Mga Panalangin sa Pagbarug Pinaagi sa Kinaugalingong Paningkamot [Self Reliance]
Ang Negosyo Nagkadako
Salamat sa unsay iyang nakat-unan sa mga klase sa pagbarug pinaagi sa kinaugalingong paningkamot [self-reliance], dihang ang usa ka pultahan nasarado kang Teddy Reyes, wala madugay dunay laing naabli.
GILITRATOHAN NI RAUL SANDOVAL
Mga alas 4:00 na sa buntag didto sa Santo Domingo, sa Dominican Republic, ug si Teddy Reyes nagmata na ug nagtrabaho. Daghan siya og trabahuonon karon aron mapadayon ang nagkadako niyang negosyo. Nagsugod siya sa paghiwa-hiwa sa mga tamatis ug sa pan. Dayon naghimo siya sa iyang espesyal nga sawsawan.
Pagka alas 6:00 sa buntag, nangabut na ang iyang duha ka empleyado nga motabang kaniya, ug nagkapaspas ang pagpangandam. Pagka alas 8:00 sa buntag, nakahimo na sila og 300 ka mga sandwich, nga tinagsa-tagsang pinutos og plastik ug gisulod sa mga bag. Unom pa ka mga empleyado ang nangabut, ug ang tanang trabahante nanggawas sa pagpamaligya.
Pagka alas 9:00 sa buntag, ang tanan gawas sa pipila ka mga sandwich—tulo o upat nga gilahi ni Teddy aron ipakaon sa iyang mga tawo—nahalin na.
Ang negosyo maayo alang kang Teddy. Apan ang mga butang dili kanunay sayon. Gani, sa milabayng lima ka tuig, wala gayud siya makakita og permanenting trabaho sa gipili niya nga propesyon—isip usa ka abogado.
Mao nga giunsa kaha ni Teddy sa pagbalhin gikan sa pagpanambag sa mga kliyente ngadto sa pagpamaligya og mga sandwich? Nagkinahanglan kini og dako nga paningkamot, siyempre, apan nagkinahanglan usab kini og mainampingon nga paggamit sa mga baruganan nga iyang nakat-unan diha sa mga klase nga gitanyag pinaagi sa inisyatibo sa Pagbarug Pinaagi sa Kinaugalingong Paningkamot nga mga Serbisyo sa Simbahan [Self-Reliance Services].
Pagkawala sa Iyang Trabaho
Lima ka tuig ang milabay, ang kinabuhi para ni Teddy makahingangha nga tan-awon. May maayo siyang trabaho isip abogado, bag-o lang siyang naminyo, ug siya ang mibunyag sa iyang asawa. “Apan duna kami pipila ka mga hagit,” miingon siya, “ug nawad-an ko sa akong trabaho.”
Sulod sa misunod nga upat ka tuig naglisud si Teddy sa pagpangita og trabaho. “Dunay daghang trabaho nga akong mahimo, apan walay gustong mobayad nako. Gisulayan nako sa pagsugod og lahi nga mga trabaho sa akong kaugalingon, apan wala kini magsilbi.”
Ang iyang asawa, si Stephany, dunay maayong trabaho, apan ang iyang suweldo lang dili makaigo sa mga balayranan. Wala madugay nakaanak na og usa ang magtiayon. Mahinamon sila, apan nagkapiit ang ilang pinansyal. Nawad-an sila sa ilang balay, kinahanglang ibaligya ang ilang sakyanan, ug nagamit na ang tanan nilang tinigom. Sa katapusan kinahanglan silang mobalhin ngadto sa gamay nga balay nga gipanag-iya sa mama ni Stephany.
Apan wala mohunong si Teddy. Sa wala madugay usa ka wala dahuma nga oportunidad ang mipresentar sa iyang kaugalingon.
Ang Gahum sa Pagbarug Pinaagi sa Kinaugalingong Paningkamot
Human sa mga katuigan sa pagpanglimbasog, nasayud si Teddy nga panahon na alang sa kausaban.
“Nakahukom ko nga mokuha sa mga kurso sa Simbahan nga pagbarug pinaagi sa kinaugalingong paningkamot,” miingon siya. “Nakadungog na ko mahitungod niini apan kanunay kong maghunahuna nga dili kini para sa akoa. Nagtuo ko nga mahitungod lamang kini sa paghimo og mga butang nga ikaw lang. Nindot kaayo ang mga klase.”
Una, miapil si Teddy og usa ka grupo sa Personal nga Panalapi. Dayon miapil siya sa usa ka grupo sa Pagsugod ug Pagpalambo sa Akong Negosyo. Ang mga grupo sa klase nakatabang ni Teddy sa iyang kahibalo bahin sa negosyo apan nakatabang usab niya sa paglambo sa espirituhanong paagi.
“Ang pagkuha niini nga mga klase miusab sa tanan,” miingon siya. “Mihukom ko nga mobuhat sa tanan nga gitudlo niini. Ug diha-diha nausab ang akong pinansyal nga kahimtang. Nagsugod ko sa pagbayad sa akong ikapulo, pag-ampo matag adlaw, pagtuon sa mga kasulatan, ug paggamit sa pagtuo. Ug nausab ang mga panghitabo—nagsugod ko sa pagtigom og kwarta ug sa pagbalaan sa adlawng Igpapahulay. Ang matag baruganan nakapanalangin kanako.”
Sa iyang grupo sa Pagsugod ug Pagpalambo sa Akong Negosyo, nakat-unan ni Teddy unsaon sa pagkakita sa potensyal nga produkto nga tingali makaayo sa mga kustomer diin siya nagpuyo. Dihang gisusi niya unsay gipangita sa mga tawo, ang inspirasyon nagsugod sa pagdagayday. Sa iyang dapit, ang mga tawo ganahan og preskong mga sandwich, apan gusto usab silang makakuha niini nga orderon daan—ug ihatud.
“Daghang restawrant ang dunay espesyal nga tusloanan nga naghimo sa ilang pagkaon nga lahi,” miingon si Teddy. “Mao nga naghimo ko og kaugalingon nakong espesyal nga tusloanan sa akong sandwich!”
Pagpalambo sa Iyang Negosyo
Sa adlaw nga gisugdan niya ang iyang negosyo, mihimo si Teddy og 30 ka mga sandwich.
“Paglabay sa traynta minutos, nauli na ko,” miingon siya. “Nabalaka ang akong asawa nga nakit-an ko niya sa sofa. Nangutana siya nako nganong naa na ko sa balay—dili ba namaligya pa unta ko og sandwich? Nabaligya na nako ang tanan!”
Paglabay sa misunod nga pipila ka semana, gikontak ni Teddy ang mga lokal nga negosyo ug mga eskwelahan. Daghan ang gustong mopalit sa iyang mga sandwich, ug ang iyang negosyo nagsugod sa pagtubo. Dali ra siyang nakakat-on unsaon sa pag-atiman sa preskong mga utanon aron molungtad kini. Nahibaloan usab niya kon unsa gayud kadugay nga pwedeng molungtad ang iyang espesyal nga tusloanan. Mag-order siya ug mokuha sa mga pan matag gabii. Makapamalit siya og may diskwentong mga utanon matag Sabado, nga mas ubos ang presyo apan maayo pa gihapon inig ka Lunes.
Sa wala madugay nakadawat siya og mga order sa pihong mga matang sa mga sandwich, ug gani daghang order alang sa espesyal nga mga okasyon. Nagkinahanglan na siya og tabang ug nagsugod sa pagdawat og mga empleyado.
Pinaagi sa paghimo og positibong pakigrelasyon sa lokal nga mga eskwelahan ug mga negosyo, si Teddy nakamugna og aktibo, permanenting mga kliyente. Sulod sa tulo ka bulan, duna na siyay walo ka empleyado ug 300 na ka mga sandwich ang mabaligya kada adlaw, lima ka adlaw kada semana. Igo na kaayo ang iyang pundok sa tigbaligya nga ilang mabaligya ang tanang sandwich bisan atol sa bakasyon [summer] diin sarado ang mga eskwelahan. Karon si Teddy andam na usab nga magdugang pa.
Tungod kay mikuha siya sa mga klase sa pagbarug pinaagi sa kinaugalingong paningkamot, nadasig siya sa pagdesisyon nga magnegosyo og sandwich. “Tungod niini nga giya gikan sa Simbahan ug sa mga panalangin nga akong nadawat,” miingon siya, “nakaangkon ko og lig-on kaayong pagpamatuod sa Simbahan ug ni Jesukristo.”