Mga Tingog sa mga Santos sa Ulahing mga Adlaw
Usa ka Blue nga Bombilya
Paghulagway pinaagi ni Allen Garns
Akong mama ug papa wala magkauyon unsaon sa pagdayan-dayan ang ilang balay panahon sa Pasko. Ang akong papa color-blind, mao nga alang kaniya ang pula, berde, ug brown pareha ra tanan. Hinoon, ang kolor nga blue hayag tan-awon ug maanindot. Ganahan usab siya sa Brigham Young University football, kansang kolor naglakip sa blue.
Tungod kay ang kolor nga blue mao ang iyang paborito nga kolor, gusto siya nga mobutang og blue nga mga suga. Ang akong mama miingon nga ang blue dili kolor sa Pasko, mao nga kada tuig si Papa mobutang og mga suga nga pula ug berde, ug puti sa Pasko sa ilang atup. Aron sa pagsungog-sungog ni Mama, iyang gipulihan ang usa sa mga bombilya og hayag nga suga nga blue. Kon tan-awon gyud nimo pag-ayo, imong makita ang usa ka blue nga bombilya uban sa pula, berde, ug puti nga mga suga.
Kada tuig ang blue nga bombilya mohayag sa lain-laing lugar. Usahay nagtago kini sa suok diin walay usa nga makamatikod niini, apan usahay ibutang niya kini sa garahe o sa atubangan nga kayda. Makalingaw kadto nga dula tali ni Mama ug Papa.
Usa ka tuig, wala damha si Papa namatay duha ka adlaw sa wala pa ang Pasko. Sa iyang lubong, ang istorya naghisgot sa usa ka blue nga bombilya nga iyang ibitay kada tuig. Pagkasunod gabii, ang akong mama nanambo sa bintana. Tabok sa dalan, nagsiga uban sa puti nga mga suga ibabaw sa kayda sa iyang silingan, ang usa ka blue nga suga. Paglabay sa pipila ka adlaw, daghang mga silingan ug mga higala ang midugang og blue nga mga suga sa ilang mga suga sa Pasko. Ang uban gani midayandayan sa tibuok kahoy og blue.
Mapasalamaton ko nga ang mga higala ug mga silingan ni mama nagpakita sa ilang gugma alang kaniya pinaagi sa pagdayandayan og blue nga mga suga. Mitabang sila nako unsa ang gipasabut sa “pagbangutan uban niadto nga nagbangutan; … ug paghupay niadtong nagkinahanglan sa kahupayan” (Mosiah 18:9). Mapasalamaton ko nga ang Langitnong Amahan mihatag nato sa gasa sa Iyang Anak. Tungod ni Jesukristo, akong makita pag-usab ang akong papa.