kanato pinaagi sa kamot kon asa man kita gusto Niyang dad-on latas sa mga kasamok ug ngadto sa pagkabalaan.

Ang mga pagsulay makapamunga og kasilag o pagkawala sa paglaum. Ang pagpaubos nga gikinahanglan nimo ug nako aron ang Ginoo makagiya kanato pinaagi sa kamot naggikan sa pagtuo. Naggikan kini sa pagtuo nga ang Dios buhi gayud, nga Siya nahigugma kanato, ug kana maoy Iyang gusto—ingon man niini kalisud—kanunay kining maayo para kanato.

Ang Manluluwas mipakita kanato niana nga pagpaubos. Nabasa ninyo kon sa unsang paagi Siya nag-ampo sa Tanaman sa Getsemani samtang nag-antus Siya sa pagsulay tungod og alang kanato lapas sa atong abilidad sa pagsabut o sa paglahutay, o gani sa akong paghulagway. Nahinumdom kamo sa Iyang pag-ampo: “Amahan, kon buot ka, kuhaa kining kopa gikan kanako; hinoon dili ang akong pagbuot, maoy matuman, kondili ang imo” (Lucas 22:42).

Nasayud Siya ug misalig sa Iyang Langitnong Amahan, ang talagsaong Elohim. Nasayud Siya nga ang Iyang Amahan mao ang makagagahum sa tanan ug walay sukod ang kamabination. Ang Hinigugmang Anak mihangyo sa mapaubsanong mga pulong—sama niadtong gamay nga bata—alang sa gahum sa pagkaluwas sa pagtabang Kaniya.

Batuni ang Kaisug ug Kahupayan

Ang Amahan wala moluwas sa Anak pinaagi sa pagtangtang sa pagsulay. Tungod og alang kanato wala Niya kana buhata, apan gitugutan Niya ang Manluluwas sa paghuman sa misyon nga Iyang gianhi aron buhaton. Sa gihapon pwede kitang magbaton og kaisug ug kahupayan gikan sa pagkahibalo sa tabang nga gihatag sa Amahan:

“Ug dihay manolunda nga mitungha kaniya gikan sa langit sa pagpalig-on kaniya.

“Ug sa nag-antus siya sa hilabihang kasakit, siya nag-ampo sa labi pa kamainiton gayud: ug ang iyang singot nanibug-ok daw apol nga nagpangatagak sa yuta.

“Ug sa pagtindog niya gikan sa pag-ampo, iyang giadto ang mga tinun-an ug iyang nakita sila nga nanghikatulog tungod sa kasubo,

“Ug siya miingon kanila, Nganong matulog man kamo? bangon ug pag-ampo kamo aron dili kamo mahidalin-as ngadto sa panulay” (Lucas 22:43–46).

Ang Manluluwas nag-ampo alang sa pagkaluwas. Ang gihatag Kaniya dili ang pag-eskapo gikan sa mga pagsulay apan ang kahupayan igo nga makalatas niini sa mahimayaong paagi.

Ang iyang mando sa Iyang mga disipulo, diin sila mismo gipangsulayan, usa ka giya alang kanato. Pwede kitang motino sa pagsunod niini. Pwede kitang motino sa pagbarug ug sa pag-ampo uban sa dakong pagtuo ug pagpaubos. Ug makasunod kita sa sugo nga gidugang diha sa basahon ni Marcos: “Bangon kamo ug manglakaw kita” (Marcos 14:42).

Gikan niini, anaa kay tambag nga makalatas sa pisikal ug espiritwal nga mga pagsulay sa kinabuhi. Nagkinahanglan kamo sa tabang sa Dios human nga inyong mahimo ang tanan sa inyong kaugalingon. Mao nga bangon ug lakaw, apan angkona kini nga tabang diha dayon kutob sa mahimo, dili maghulat nga anaa na sa kalisud aron magpaluwas.

Mohatag ko sa akong balaang pagsaksi nga ang Dios nga Amahan buhi ug nahigugma kanato. Nasayud ako niana. Ang Iyang plano sa kalipay hingpit, ug kini mao ang plano sa kalipay. Si Jesukristo nabanhaw, mao usab kita. Nag-antus Siya aron Siya makatabang kanato sa tanan nga atong mga pagsulay. Iyang gibayaran ang lukat alang sa tanan natong mga sala ug sa tanan niadtong mga anak sa Langitnong Amahan aron maluwas kita gikan sa kamatayon ug sa sala.

Nasayud ako nga diha sa Simbahan ni Jesukristo, ang Espiritu Santo makaanhi aron sa paghupay ug paglimpyo kanato samtang sundon nato ang Agalon. Hinaot nga madawat ninyo ang Iyang kahupayan ug tabang sa inyong mga panahon sa panginahanglan, pinaagi sa tanang pagtesting ug mga pagsulay sa inyong kinabuhi.