Ang Pinakatalagsaong Pagpahayag sa Gugma sa Dios

Ni Presidente M. Russell Ballard

Akting nga Presidente sa Korum sa Napulog Duha ka mga Apostoles

Gikan sa usa ka pakigpulong sa Abril 1988 nga kinatibuk-ang komperensya.

Ang Dios mipahayag sa Iyang gugma alang kanato pinaagi sa paghatag sa giya nga atong gikinahanglan aron molambo ug makakab-ot sa atong potensyal. Siya kinsa nakaila sa kadaghanan mahitungod kanato, sa atong potensyal, ug sa atong mahangturon nga mga posibilidad naghatag kanato og balaanong tambag ug mga sugo diha sa Iyang mga pang-instruksyon nga mga manwal—ang balaang mga kasulatan. Kon makasabut kita ug mosunod niini nga mga instruksyon, ang atong kinabuhi adunay katuyoan ug kahulugan. Atong makat-unan nga ang atong Magbubuhat nahigugma kanato ug nagtinguha sa atong kalipay. Diha sa dili ikatandi nga pagpakita niining balaan nga gugma alang kanato, gipadala Niya ang Iyang Bugtong Anak, nga si Jesukristo.

“Kay gihigugma gayud sa Dios ang kalibutan, nga tungod niana gihatag niya ang iyang bugtong Anak, aron ang tanan nga mosalig kaniya dili malaglag, kondili may kinabuhing dayon.

“Kay gipadala sa Dios ang iyang Anak nganhi sa kalibutan, dili aron ang kalibutan iyang pagahukman sa silot, kondili aron ang kalibutan maluwas pinaagi kaniya” (Juan 3:16–17).

Si Jesus natawo dinhi sa mortalidad. Nangulo Siya og usa ka hingpit nga kinabuhi ug, sa paghimo niini, gimarkahan ang dalan nga atong sundon. Gitudloan Niya ang Iyang mga disipulo: “Ako mao ang kahayag alang sa kalibutan: siya nga magasunod kanako dili gayud magalakaw sa kangitngit, hinonoa magabaton siya sa kahayag nga magahatag og kinabuhi” (Juan 8:12).

Pwede natong masugdan ang pagsabut sa kaladmon sa gugma ni Kristo alang kanato kon atong hunahunaon nga andam Siya nga mitubos ug nag-antus sa kasakit alang sa atong mga sala, “kansang pag-antus nakapahimo [kaniya], gani ang Dios, ang labing halangdon sa tanan, sa pagkurog tungod sa kasakit, ug sa pag-agas sa dugo sa matag lungag sa panit, ug sa pag-antus sa lawas ug sa espiritu” (Doktrina ug ma Pakigsaad 19:18).

Niining Pasko sa Pagkabanhaw, mohatag kita og espesyal nga pasalamat sa Dios tungod sa Pag-ula ug Pagkabanhaw sa Iyang Hinigugmang anak, si Jesukristo. Kay diha Kaniya, pinaagi Kaniya, ug tungod Kaniya, kining temporaryong mortal nga kahimtang mahimo nga permanente, perpekto nga panimuyo, diin ang mga pulong dili makapahayag sa atong kalipay.

Ang tanang mga kahibulongan sa kinaiyahan maoy mga lakbit nga panglantaw sa Iyang balaan nga gahum ug mga pagpahayag sa Iyang gugma. Gani ang pinakatalagsaon sa tanang milagro nagpaabut kanato. Mahitabo kini kon, pinaagi sa Iyang gahum, mobangon na kita gikan sa pagkamatay ug sa lubnganan ngadto sa usa ka bag-ong kalibutan nga dili molabay, diin, kon takus man kita, Siya ug ang atong Amahan sa Langit atong ikauban hangtud sa hangtud.