Mensahe sa Visiting Teaching
Ang Hingpit nga Kalipay sa Pamilya Makita diha sa Pagkamatarung
Tun-i sa mainampuong paagi kining materyal ug pagtinguha sa inspirasyon aron masayud unsay angay nga ipakigbahin. Sa unsang paagi nga ang pagsabut sa “Ang Pamilya: Usa ka Pamahayag ngadto sa Kalibutan” mopalambo sa inyong pagtuo sa Dios ug mopanalangin niadtong inyong giamumahan pinaagi sa visiting teaching? Alang sa dugang nga impormasyon, adto sa reliefsociety.lds.org.
Ang Dios “miestablisar sa mga pamilya aron sa paghatag kanato og kalipay, sa pagtabang kanato nga makakat-on sa hustong mga baruganan diha sa mabinationg palibut, ug sa pag-andam kanato alang sa kinabuhing dayon.”1 Bahin sa “mahinungdanon nga plano sa kalipay” sa Dios (Alma 42:8), si Presidente Russell M. Nelson, Presidente sa Korum sa Napulog Duha ka mga Apostoles, miingon: “Ang Iyang plano nagpahayag nga ang mga lalaki ug mga babaye ‘nga sila makabaton og hingpit nga kalipay.’ [2 Nephi 2:25]. Kini nga hingpit nga kalipay moabut kon kita mopili sa pagpakabuhi sa kaangayan uban sa mahangturon nga plano sa Dios.”2
Ang panimalay nga nakasentro ni Kristo naghatag sa labing dako nga mga oportunidad alang sa kalampusan. Si Elder Richard G. Scott (1928–2015) sa Korum sa Napulog Duha ka mga Apostoles mihulagway niini isip usa ka dapit “diin ang ebanghelyo gitudlo, mga pakigsaad gituman, ug ang gugma naghingapin,” diin ang mga pamilya makapuyo “og masulundon nga kinabuhi” ug mahimong “lig-ong migamot diha sa ebanghelyo ni Jesukristo.”3
Si Presidente Henry B. Eyring, Unang Magtatambag sa Unang Kapangulohan, miingon: “Makahukom kita nga buhaton nato ang tanan natong mahimo aron mapadala ang gahum sa langit ngadto sa [atong] pamilya.” Ug malagmit nga mapasiugdahan nato ang gugma, pagserbisyo, pagkamasulundon, ug kalipay diha sa atong mga panimalay pinaagi sa pagkadungog sa “[atong mga anak] sa pulong sa Dios ug dayon sulayan kini uban sa pagtuo. Kon buhaton nila, ang ilang kinaiya mausab sa paagi nga magbunga sa kalipay nga ilang gitinguha.”4
Mga Panimalay nga Nakasentro ni Kristo
Duna kitay mga ehemplo nga angayang sundon bahin sa mga panimalay nga nakasentro ni Kristo diha sa mga kasulatan. Human namatay ang iyang amahan, nga si Lehi, gidala ni Nephi ang iyang pamilya ug ang uban nga mituo sa mga pasidaan ug sa mga pinadayag sa Dios ug kinsa mipatalinghug sa mga pulong ni Nephi palayo sa yuta sa mga Lamanite. Niining bag-ong dapit, ang mga Nephite makahupot sa mga paghukom, sa mga balaod, ug sa mga sugo sa Ginoo sa tanang butang, sumala sa balaod ni Moises (tan-awa sa 2 Nephi 5:6–10). Apan bisan taliwala sa mga Nephite, ang uban sa katapusan nahimong masinupakon.
Ug samtang ang mga sakop sa atong pamilya usahay mopalayo sa pagkamatarung sama sa gibuhat sa mga Nephite, miingon si Elder Scott nga ang usa ka panimalay nga nakasentro ni Kristo sa gihapon “makahatag og dakong kasiguroan alang sa kalinaw ug dangpanan diha sa atong mga panimalay.” Nahibalo siya nga “sa gihapon adunay daghang mga hagit o kasakit, apan sa taliwala sa kasamok, makatagamtam kita og kalinaw sa kaugalingon ug hilabihan nga kalipay.”5
Dugang nga mga Kasulatan
Hugot nga Pagtuo, Pamilya, Kahupayan