Bisan Gani ang Usa ka Kusog Kaayong Bagyo Dili Makapugong Kanamo

Koraima Santiago de Jesus

San Juan, Puerto Rico

Wala madugay human ko nakauli sa akong misyon, nakadawat ko og imbitasyon nga moadto og usa ka sayawan. Didto sa sayawan, nakalimot ko asa ang akong selfon ug ang usa ka batan-ong lalaki mitanyag nga motabang nako sa pagpangita niini. Samtang nag-istorya kami, among nadiskobrihan nga parehas diay kaming mga returned missionary ug nag-inambitay kami’g mga ideya ug mga tumong.

Ang among relasyon nagpadayon sa paglambo, ug nagkasabut kami nga magpakasal. Among pangandoy nga masilyo sa Templo sa Washington D.C. sa dili pa kini manirado para ayuhon inig ka Marso 2018. Apan human sa among paghimo niana nga desisyon, gisulayan kami. Una, nawad-an ko sa akong trabaho ug wala nay paagi nga makatigom og kwarta para sa among biyahe ngadto sa templo. Sunod, usa ka kusog kaayong bagyo ang moabut nga moigo sa Puerto Rico sa bisperas gayud sa petsa sa among kasal.

Dihang ang kusog kaayo nga Bagyong Maria miigo, miguba kini sa among matahum nga isla. Sirado ang mga tindahan. Wala kami kuryente; tubig, pagkaon, ug ang ubang nag-unang mga butang lisud nang pangitaon. Nawala ang tanan nga among giplano aron magamit sa among pagpakaon sa mga bisita [reception]. Kinahanglang ikanselar na namo ang pagpakaon sa mga bisita [reception], ug malagmit ikanselar na pud namo ang among kasal. Ang biyahe padulong ug pagawas sa Puerto Rico limitado ra, ug walay nasayud hangtud kanus-a pa kini. Nagsugod sa pagkawala ang akong kadasig, ug napuno ko sa pagduha-duha ug kalibug.

Usa ka gabii, ang akong pamanhunon ug ako nag-istoryahay bahin sa maong sitwasyon. Ang biyahe dili gyud masiguro, ug wala na kami pangpakaon sa mga bisita o sinina nga pangkasal, apan ang Espiritu mikumpirmar nga kinahanglang mosalig kami sa Ginoo. Ang pinakaimportanting butang mao ang pagkasilyo sulod sa templo. Nag-ampo kami sa Langitnong Amahan alang sa tabang.

Kon mabalik na ang mga biyahe sa eroplano pagawas sa Puerto Rico, maghimo kami og laing mga plano sa pagbiyahe ug usabon ang petsa sa kasal. Wala kami komunikasyon sulod sa mga semana human sa kusog kaayong bagyo, apan ang selfon sa usa ka higala pweding makatawag. Iya kining gipagamit namo sa pagkontak sa templo. Among nahan-ay og usab ang tanan aron masilyo gihapon kami! Pipila ka semana sa wala pa ang among biyahe, ang mga sakop sa pamilya ug mga higala midonar og mga sapatos ug sinina ug mitabang nga among makuha ang daghang butang para sa among kasal.

Dihang sa katapusan nakasulod na mi sa templo, gibilin namo ang tanan namong mga kabalaka. Naggunitay kami sa pagsugat sa among kaugmaon nga magkauban. Makaingon gayud ako nga akong gibati ang mga kamot sa Ginoo nga naggiya ug mipaniguro kanamo basta mosalig lang kami Kaniya, MAHIMO ra ang tanan. Karon, napanalanginan kami og ambungan nga anak nga lalaki ug pamilya kami nga nasilyo alang sa tanang kahangturan.