Mga Tingog sa mga Santos sa Ulahing mga Adlaw
Pagyukbo ni Jesus
Paghulagway pinaagi ni Dan Burr
Human sa mga simana nga pagpaabut, sa katapusan Pasko na gyud. Hapit ang tibuok namong pamilya kauban namo—Si Lola ug si Lolo Fletcher, ang among tulo ka anak nga mga babaye ug ang ilang mga bana ug mga anak. Padulong nang mongitngit ug ang kadalanan gipasiga na ang mga suga. Ang mga kabalayan misidlak sa kanindot sa mga dekorasyon samtang ang mga Christmas Tree nindot nga nagkipat-kipat sa mga bintana.
Nangadam na mi nga moadto sa Pasundayag sa Nativity, nga ipasundayag sa Simbahan sulod sa daghang katuigan didto sa Calgary, Alberta, Canada. Kada Pasko sa Gabii gusto mi nga moadto sa pasundayag nga kompleto sa mga asno, karnero, Mago, mga magbalantay, Romano nga mga sundalo, mga anghel, ug sa sipa kaayo nga sound system. Midala kini og diwa sa kalinaw, gugma ug tinuod nga kahulugan sa pasko sa among apiki nga pagsaulog.
Miabut mi sa Heritage Park, diin ang pasundayag gipahigayon, ug sa wala madugay nalingaw kami sa maanindot nga musika sa Mormon Tabernacle Choir ug sa sugilanon sa pagkatawo sa Manluluwas. Si Lauren, ang among kinamagulangan nga apo, tres anyos pa nianang higayuna. Nalingaw kaayo siya sa mga talan-awon, sa mga tukar, ug sa mga sugilanon nga among gipaminaw. Ang among mga ginhawa daw magpanganud sa tin-aw nga kalangitan. Mitan-aw mi samtang ang mga tawo nga midala sa papel ni Jose ug Maria misunod sa mando ni Caesar Augustus sa pag-adto sa Bethlehem aron sa pagbayad og buhis. Ang babaye nga midala sa papel ni Maria “manganakay” (tan-awa sa Lucas 2:6), ug ang bugtong lugar nga ilang nakita nga maistaran mao ang usa ka gamay nga kwadra. Didto, “iyang gianak ang iyang panganay nga usa ka lalaki, ug kini iyang giputos sa mga bakbak ug gipahigda sa pasungan, kay wala na may luna alang kanila sa balay nga abutanan” (tan-awa sa Lucas 2:7). Ang mga suga giiwag lahos sa bungtod diin makita namo ang mga tawo isip mga magbalantay “nanagtukaw sa kagabhion sa pagbantay sa ilang mga hayop” (tan-awa sa Lucas 2:8). Sa kalit lang, usa ka aktor nga gisininaan isip usa ka anghel mitunga diha sa kahanginan, usa ka hayag nga suga ang gibanwag diha kaniya. Si Lauren mahigugmaong nagsige og singgit, “Jesus, ako ni, si Lauren!”
Ang tanan nga naa sa among palibut nakadungog sa iyang pagtimbaya ug mikatawa, nalingaw sa surprisa. Usa kadto ka inosenteng pagka-alaan, apan alang namo nakapanindot kadto sa handumanan sa pasundayag niana nga tuig. Nasayud si Lauren nga si Jesus nakaila niya, ug napahinumduman kami sa among kahibalo nga Siya nakaila sa matag usa kanato. Naghunahuna mi kon si Lauren aduna bay panumduman sa iyang Manluluwas kinsa iyang gibiyaan tulo ka tuig na ang milabay. Ang padayon nga pagtimbaya ni Lauren nakahatag kanamo og paglaom nga kita usab makaila Kaniya kon ato na Siyang ikahimamat. Ang iyang gugma sa Manluluwas ug ang Iyang gugma alang ni Lauren nakapainit sa among mga kasingkasing nianang mabugnaw nga Pasko sa Gabii.