Paghatag og Labaw pa Kaysa mga Gasa

Ni Emmaline R. Wilson

Ang tagsulat nagpuyo sa Utah, USA.

Unsa nga klase sa tighatag nga ikaw gustong mamahimo?

Ang Kapaskohan sa kinatibuk-an mao ang mahitungod sa Manluluwas, nga si Jesukristo, ug sa espiritu sa pagpanghatag. Samtang nindot kaayo ang makahatag ug makadawat og mga gasa, hinumdumi nga mahimo kitang makahatag og daghan labaw pa kay sa pisikal nga mga gasa. Sa matag adlaw makahatag kita sa atong panahon, mga talento, ug kamabination—ug mga pipila lamang kana sa makahuluganong paagi diin kita makaserbisyo.

Nan, kumusta man ang imong pag-focus sa dili hinakog nga pagpanghatag? Tubaga kini nga test aron mahibaloan.

Test

1Andam ka nang moadto sa eskwelahan. Gihangyo ka sa imong mama sa pagpamahaw, ug migahin siya’g panahon sa pag-andam sa paborito nimong pagkaon. Unsay imong buhaton?

1. Mosinggit, “Dili pa ko andam!” ug dayon padayon sa pagpangandam, dugay nga mikaon, ug wala makaabut sa bus mao nga kinahanglang ihatud ka niya sa eskwelahan.

2. Mopaspas og kaon sa pamahaw ug modali og gawas sa pultahan; kanunay siyang mobuhat sa ingon niana—buluhaton kana sa mama.

3. Salamat Ma, magdali og pangandam, ug mokaon kauban sa imong pamilya.

2Alas 10:00 na sa buntag, ug ipanghatag na sa magtutudlo ang test. Wala kaayo ka makaila sa naglingkod tupad nimo, apan imong namatikdan nga mabalak-on siyang nag-ukay sa iyang backpack. Unsay imong buhaton?

1. Pasagdan lang siya. Ikaw gikapoy usab ug nangandam para sa test.

2. Moingon kaniya nga ayo-ayo na lang.

3. Pangutan-on siya kon duna ba siyay gipangita. Kon makadungog ka nga nagkinahanglan siya og lapis, ihatag nimo ang imohang usa ka lapis. “Imoha na kini,” sultihan nimo siya uban sa pahiyom.

3Pagkahuman sa klase usa sa imong ka-team sa football naglisud sa pagpasa sa bola sa insaktong paagi—ikaw hanas niini. Miduol siya human sa praktis ug mihangyo kon makatabang ka ba niya. Unsay imong isulti?

1. Ingnon nimo nga busy kaayo ka. Tingali sa sunod adlaw na lang.

2. Magpanuko sa pag-uyon ug magpasa-pasa og kadiyot, magdali sa paghatag og usa ka paagi ug molakaw dayon aron makighugoy-hugoy sa imong mga higala.

3. Mogahin og pipila ka minutos sa paghatag niya og mga paagi ug mag-set og laing panahon nga makapraktis mong duha.

4Pagka alas 5:30 sa hapon, gipakanaog ka sa imong mama sa usa ka tindahan aron mopalit og regalo sa Pasko para sa imong igsoong babaye. Unsay imong paliton?

1. Sayon ra. Mideretso ka ngadto sa bag-ong bola sa basketball nga imo nang gitan-aw sulod sa mga bulan. … Tingali ganahan pud siya niini?

2. Magpili og pinakabarato nga butang sa iyang lista—dili niya kini ikasagmuyo, ug wala ka makagasto og dako.

3. Mangita og pinakabag-ong libro sa paborito niyang tigsulat. Dili ka makahulat nga makakita sa kalipay sa nawong sa imong igsoon inig-abli niya sa putos!

5Oras na para matulog ug kapoy na kaayo ka. Apan, wala ka pa makabasa sa imong mga kasulatan. Unsay imong buhaton?

1. Subayon nga apil na lang to sa imong pagbasa niadtong Dominggo.

2. Samtang nagsiksik sa imong mga kasulatan, nakit-an nimo ang paborito nimong nobela. Traynta minutos human adto nahinumduman nimo ang mga kasulatan ug midali ka sa pagbasa og mubo nga tudling sa wala pa palonga ang mga suga.

3. Nakita nimo ang imong mga kasulatan ug ang paborito nimong nobela, apan modesisyon nga hatagan og unang prayoridad ang Langitnong Amahan ug mag-ampo og kadiyot sa di pa magsugod og basa. Isulat ang pipila ka mga pagtulun-an samtang magtuon ka, ug pasalamatan nimo Siya pag-usab sa pag-ampo sa dili pa matulog.

Resulta!

Kon ang kadaghanan sa imong tubag (a), mahimo nimong usabon og gamay ang imong focus para sa uban. Hinumdumi, ang paghatag og pagserbisyo sa uban magdala og mas dakong kalipay sa tanan nga naapil (tan-awa sa Mateo 25:34–46).

Kon ang kadaghanan sa imong tubag (b), hunahunaa nga “nakadawat kamo nga walay bayad, busa panghatag kamo nga walay bayad” (Mateo 10:8). Hunahunaa kon sa unsang paagi ang kinabubut-on nga paghatag makatabang nimo nga makakaplag og dugang nga kalipay.

Kon ang kadaghanan sa imong tubag (c), ipadayon kini! Ang imong mga buhat magpakita sa tinuod nga espiritu sa Pasko.

Hunahunaa kon unsaon nimo sa paghatag og kinasingkasing nga mga gasa sa mga tawo sa imong palibut niini nga Kapaskohan. Bisan unsay imong mga talento, makakita ka og paagi sa pagpakita sa imong gugma ug pasalamat alang sa uban pinaagi sa mga gasa nga imong gihatag ug giunsa nimo kini sa paghatag sa matag adlaw. Ang paghatag mamahimo nga panalangin ug dili usa ka buluhaton kon atong masabtan nga pinaagi sa pagserbisyo sa uban, sa tinuod atong giserbisyuhan ang atong Langitnong Amahan (tan-awa sa Mosiah 2:17).

Panghatag nga Walay Bayad

“Ako nag-ampo nga kita matandog sa mga pagbati sa uban, nga mohatag kita nga wala’y pagbati sa pagpamugos o magpaabut og balus, ug kita masayud nga ang sakripisyo matam-is kon atong ibahandi ang hingpit nga kalipay nga mahatag niini sa laing kasingkasing.”

Presidente Henry B. Eyring, Unang Magtatambag sa Unang Kapangulohan, “Pag-andam og mga Gasa alang sa Inyong Umaabut nga Pamilya,” Liahona, Ene. 2014, 49.