Reykjavík, Iceland

Uban sa naputos sa snow nga Bungtod sa Esja nga makita sa luyo, ang Reyjavik, ang mabulukon nga kapital sa Iceland, mainitong mopadayon sa tanan ngadto sa usa ka isla nga nasud kapin sa 1,000 ka milya (1,609 km) gikan sa kinadak-ang dapit sa Uropa. Unang gipuy-an sa mga Viking niadtong AD 874, ang Reykjavik mao ang sentro sa kultural, ekonomikal, ug mga kalihokan sa gobyerno sa Iceland, usa usab sa pinakalimpyo, pinakaberde, ug pinakaluwas nga mga siyudad sa kalibutan.

Ang unang duha ka taga Iceland nabunyagan sa Denmark niadtong 1851. Namauli sila sa Iceland sa wala madugay, ug niadtong 1853 natukod ang unang branch. “Karon dunay hapit 300 ka mga miyembro sa Iceland sa tulo ka mga branch, usa sa Reykjavik, Akureyri, ug Sellfoss. Ang kinadul-ang templo anaa sa London, England, 1,177 ka milya (1,894 km) gikan sa Reykjavík.

Bisan og ang gidaghanon sa mga miyembro diyutay ra, ang Simbahan nagpadayon sa paglambo. Bisan sa mga hagit sa pagkahilit, paghubad sa mga materyal sa Simbahan, dili maayong dagan sa panahon, ug kultural nga mga babag, misaad ang mga lider sa Simbahan nga ugma damlag ang Iceland mahimong kahayag sa ubang kanasuran. Si Presidente Gordon B. Hinckley (1910–2008) mibisita sa Iceland ug mipahinumdom sa mga tawo nga sila mga “katawhan sa ‘kalig-on ug gahum ug kapasidad’ sa paghimo og talagsaong mga butang” (“Wonderful to Have Sweet, Good Land,” Church News, Sept. 21, 2002, 10).

Ang Misyon sa Iceland naorganisar niadtong 1894, apan ang pagsangyaw nahunong niadtong 1914. Ang Iceland nahimong kabahin sa Misyon sa Denmark Copenhagen niadtong 1975.
Niadtong 1977, si Elder Joseph B. Wirthlin (1917–2008), kanhi sakop sa Unang Korum sa Seventy, opisyal nga mipahinungod sa Iceland alang sa pagsangyaw sa ebanghelyo.
Niadtong 1981 ang Basahon ni Mormon namantala na sa Icelandic—usa ka pinulongan nga wala gamita bisan asa sa kalibutan gawas lang dinhi.