Atong mga Panimalay, Atong mga Pamilya
Ang among Anak nga Lalaki Anak sa Langitnong Amahan
Ang tagsulat nagpuyo sa Arizona, USA.
Ang mga pulong nga dili gikan sa akong kaugalingon misulod sa akong hunahuna: “Nagtuo ka ba nga gihigugma nimo siya labaw sa akong paghigugma?”
Litrato sa tigsulat ug sa iyang anak
Ang among pinalangga nga gamayng anak nga lalaki, si Hayden, miabut dinhi sa kalibutan nga milagom, wala magginhawa, ug naglisud sa kinabuhi. Walay hilak. Walay lihok.
Dihang ang mga doktor ug ang mga nurse nanagdali-dali libut sa kwarto sa ospital, nasayud kong dunay dakong problema. Ang akong bana ug ang akong papa dali dayon nga mihatag ni Hayden og panalangin sa priesthood, ug si Hayden gidali ngadto sa intensibong lawak nga kaatimanan [intensive care]. Sa wala madugay nadayagnos siya nga dunay dili kasagarang pagpitik sa kasingkasing. Sulod sa mga adlaw miagi siya og daghang pag-opera sa kasingkasing.
Pinaagi sa milagrusong gahum sa panalangin sa priesthood, pagpuasa, ug mga pag-ampo, nabuntog ni Hayden ang tanang balatian ug naluwas. Labihan ang among kalipay dihang nadala na namo ang among anak pauli ug magsugod sa bag-o namong kinabuhi.
Si Hayden nagdala og dili masukod nga kalipay sa among kinabuhi. Gikalipay namo siya ug gihigugma. Apan sa paglabay sa panahon, nagsugod ko sa pagkabalaka nga wala siya molambo sama sa gilauman. Bisan og ang mga espesyalista mipaniguro kanamo nga molambo ra siya, ang mga kabalaka nagpadayon samtang nanglimbasog ko sa pagtabang sa akong anak.
Ang akong bana ug ako nagtuon sa tanan kutob sa among mahimo mahitungod sa balatian ni Hayden. Gibuhat namo ang tanan nga gipabuhat kanamo sa mga doktor. Sa gihapon walay pag-uswag nga nahitabo.
Nagkaluya na ko ug nasagmuyo. Nangamuyo ko sa akong Amahan sa Langit nga tabangan ako nga makakita og tawo nga makatabang ni Hayden, apan wala moabut ang tabang. Mas nigrabe ang kahimtang ni Hayden. Nagsugod siya sa pagkaataki. Nahadlok kami. Nagtuo kami nga siya mawala kanamo.
Usa ka gabii, dugay kong nakatulog nagpangita og mga tubag. May gisulat ko para ni Hayden. Gisultihan nako siya sa akong dakong gugma kaniya ug sa kadako sa akong paningkamot aron mahimong mas sayon ang iyang kinabuhi. Misaad ko nga mogahin sa tibuok nakong kinabuhi sa pagpaningkamot nga mahatagan siya sa tabang nga iyang gikinahanglan.
Ang kasagmuyo ug kawalay kasiguroan sa mubong panahon mibuntog kanako. Miluhod ko nga nangutana sa akong Amahan sa Langit, “Ngano?” Naghunahuna ko nga gipadala Niya si Hayden kanako tungod kay nasayud Siya nga dili gyud ko mohunong sa pagpaningkamot nga matabangan ang akong anak. Apan nganong dili man nako makit-an ang mga tubag? Nganong ang matag bag-o nga doktor ug ang matag bag-o nga tambal maghatag man noon og laing babag? Wala ba mahigugma ang Langitnong Amahan kang Hayden?
Dili gayud nako hikalimtan kadto nga gutlo. Usa ka nagbuntaog nga pagbati sa gugma sa kalit mipalibut kanako. Ang mga pulong nga dili gikan sa akong kaugalingon misulod sa akong hunahuna: “Nagtuo ka ba nga gihigugma nimo siya labaw sa akong paghigugma?”
Mikaging ko. Ang oras mihunong. Ang mga luha midagayday sa akong nawong—dili tungod sa kasagmuyo sama sa kaniadto, apan gumikan sa paglaum, pagsabut, ug gugma.
Nianang mga gutloa, ang tanan nausab. Nalukmay ang akong kasingkasing. Nausab ang akong mga pangutana. Nakasabut na ako karon nga ang akong Amahan sa Langit nahigugma kang Hayden pinaagi sa hingpit nga paghigugma. Si Hayden gipadala dinhi nga dunay lawas nga haum sa iyang panginahanglan ug sa iyang mga oportunidad alang sa paglambo ug pagkat-on. Aduna siyay kaugalingong lahi nga hut-ong sa mga abilidad ug mga hagit, sama ra sa matag usa kanato. Akong nahibaloan nga ang mga bata nga dunay mga kakulian mga bililhon ug hinigugmang mga anak sa Langitnong Amahan kinsa adunay espesyal nga misyon dinhi sa yuta.
Ang akong bana ug ako padayon nga nakadawat og mga tubag ug mga panalangin, apan moabut kini sa pagbuot sa Ginoo, dili sa atong kaugalingon. Natultolan kami ngadto sa eksaktong mga basahon, mga pag-atiman, mga eskwelahan, ug mga magtutudlo aron makatabang ni Hayden nga molampos sa iyang mortal nga kinabuhi. Naningkamot kami nga makapangita sa dalan nga gipahimutang sa Amahan sa Langit alang ni Hayden imbis sa dalan nga gusto namo nga iyang subayon. Gibuhat namo ang tanan sa pagtabang ni Hayden nga makab-ot ang iyang balaanong potensyal ug magpakabuhi sa kinabuhi nga gidesinyo sa Langitnong Amahan alang kaniya. Ang among panabut mahitungod a plano sa Langitnong Amahan mas klaro na kaayo karon nga among nasabtan nga kaniadto si Hayden Iyaha sa wala pa siya moari sa kanamo.