Mga Pangutana ug mga Tubag

Nanglimbasug ko sa pagtuon sa mga kasulatan. Nganong importante kaayo nga magtuon niini?

Gikan sa tema sa Mutual niining tuiga, nakat-unan ninyo kon unsaon nga “mopadayon sa unahan uban ang pagkamakanunayon kang Kristo” (2 Nephi 31:20). Kini nga kasulatan nagtudlo nga ang pagpadayon sa unahan naglakip sa “magbusog sa pulong ni Kristo.” Ngano nga importante man kini? Aniay pipila ka mga paagi nga ang pagtuon sa mga kasulatan makatabang nato sa pagpadayon sa unahan.

Si Presidente Thomas S. Monson nagtudlo nga “kon ikaw makugihon nga magtuon sa mga kasulatan, ang imong gahum sa paglikay sa tintasyon ug pagdawat og giya gikan sa Espiritu Santo sa tanan nimo nga gibuhat motubo” (“Himoa ang Imong Kaugalingon nga Labing Maayo,” Liahona, Mayo 2009, 68).
Makabaton ka og pagpamatuod ug makalig-on sa imong pagtuo samtang ikaw mainampuon nga magtuon sa mga kasulatan. Ang pagtuon ilabi na sa Basahon ni Mormon ug ang pagbaton og pagpamatuod sa katinuod niini makatabang nimo nga masayud nga si Jesus mao ang Kristo, nga si Joseph Smith usa ka propeta, ug nga Ang Simbahan ni Jesukristo sa mga Santos sa Ulahing mga Adlaw tinuod. (Makakat-on ka og dugang bahin niining mga saad diha sa pasiuna sa Basahon ni Mormon.)
Makadawat ka og personal nga inspirasyon ug mga tubag sa imong mga pangutana pinaagi sa mga kasulatan. Samtang nakigsulti ang Dios nganha kanimo pinaagi sa mga kasulatan ug pinaagi sa Iyang Espiritu, makabaton ka og pagsalig ug kalig-on sa pagpadayon sa unahan agi sa bisan unsa nga mga babag nga imong giatubang.
Tingali ang labing importante nga rason sa pagtuon sa mga kasulatan mao nga nagtudlo kini bahin ni Jesukristo ug sa unsang paagi nga makasunod ka sa Iyang ehemplo ug mga pagtulun-an. Ang pagsunod sa mga baruganan nga imong mabasahan makatabang nimo nga mas mahisama sa Manluluwas.

Mga Tubag sa Akong mga Pangutana

Kon ako dunay mga pangutana, nasayud ko nga makadangup ko sa mga kasulatan ug makakita og mga tubag. Mga pulong kini sa Ginoo, ug ang Iyang doktrina dili mausab. Nasayud ko nga bisan unsa nga pagsupak ang akong sagubangon, ang mga kasulatan anaa kanunay alang nako uban sa mga tubag. Motubag usab kini sa mga pangutana kon unsay gibarugan sa Simbahan sa daghang mga hilisgutan. Nasayud ko nga kon mobasa ko og maayo sa mga kasulatan, makatabang kini nako aron makabaton sa Espiritu Santo uban nako, nga makatabang nako nga masayud sa husto gikan sa sayop.

Emily A., edad 17, Washington, USA

Ang Akong mga Alantuson Migaan

Usa ka school year nagsugod ko sa pagbati nga naguol tungod sa stress sa kinabuhi. Atol niining mga adlaw nga makapa-stress, nag-ampo ug nagbasa ko sa Basahon ni Mormon sulod sa 10 minutos. Samtang nagbasa ko, mibati ko og talagsaon nga kainit nga milukop sa akong kasingkasing. Mibati ko nga gihigugma, nadasig, ug nalipay bisan pa man sa akong mga pagsulay. Mibati ko og hilabihan nga kalinaw nga wala pa gayud nako mabati sukad sa una. Gikan niining kasinatian sa katapusan nasabtan nako kon unsay gipasabut sa Manluluwas sa dihang miingon Siya, “Kaninyo ibilin ko ang kalinaw, kaninyo ihatag ko ang akong kalinaw” (Juan 14:27). Sa nagsunod nga pipila ka semana, nakasinati ko niini sa makadaghang higayon, ug nakapadasig kini nako nga magpadayon sa akong pagpakabuhi bisan pa man sa akong mga panglimbasug.

Chloe K., edad 18, Wisconsin, USA

Gahum sa Pag-usab

Sa una, wala gyud koy pagpamatuod bahin sa Basahon ni Mormon, apan sa dihang sinsero ko nga nag-ampo alang sa giya gikan sa Espiritu Santo, aduna koy ingon nga dakong pagbati bahin sa Basahon ni Mormon. Duna na koy tinguha nga masayud nga ang basahon tinuod, busa nagsugod ko sa mainampuong paagi sa pagbasa ug sa pagtuon niini. Pagtulun-an human sa usa ka pagtulun-an, lagda human sa usa ka lagda, nakadawat ko og personal nga pinadayag nga ang basahon tinuod (tan-awa sa 2 Nephi 28:30). Ganahan ko sa Basahon ni Mormon. Gihatagan nako og bili ang mga pagtulun-an nga akong nadawat samtang nagtuon ko niini. Ang Basahon ni Mormon dunay gahum nga makadala nato ngadto sa kausaban alang sa mas maayo.

Ariel Candawan T., edad 18, Philippines

Gugma sa Dios

Pinaagi sa gahum, ehemplo, ug sa mga pagtulun-an diha sa mga kasulatan, nahimo kong sensitibo sa Balaang Espiritu. Ang mga kasulatan dunay balaanong gahum diin ang Dios makagiya ug makatudlo kanato. Mao nga kon mobati ka nga nag-inusara o gibiyaan, basaha ang mga kasulatan. Dayon hinumdumi nga ang imong Amahan sa Langit mipreserbar niana ilabi na gayud alang kanimo aron masayud ka nga nahigugma Siya kanimo.

Scott H., edad 19, Wisconsin, USA

Pagkamaayo ug Kahayag

Misugod ko sa pagbasa sa Basahon ni Mormon sa unang higayon sa dihang nahimo kong usa ka Beehive. Gibasa nako kini gikan sa sinugdanan hangtud sa katapusan ug naghunahuna nga mao na kana ang katapusan. Apan sayop kaayo ko. Ang akong kinabuhi morag dunay kulang. Mao nga nakahukom ko nga magsugod na usab sa pagbasa, niining higayuna maghatag og mas dugang nga pagtagad. Samtang gibuhat nako, ang akong kinabuhi napuno sa kahayag nga naawop sukad nga nahuman nako kini. Mas nakasabut ko ug ganahan na kaayo niini. Basaha kini sa tanang panahon, ug masiguro ninyo sa inyong kaugalingon ang usa ka kinabuhi sa pagkamaayo ug kahayag.

Kellie M., edad 15, Utah, USA

Pagbuntog sa mga Tintasyon

Ang pagtuon sa mga kasulatan nakatabang nako sa pagsunod sa ebanghelyo diha sa eskwelahan. Mao pay pagsugod nako sa middle school, ug dunay daghang dili maayo nga mga butang ug mga tintasyon. Sa dihang naglisud ko sa pagbuntog sa tintasyon, misulay ko sa pagbasa sa mga istorya sa kasulatan aron makakita og mga tubag sa akong mga problema. Nakatabang kini sa pagkawagtang sa tintasyon ug sa pagdangup sa ebanghelyo.

Blake C., edad 12, Idaho, USA

Ang Gahum sa Kasulatan

Una nako kining higayon nga mosulay sa pagbasa sa Basahon ni Mormon. Ang akong paboritong mga kapitulo anaa sa 2 Nephi 25–33. Sa pagkakaron, nakapalig-on gayud kini kanako. Ang kanta sa Primary nga “Scripture Power [Ang Gahum sa Kasulatan]” tukma gayud kaayo ngari nako. Magpamatuod ko sa katinuod sa Basahon ni Mormon ug kusganong motambag ninyo sa pagtuon niini matag adlaw.

Sariah J., edad 13, Arizona, USA