Mensahe sa Unang Kapangulohan
Kalinaw Niining Kinabuhia
Presidente Henry B. Eyring
Unang Magtatambag sa Unang Kapangulohan
Sa tanan kanato nga mianhi sa mortalidad, miingon ang Manluluwas, “Dinhi sa kalibutan aduna kamoy kagul-anan” (Juan 16:33). Gani Iyang gihatag kining talagsaon nga saad ngadto sa Iyang mga disipulo atol sa Iyang mortal nga pangalagad: “Kaninyo ibilin ko ang kalinaw; kaninyo ihatag ko ang akong kalinaw: hatagan ko kamo niini dili sama sa hinatagan sa kalibutan” (Juan 14:27). Makahupay ang pagkahibalo nga kini nga saad sa personal nga kalinaw nagpadayon sa tanan Niyang mga disipulo karon.
Pipila kanato nagpuyo sa matahum ug malinawon nga mga palibut, apan kita nagsinati og personal nga pagbati sa kagubot ug kasamok. Ang uban mobati og kalinaw ug kahupayan taliwala sa grabing personal nga kapildihan, trahedya, ug padayong mga pagsulay.
Tingali nakita ninyo ang milagro sa kalinaw sa panagway sa mga disipulo ni Jesukristo o nadungog kini diha sa iyang mga pulong. Nakita ko na kini sa daghang higayon. Kaniadto sulod sa lawak sa usa ka ospital diin ang pamilya nagpundok libut sa usa ka sulugoon sa Dios nga duol na ang kamatayon.
Nahinumdom ko nga mibisita og usa ka babaye sa ospital pipila ka adlaw sa wala pa siya mamatay tungod sa kanser. Gidala nako ang akong duha ka batan-ong anak nga mga babaye nga mokuyog nako tungod kay kining pinalangga nga sister ilang Primary teacher kaniadto.
Ang mga sakop sa iyang pamilya naglibut sa iyang higdaanan, nanghinaot nga ikauban siya sa katapusan niyang mga gutlo sa kalibutan. Nasurprisa ko dihang milingkod siya sa higdaanan. Gikab-ot niya ang akong mga anak ug tagsa-tagsa niyang gipaila silang duha, ngadto sa matag sakop sa iyang pamilya. Namulong siya sama nga ang akong mga anak mga halangdong binuhat nga gipresentar sa korte sa usa ka rayna. Nakakita siya’g paagi sa pagsulti nga ang matag usa sa lawak usa ka disipulo sa Manluluwas. Sa gihapon akong nahinumduman ang kalig-on, ang kalumo, ug gugma sa iyang tingog. Ug akong mahinumduman ang akong katingala sa malipayon niyang pahiyom bisan og nahibalo siya nga mubo na ang iyang panahon sa kinabuhi.
Nadawat niya ang mga panalangin sa priesthood alang sa kahupayan, sa gihapon gihatag niya kanamong tanan ang buhing pagpamatuod nga ang saad sa Ginoo mahitungod sa kalinaw tinuod: “Gisulti ko kini kaninyo aron nga dinhi kanako makabaton kamog kalinaw. Dinhi sa kalibutan aduna kamoy kagul-anan: apan sumalig kamo; gidaug ko na ang kalibutan” (Juan 16:33).
Gidawat niya ang Iyang pagdapit, sama sa mahimo natong tanan, bisan unsay atong mga pagsulay ug mga kahasol:
“Umari kanako, kamong tanan nga nabudlay ug nabug-atan, ug papahulayon ko kamo.
“Isangon ninyo ang akong yugo diha kaninyo, ug pagtuon kamo gikan kanako; kay ako maaghop ug mapaubsanon sa kasingkasing: ug makakaplag kamog pahulay alang sa inyong mga kalag” (Mateo 11:28–29).
Pinaagi lamang sa pagsunod sa Manluluwas nga kitang tanan makakaplag og kalinaw ug kahupayan nga moabut kanatong tanan.
Ang mga pag-ampo sa sakramento makatabang nato sa pagkahibalo unsaon sa pagkaplag kana nga kalinaw taliwala sa mga kalisdanan sa kinabuhi. Sa atong pag-ambit sa sakrament, kita mahimong motino nga magmatinud-anon sa atong mga pakigsaad sa pagsunod Kaniya.
Kitang tanan mosaad sa paghinumdom sa Manluluwas. Makapili kamo sa paghinumdom Kaniya sa paagi nga mas maduol ang inyong kasingkasing Kaniya. Usahay para nako, mao kini ang pagtan-aw Kaniya sulod sa akong hunahuna nga nagluhod sa Tanaman sa Getsemani o sa pagtan-aw Kaniya nga nagtawag kang Lazaro sa paggawas gikan sa lubnganan. Sa akong paghimo niini, bation nako nga duol Kaniya ug ang pasalamat nga nagdala og kalinaw sa akong kasingkasing.
Kamo usab mosaad nga mosunod sa Iyang mga sugo. Mosaad kamo nga modala sa Iyang ngalan diha kaninyo ug mamahimo nga Iyang saksi. Misaad Siya nga kon tumanon ninyo ang mga pakigsaad uban Kaniya, ang Balaang Espiritu magauban kaninyo. (Tan-awa sa D&P 20:77, 79.)
Nagdala kini og kalinaw sa pinakaminos duha ka paagi. Ang Espiritu Santo molimpyo kanato gikan sa sala tungod sa Pag-ula ni Jesukristo. Ug ang Espiritu Santo makahatag kanato og kalinaw nga moabut pinaagi sa pag-aprubar sa Dios ug sa paglaum nga kinabuhing dayon.
Si Apostol Pablo namulong mahitungod niining talagsaon nga panalangin: “Apan ang bunga sa Espiritu mao ang gugma, kalipay, kalinaw, pailub, pagkamapuanguron, pagkamaayo, pagkamatinumanon.” (Mga Taga-Galacia 5:22).
Dihang ang langitnong mga mensahero misibya sa pagkatawo sa Manluluwas, ilang gipamahayag, “Himaya sa Dios sa kalangitan, ug sa yuta panagdait” (Lucas 2:14; emphasis gidugang). Mohatag ko sa akong pagpamatuod isip saksi ni Jesukristo nga ang Amahan ug ang Iyang Hinigugmang Anak makapadala sa Espiritu aron kita makakaplag og kalinaw niining kinabuhia, bisan unsa nga pagsulay ang moabut kanato ug sa atong mga minahal.