Tulo ka Leksyon mahitungod sa Gugma, Kalipay, ug Kalinaw
Ni Brian K. Ashton
Ikaduhang Magtatambag sa Kinatibuk-ang Kapangulohan sa Sunday School
Gikan sa usa ka debosyonal nga pakigpulong, “Happiness, Deceit, and Small Things,” nga gipakigpulong sa Brigham Young University niadtong Disyembre 5, 2017.
Ang pagsunod niining tulo ka lakang makahimo og dakong kalainan sa inyong kinabuhi ug makatabang nga imong mabati ang mga bunga sa Espiritu.
Sa estudyante pa ko sa kolehiyo, naghunahuna ko og maayo sa akong kaugmaon. Dihang nakab-ot nako ang umaabut—buot ipasabut human sa kinabuhi sa kolehiyo—nakakat-on ko og tulo ka importante kaayong mga leksyon nga nakahimo og dakong kalainan sa akong kinabuhi. Gusto nakong ipaambit kini nga mga leksyon kaninyo uban sa panghinaot nga dili kamo dugay nga makakat-on sama sa kadugay sa akong pagkat-on niini. Makatabang kini nga inyong makit-an ang mas dakong kalipay sa kinabuhi—ug sa katapusan mabatunan ang kahimayaan uban sa inyong Langitnong Amahan.
1. Tinguhaa ang Kalipay, Kalinaw, ug ang Espiritu Santo
Nahimamat nako ang akong asawa, si Melinda, atol sa akong ikaduhang tuig sa kolehiyo [sophomore] mga unom ka bulan human ko nakauli gikan sa akong misyon. Diha dayon nasayud kong gusto ko nga makigminyo ni Melinda. Hinoon, si Melinda dili susama og kasinatian. Ang tubag wala moabut hangtud milabay ang lima ka tuig nga sa katapusan nadawat niya ang tubag nga “OK” ra nga makigminyo siya nako.
Atol niadtong lima ka tuig, nasugatan nako ang usa sa mas lisud nga mga pagsulay sa akong kinabuhi. Nakaila ko kinsay angay nakong minyoan, ug padayon kong giaghat sa Espiritu, apan daw dili nako makab-ot kana nga tumong.
Sa wala madugay human ko nakagradwar, mihukom si Melinda nga magmisyon—sa usa sa mga rason, nakombinser ko, aron makapalayo kanako. Dunay mga panahon samtang didto siya sa iyang misyon nga nagmiserable ko tungod kay nagtutok ko sa unsay wala kanako. Apan, nagtuon ko sa mga kasulatan ug nag-ampo matag adlaw, nagserbisyo sa Simbahan, ug naningkamot sa pagbuhat sa mga butang nga nagdala sa Espiritu Santo sa akong kinabuhi.
Usa ka sayo, bugnaw kaayong Dominggo sa buntag sa Minneapolis, Minnesota, USA, samtang nagdrayb ko padulong sa miting sa Simbahan, naghunahuna ko, “Unta nagmiserable na gyud ko karon. Sama og walay nahitabo sa unsay akong gusto. Apan dili man ko miserable. Di katuohan ang akong kalipay!”
Karon, unsaon nako sa pagkamalipayon kon, para nako ,ang akong giagian lisud nga pagsulay?
Ang tubag makita diha sa Mga Taga-Galacia 5:22–23: “Apan ang bunga sa Espiritu mao ang gugma, kalipay, kalinaw, pailub, pagkamapuanguron, pagkamaayo, pagkamatinumanon, kaaghop, pagpugong sa kaugalingon.”
Tungod kay naghimo ko sa mga butang nga nagdala sa Espiritu sa akong kinabuhi, akong gibati ang gugma sa Dios. Akong gibati ang kalipay ug kalinaw. Makaantus ko og dugay ug malipayon sa gihapon.
Ang pagbaton og gugma, kalipay, ug kalinaw sa atong kinabuhi, sa atong pamilya, ug sa atong kaminyoon wala maggikan tungod sa pagbaton og dakong balay, nindot nga mga sakyanan, pinakabag-ong sinina, kalampusan sa panarbaho, o bisan unsang uban pang butang nga giingon sa kalibutan nga maoy nagdala og kalipay. Gani, tungod kay ang pagbati sa gugma, kalipay, ug kalinaw naggikan man sa Espiritu, ang pagbati niini wala kinahanglanang konektado gayud sa atong temporal nga mga kahimtang.
Palihug sabta nga wala ko mag-ingon nga kanunay kitang malipayon o nga ang atong temporal nga mga kahimtang dili gayud makaapekto sa atong kalipay. Gani, kon dili kita makatilaw og kapaitan, dili kita masayud sa katam-is (tan-awa sa Doktrina ug mga Pakigsaad 29:39; tan-awa usab sa Moises 6:55).
Kinahanglan manglimbasug kita usahay. Dugang pa, ang ubang pisikal ug emosyunal nga mga kahimtang makamugna og grabing pag-antus ug maghimong lisud kanato sa pagbati sa Espiritu. Apan kon maningkamot kita sa pagbaton sa Espiritu sa atong kinabuhi ug magasalig sa Dios, kita, sa kinatibuk-an, magmalipayon.
Mopamatuod ko gikan sa personal nga kasinatian nga kini tinuod. Sukad sa akong kasinatian samtang si Melinda didto sa iyang misyon, akong nabantayan nga kon maghimo ko sa mga butang nga magdala sa Espiritu diha sa akong kinabuhi, lakip ang pagpili nga motuo ug modawat nga ang mga butang mosalir sigun sa tuyo sa Dios, sa kasagaran nagmalipayon ako (tan-awa sa Jacob 3:2).1
2. Ayaw Pagpailad
Itanyag ni Satanas ang mga pangilad nga mga puli sa tanan nga gihimo sa Dios sa tinguha sa paglibug ug paglingla kanato. Bisan sa mga tinguha ni Satanas sa pagkumbinser kanato, mitudlo kanato ang Manluluwas nga “ang dautan nga kahoy [dili] mohatag og maayo nga bunga” (3 Nephi 14:18). Tungod kay si Satanas usa ka dautan nga kahoy, dili siya makapabati kanato og “gugma, kalipay, kalinaw, pailub, pagkamapuanguron, pagkamaayo, pagkamatinumanon, kaaghop, [ug] pagpugong sa kaugalingon” (Mga Taga-Galacia 5:22–23). Hinuon, gusto ni Satanas nga himoon kitang miserable (tan-awa sa 2 Nephi 2:27).
Busa unsa ang buhaton ni Satanas? Maningkamot siya sa paglingla kanato.
Usa sa akong higala, usa sa mga pinili, nalingla. Ang akong higala nakaalagad og misyon ug usa ka maayo kaayo nga misyonaryo. Dihang nauli na siya gikan sa misyon, tuyo niya ang pagbuhat sa tanang ginagmayng butang nga nagdala sa Espiritu sa iyang kinabuhi ug naglig-on kaniya atol sa iyang misyon. Ug sulod sa mubo nga panahon, nahimo niya kini.
Apan, nakakita siya og mga higala, daghan kanila mga nahuman na og misyon, mosimba matag Dominggo apan sa gawas sa Simbahan nagpakabuhi sa pamaagi sa kalibutan. Daw malipayon sila. “Makalingaw” nga mga butang ang ilang gipanghimo. Ug ang estilo sa ilang kinabuhi daw wala magkinahanglan og daghang trabaho sama sa iyang gihimo.
Sa hinay-hinay gihunong niya ang paghimo sa ginagmayng mga butang nga nagdala kaniya og espiritwal nga kalig-on sa iyang misyon. Sa gihapon duna siyay pagpamatuod, apan giingnan ko niya nga, “Basta makatambong lang ko sa akong mga miting sa Simbahan, OK ra ko—naa gihapon ko sa tukmang dalan.” Bisan pa, miingon siya, “sa Espirituhanong paagi, dili ko aktibo.”2 Samtang nagkapabuhi siya sa pamaagi sa kalibutan, ang usa ka ngil-ad nga pagpili misangput sa lain, ug sa wala madugay ningmabdos siya.
Sa ngadto-ngadto misangput ang dili matarung niyang mga pagpili. Dili siya malipayon, ug nahibalo siya niini. Maayo na lang, ang akong higala nakamatikud nga nalingla siya, ug naghinulsol siya.
Ang iyang sugilanon nagpakita nga bisan ang pinakamaayo kanato malingla. Dugang pa, nagpasabut ang iyang sugilanon nga kinahanglang padayon kitang mag-amping batok sa pagpanglingla. Matuman nato kini pinaagi sa paghimo sa ginagmayng mga butang nga nagdala sa Espiritu sa atong kinabuhi.
Malipayon kong moreport nga karon malipayon ang akong higala, naningkamot sa pagtuman sa mga sugo, ug aktibo sa pisikal ug sa espiritwal diha sa ebanghelyo.
Ang mga panglingla ni Satanas moabut sa daghang paagi. Hisgutan nako ang pipila lamang niini.
Naningkamot si Satanas sa pagkumbinser kanato nga himoon natong prayoridad ang temporal nga mga butang batok sa espiritwal nga mga butang. Makasulti kita nga ang atong mga prayoridad wala sa lugar pinaagi sa pagmatikud kon unsa ka kasagaran kitang moingon nga, “Daghan lang kaayo ko’g buhatunon o kapoy kaayo ko karon sa ________________.” Isulat sa blangko: pagtambong sa templo, pagpangalagad, pagtuon ug pagpamalandong sa mga kasulatan, sa pagtuman sa akong calling, o gani sa paghimo sa akong mga pag-ampo.
Usa ka rason nga mobati kita nga daghan kaayo’g buhatunon mao kay si Satanas naningkamot gayud sa pagsamok kanato. Gamiton niya ang smartphone nga naa sa atong kamot, ang radyo sa atong sakyanan, ang mga telebisyon sa atong balay, ug ang labihan pa kadaghang uban nga butang aron masamok kita sa hapit tanang panahon. Isip resulta, mobati kitang mas daghan og buhatunon kay sa tinuod.
Laing resulta niini nga pagsamok mao nga magkaanam kita nga dili na kaayo makapamalandong. Maningkamot si Satanas sa pagsamok kanato tungod kay nasayud siya nga ang pagpamalandong, ilabi na sa mga kasulatan, mosangput sa mas dakong pagkakabig ug pagpadayag.
Lain pang mga panglingla ni Satanas moabut pinaagi sa ideya nga ang makita natong mga lihok mas importante kay sa naa sa kinahiladman natong mga pagdasig. Kon magkulang kita sa tukmang kadasig sa paghimo og espirituhanong mga butang, mapakyas kita sa pagsinati sa kalipay sa ebanghelyo. Isip resulta, ang pagtuman sa mga sugo magsugod nga bation nga daw puol, ug nasayud si Satanas nga kon iya kitang mapabati niining paagiha, lagmit kitang mohunong sa paghimo sa atong nasayran nga angay natong buhaton.
Linglahon usab kita ni Satanas sa pagpatuo kanato nga ang kalipay ug kamaya maggikan sa pagbaton og sayon nga kinabuhi o sa paglingaw-lingaw sa tanang panahon. Dili kini mao. Ang tinuod mao nga walay kalipay o kamaya kon walay butang nga latason (tan-awa sa 2 Nephi 2:11, 23).
Ang katapusan sa mga panglingla ni Satanas nga akong hisgutan mao nga maningkamot siya sa pagkumbinser kanato nga ang kadautan, inubanan sa temporaryong mga kahimuot, mao ang tinuod nga kalipay. Nahibalo si Satanas nga, bisan sa mubong panahon, ang pihong mga pagbati o mga emosyon (1) makapahunahuna kanato nga mibati kita sa mga bunga sa Espiritu, (2) mosalipud sa atong tinguha alang niana nga mga bunga, o (3) mobati nga daw usa ka maayong panghulip.
Sama pananglit, si Satanas pweding motintal nato aron magtinguha sa pagpangibug imbis mahigugma. Iya kitang danihon pinaagi sa kahinam imbis sa malungtarong kalipay. Tinguha niya ang pagsamok kanato kay sa paghatag kanato og kalipay. Gusto niya nga maarogante kita, labihan ka mahinamon, ug molihok sa unsay gidayeg sa kalibutan imbis nga dili maghinakog, padayon nga masulundon, ug nakatutok sa espiritwal sa tukmang paagi. Ang iyang mga tintasyon maghatag kanato og kalibug, nga modala kanato sa paghunahuna nga ang pagsupak sa mga sugo magdala og kalipay.
3. Buhata ang Ginagmayng mga Butang
Sa kasagaran ang ginagmayng mga butang maoy modala sa Espiritu sa atong kinabuhi, magpugong aron dili kita malingla, ug sa katapusan makatabang nga atong maangkon ang kalig-on sa pagtuman sa mga sugo ug pag-angkon og kinabuhing dayon. Gitudlo sa Manluluwas kini nga baruganan ngadto sa mga elder sa Simbahan sa Kirtland, Ohio: “Busa, ayaw pagluya diha sa maayo nga buhat, kay kamo nagpahimutang sa tukuranan sa usa ka mahinungdanon nga buhat. Ug gikan sa gagmay nga mga butang magagikan ang mga dagko” (Doktrina ug mga Pakigsaad 64:33).
Nganong importante man kaayo ang gagmayng mga butang? Sa nagsunod nga bersikulo, mipasabut ang Manluluwas nga “ang Ginoo nagkinahanglan sa kasingkasing ug sa usa ka andam nga hunahuna” (Doktrina ug mga Pakigsaad 64:34). Ngano nga gikonektar man sa Manluluwas ang paghimo og ginagmayng butang ngadto sa kasingkasing ug usa ka andam nga hunahuna? Tungod kay diha sa padayon nga paghimo sa ginagmayng mga butang, gitugyan nato ang atong mga kasingkasing ug hunahuna ngadto sa Dios, nga maoy maglimpyo ug magbalaan kanato (tan-awa sa Helaman 3:35).
Kini nga paglimpyo ug pagbalaan makausab gayud kon si kinsa kita, sa hinay-hinay, aron mas magkaanam kita og kahisama sa Manluluwas. Maghimo usab kini kanato nga mas madawaton sa mga pag-aghat sa Espiritu Santo, nga dili na kaayo kita malingla.
Sa akong mga senior nga tuig sa high school, ang akong papa ang motudlo nako sa seminary sa among balay. Tungod kay ang hisgutanan nianang tuiga mao ang Basahon ni Mormon, mihukom ang akong papa nga magdungan kami sa pagbasa niini, matag bersikulo, ug hisgutan unsay among nakat-unan. Samtang magbasa kami, mangutana ang akong papa nga makapahunahuna kanako sa unsay among gibasa, ug ipasabut niya ang mga butang nga wala nako masabti. Mahinumdom gihapon ko sa pagkat-on mahitungod sa Manluluwas ug sa pagbati nga Siya mibisita gayud sa mga Nephite ug nga ako mapasaylo gayud sa akong mga sala tungod sa Iyang Pag-ula.
Akong gisubay ang akong pundasyon diha sa mga kasulatan niadtong mga sesyon nga ako ug si papa nagkauban. Duna koy gibati samtang nagbasa kami. Ug tingali ang mas importante, ang akong mga tinguha, mga gusto, ug mga buhat nausab. Gusto kong mas momaayo. Nagsugod ko sa pagkakita kon asang dapita ako nalingla. Mas kanunay kong naghinulsol. Dapit sa katapusan sa akong unang tuig sa kolehiyo, nagbasa ko sa mga kasulatan matag adlaw.
Niining panahona, si Presidente Ezra Taft Benson (1899–1994) mihangyo sa mga miyembro sa Simbahan sa pagbasa sa Basahon ni Mormon matag adlaw ug gamiton unsay ilang mga nakat-unan.3 Mao nga, agig dugang sa bisan unsay akong gibasa, ang importante may nabasa ko gikan sa Basahon ni Mormon.
Sa akong misyon nakakat-on ko unsaon gayud sa pagtuon ug pagbusog diha sa mga kasulatan. Dili lang kay mibati ko sa Espiritu Santo samtang nagbasa ko, apan nagsugod usab ako sa pagbati og kalipay samtang nagsiksik ako sa mga kasulatan aron makakita og mga tubag sa akoang mga problema ug sa akong mga investigator.
Human sa akong misyon, padayon kong nagbusog diha sa mga kasulatan matag adlaw. Tungod kay nagdapit man kini nga buhat sa Espiritu Santo dinhi sa akong kinabuhi, akong nadawat ang Iyang direksyon sa pagtabang kanako nga magamit ang akong panahon sa mas mapuslanong paagi. Isip sangputanan, mas maayo ang akong nahimo sa eskwelahan ug, sa wala madugay, sa akong trabaho. Mas sayon ang paghimo og maayong mga desisyon. Mas midugang pa ang akong mga pag-ampo ug mas mikugi ko sa pagtuman sa akong mga calling. Ang pagbusog sa mga kasulatan sa matag adlaw wala mosulbad sa akong mga problema, apan mas misayon ang kinabuhi.
Niadtong Agosto 2005, si Presidente Gordon B. Hinckley (1910–2008) mihatag og hagit sa pagbasa og balik sa Basahon ni Mormon sa dili pa matapos ang tuig.4 Tungod kay nagbasa man ko sa Basahon ni Mormon matag adlaw, naabut na ko sa Ether o Moroni. Agig sangputanan, dihang nahuman nako og basa human sa usa o duha ka semana o lapas pa, nakaingon ko nga nakompleto nako ang gihagit ni Presidente Hinckley.
Apan usa ka matinud-anong home teacher mibisita sa among pamilya. Nangutana siya kon kumusta nako sa akong paghimo sa imbitasyon ni Presidente Hinckley.
Gisultihan nako siya nga swerte kaayo ko nga nagsugod sa Basahon ni Mormon sa wala pa mohagit si Presidente Hinckley. Dayon, uban sa pipila ka pagdayeg sa kaugalingon, mipahibalo ko nga nakompleto nako ang buluhaton.
Maayo na lang, ang akong home teacher lahi og pagtan-aw sa mga butang. Sa dihang mabination siyang mikorihir kanako, ang Espiritu mihunghong kanako nga eksakto ang akong home teacher.
Karon kinahanglan kong mobasa og duha ka kapitulo matag adlaw aron akong makahuman na usab sa katapusan sa tuig. Samtang gidugangan nako ang akong pagbasa sa Basahon ni Mormon, akong nabantayan nga mas dugang pa nga gahum ang misulod sa akong kinabuhi. Mas midugang ang akong kalipay. Mas tin-aw ang akong pagkakita sa mga butang. Mas kanunay kong naghinulsol. Gusto kong mangalagad ug moluwas sa uban. Dili na kaayo ko madutlan sa mga panglingla ug mga tintasyon ni Satanas. Mas gihigugma nako ang Manluluwas.
Nianang Nobyembre gitawag ko nga mahimong bishop sa among ward. Ang pagkompleto sa hagit ni Presidente Hinckley nag-andam kanako niana nga calling. Sukad niadto, akong namatikdan nga dihang mas nagkadaghan ang akong buluhaton sa trabaho man o sa simbahan, mas nagkinahanglan ko nga magtuon sa mga kasulatan, ilabi na sa Basahon ni Mormon.
Maangkon nimo ang susamang mga panalangin ug gahum sa imong kinabuhi kon ikaw usab magbusog sa mga kasulatan matag adlaw. Mosaad ko nga kon magbusog ka sa mga kasulatan matag adlaw, ilabi na sa Basahon ni Mormon, imong madapit ang Espiritu sa imong kinabuhi ug gusto kang makaampo matag adlaw, mas kanunayng makahinulsol, ug makita nga mas sayon ang pagsimba ug pag-ambit sa sakrament matag semana.
Mopamatuod ko nga kon buhaton nimo ang ginagmayng butang ug mosalig sa Ginoo, makita nimo ang gugma, kalipay, kalinaw, ug kamaya bisan unsa ang imong mga kahimtang. Mopamatuod sab ko nga nahimo kining posible tungod sa sakripisyo ni Jesukristo. Ang tanang maayo nga mga butang miabut tungod Kaniya (tan-awa sa Moroni 7:22, 24).